Чӱс азыра наа ӱгретчі
22.12.2023
Хабарлар
Хакасия пазы Валентин Коновалов Алтай аймааның чиит ӱгретчілерінең тоғасхан
Ӱгредіг. Алтай аймаанда Ӱгретчі паза ӱгредіг кӧстегҷізі чылының салтарларын иттілер
Школа директорларынаң паза чиит специалисттернең пайрамнығ тоғазыға Хакасия пазы Валентин Коновалов кил парған. Алтай аймаа пазы Ирина Войнова паза ӱгредіг устанызының пастығы Лариса Гимазутина 2023 чылда апарылған тоғыстаңар чоохтааннар.
Пӱӱл аймахтың школаларынзар 103 наа ӱгретчі килтір, оларның 35-і – чиит специалист. Таныхтирға кирек, Алтай аймаанда ӱгретчілер чидіспинчеткенінең палғалыстығ сурығны пӧгеріне кӧп хайығ айландырылча. Тоғынар оңдайларны чахсыландырчалар, чал ахчазын пӧзік синде тударға кӱстенчелер, чиит специалисттерні тартарынҷа тоғыс апарчалар, чурт суриин пӧкчелер. 2023 чылда Хубачар, Аршаннар, Новороссийскай, Кӧк хайа паза пасха даа ааллардағы школаларзар килген ӱгретчілерге 12 квартира алылған паза пір тура пӱдірілген.
Ирина Войнова Валентин Коноваловха паза Хакасия правительствозына ӱгредіг кирее тоғынҷыларына чурт алар программа хоостыра пирілчеткен полызығ ӱчӱн алғыс сӧстерін читірген. Хакасия пазы килчеткен чылда пу программа тоғызын узарадар, бюджетте пу кӧстеглерге ахча кӧріл парған тіп таныхтаан. Ідӧк ӱгретчілернің чал ахчазы синінеңер чоох парған. Хакасия Сибирьдегі федеральнай округ регионнары аразында пу кӧзідігҷе ӱзінҷі орында тіп искірілген.
Соонаң чиит специалисттер республика пазына сурығлар пиргеннер. Олар аның істеніс чолын таллаанынаңар, сӧбірезіндегі Наа чыл удурлир кибірлерінеңер, пасха аймахтар хыринда Алтай аймааның тилізін хайди паалапчатханнаңар піліп аларға иткеннер.
Тоғазығ ӧріністіг хабар чох иртпеен. Хакасия пазы холынаң чиит специалисттернің пірсіне чурт аларына сертификат пирілген, ікінҷізіне тура клӱзі читірілген. Сертификатты Клапиннер сӧбірезі алған. Сӧбіре пазы Станислав Владимирович ӱр ниместең аймахтың Культура туразынаң устапча. Ол Санкт-Петербургтағы театр искусствозының хазна академиязын тоостыр, ідӧк иң пӧзік категориялығ ӱгретчі полчаттыр – 20 чыл азыра ортымах ӱгредігде істен салтыр. Хада хонғаны пасталығ клаcстар ӱгретчізі полча паза культура кӧстегҷе пӧзік ӱгредіг алча.
Кӧк хайадағы школазар килген пасталығ класстар ӱгретчізі Юлия Фоменкаа Хубачарда тура пирілген. Ол Минсуғдағы ӱгретчілер колледжін тоосхан, амды пӧзік ӱгредігні Кемеровтағы университетте заочно алча. Юлия Павловна Наа чыл алнында мындағ улуғ сыйых алғанына тың ӧрінген. Ол Валентин Коноваловты паза Ирина Войнованы прай чӱреенең алғыстаан. Амды, чурт суриинаңар сағыссырабин, прай кӱзін тоғысха пирерге, олғаннарға читкіҷе тус чарыдарға чарир тіп таныхтаан чиит ӱгретчі.
Сом Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
