«Хакас чирі» хабарҷылары – чиңісчілер
22.12.2023
Хабарлар
«Хрусталь парыс-2023» марығ чиңісчілері Альберт Толмашов паза Наталья Сюптерекова
Марығ. Хакасияның Ӧӧркі Чӧбі «Хрусталь парыс-2023» республика марииның чиңісчілерін таныхтабысты
Хакасияның Ӧӧркі Чӧбі пӱӱл хабарҷылар аразындағы марығны 20-ҷі хати иртірді. Анда республикада санға алылған хайдағ даа СМИ хабарҷызына аралазар оңдай пар: газеталарның, телевидение-радиоларның паза искіріг агентстволарының. Марығда тӧрт номинация кӧрілген: «Ӧӧнінеңер чарыда», «Чоннаң табылғаннар», «Азых чоохтазығ» паза «Парламент партнёры». Полғанында ла хабарҷылар ікі ӧмее чарылчалар: пірcінде телевидение-радио хабарҷыларының иң артых тоғызы таныхталча, ікінҷізінде – газета-журналларның паза интернет-сығарыстарның. Андағ оңдайнаң пір номинацияда ікі чиңісчі табылча. Аннаң пасха, прай марығ араласчыларынаң иң артых хабарҷы табылча. Ӧӧркі Чӧп марығның Гран-при сыйиин – «Хрусталь парыс» статуэтканы – улуғ хырлас айындағы сеccиязында читірче.
Улуғ хырлас айының 19-ҷы кӱнінде Хакасияның Ӧӧркі Чӧбі марығ араласчыларын кибірли пайрамни сыйыхтирға чыып алған. Хабарҷыларға сыйыхтарны республика парламентінің кнезі Сергей Сокол, пастағы орынҷызы Пётр Воронин, орынҷылары Леонид Быков, Григорий Назаренко паза депутаттар Оксана Разварина, Валерий Старостин, Алексей Дьяченко, Иван Вагнер, Людмила Кауфман паза пасхазы читіргеннер.
Пастағы сӧсті алып, Сергей Михайлович таныхтаан:
– Полған на хабарҷы – ол чайаачы. Сірер кӧп ниме пілчезер, ӱлгӱ нименең айғасчатханын чонға пілдістіг читір полчазар. Сірерге, хығырығҷыларға, кӧрігҷілерге паза исчеткеннерге хынығ поларға кӱстенербіс. Алныбысты улуғ пӧгіннер паза кӧстеглер кӧп турғысчабыс. Сірернің полызииңарнаң піс чуртағҷыларыбысха тоғыс салтарларынаңар чоохтирбыс. Чайаачы тоғызыңар паза піске хайчатхан ӱчӱн алғыс.
Сергей Сокол «Хрусталь парыстың» Гран-при сыйиина турысхан «Хакасия» газетаның ӧӧн редакторының пастағы орынҷызы Юрий Абумовха чиңісчінің дипломын паза ахчалығ сыйиин читірген. Статуэтка ағаа Хакасияның Ӧӧркі Чӧбінің пизінҷі сессиязында читірілген.
Анаң «Телевидение паза радио» ӧмезінің чиңісчілеріне сыйыхтар читірілген: «Юг Сибири» медиагруппаның шеф-редакторы Александр Тимофеевке – «Ӧӧнінеңер чарыда» номинацияда, «Хакасия» ГТРК-ның искіріг программаларының служба пастығының орынҷызы Наталья Табаковаа – «Чоннаң табылғаннар» номинацияда, «Хакасия» ГТРК-ның хабарҷызы Егор Генриххе – «Азых чоохтазығ» номинацияда паза РТС телевидениенің улуғ редакторы Ольга Борловскаяа – «Парламент партнёры» номинацияда.
Оларның соонаң «Печать паза интернет-сығарыс» ӧмеде чиңісчілер адалғаннар. «Хакас чирі» республика газетазының ӧӧн редактор орынҷылары Альберт Толмашов паза Наталья Сюптерекова «Парламент партнёры» паза «Ӧӧнінеңер чарыда» номинацияларда чиңісчі полыбысханнар. «Чоннаң табылғаннар» номинацияда Асхыс аймаандағы «Аскизский труженик» газетаның ӧӧн редактор орынҷызы Максим Ахпашев чиңен, «Азых чоохтазығ» номинацияда – Юрий Абумов.
Аннаң пасха, «Хрусталь парыс-2023» марығның тимнегліг комитеді ӱс араласчызын Хакасия Ӧӧркі Чӧбінің алғыстас пічиинең таныхтирға чараттыр: «Орджоникидзевский рабочий» газетаның пос хабарҷызы Дмитрий Тартачаковты, «Родная земля» газетаның ӧӧн редакторы Наталья Кашинаны (Боград аймаа) паза «Хакасия» газетаның улуғ хабарҷызы Станислав Побеляевті. Пасхазына марығ араласчызы дипломнары читірілген.
Хабарҷыларның тоғыстарын паалап, Пётр Воронин чиңісчілерні таллирға оой полбаанын таныхтаан. Пірее номинацияларда чиңісчі пасха араласчыларны пір ӱнге ле аза халтыр.
Сом Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
