Иблеп чӧрерлер
22.12.2023
Хабарлар
Александр Чуманин
Табығлар-2024. Хакасияның Табығ комиссиязының кнезі Александр Чуманин Россия президенті табығларына чарыдылған брифинг иртірген
Россия Федерациязының президентіне табығ кампаниязы 7 декабрьда пасталыбысхан. Хазна устағҷызына табығлар килер 2024 чылда часхызын иртер, ӱн пиріс ӱс кӱн парар:15,16 паза 17 мартта.
– 7 декабрьда кандидаттарны сығарҷаң тус пасталыбысхан, – чарытхан Александр Чуманин. – Пос посты сығарған кандидаттардаң пічіктерні алары 27 декабрьда тоозылча, политика партиялары сығарған кандидаттардаң – 1 январьда.
Хазна устағҷызына пастағы кандидат Россияның амғы президенті Владимир Путин полыбысхан. Ол пу табығларда пос посты сығарған кандидат чіли парча. Ідӧк ЛДПР партия ӱр ниместе ирткен съездінде партия лидері полчатхан Леонид Слуцкийні Россия президентіне кандидатты чіли сығарарға чаратхан.
– Пос посты сығарған кандидаттар 300 муңнаң ас нимес хол салғанын чыып аларға киректер, – чоохтаан Хакасияның Табығ комиссиязының кнезі.
Олох туста пір регионда кандидаттың ӱчӱн чыылған хол салғаны 7,5 муңнаң кӧп полбасха кирек. Хазна Думазынзар кірчеткен партиялар сығарған кандидаттарға хол салғанын чыырға кирек чоғыл. Пасха партияларның сығарған кандидаттарына 100 муңнаң ас нимес хол салғанын чыырға киректелер, че пір регионда оларның ӱчӱн хол салғаны 2,5 муңнаң аспасха кирек.
Табығлар алнындағы агитация кандидаттар сығарылған тустаң сығара пасталча, СМИ-ларда – 17 февральдаң сығара 14 мартха теере.
Александр Чуманиннің искіриинең, пу табығларда «мобильнай табығҷы» оңдай хати тузаланылар – хаҷан табығҷаа полған орны хоостыра ӱн пирерге чарир. Ідӧк ӱн пиріс кибірли табығ участоктарында иртер, чурттаң сых полбинчатханнарға ибде ӱн пирерге оңдай пирілер. Табығ участоктары чох аалларзар табығ комиссияларының араласчылары постары килерлер, табығҷылар орында ӱн пир полар ӱчӱн.
– Пістің республикада андағ 24 аал, – искірген Александр Чуманин.
Паза пу табығларда Хакасияда Россияның Ӧӧн табығ комиссиязының «Информ УИК» проекті чуртасха кирілер.
– Проекттің ӧӧн сағызы – табығҷаа иртер табығлардаңар чарыда чоохтап пирері, – чарытхан Табығ комиссиязының кнезі Александр Чуманин. – Участковай табығ комиссияларының араласчылары ол кӧстегнең иблеп чӧрерлер, чуртағҷыларға ӱн пирҷең оңдайлардаңар искір турарлар.
Проектте араласчатханнар ӧнетін кип-азахтығ (накидкалығ), бейджтіг паза пасха даа олар табығ комиссиязынаң полчатханын киречілепчеткен ниме-ноолығ полар осхастар. Паза Хакасияның Табығ комиссиязының кнезі чооғынаң, табығларға хайығ тартар ӱчӱн, табығ участоктарында табығҷыларға сувенирлер читірерлер.
Сом Альбина Чистогашевани
Автор :
Альберт Толмашов
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
