Полған на кiзее полысчалар
08.12.2023
Хабарлар
Хакасия пазы Валентин Коновалов Хакасияның Халыхтар палатазының кнезi Ольга Левченконы орденнең таныхтапча
Пайрам. Пу кӱннерде «Ағбан» аалҷы туразының актовай залында Хакасияның Халыхтар палатазының 15 чылын таныхтааннар
Халыхтар палатазын пайрамнаң алғыстирға чыылысханнар Хакас Республиканың ӱлгӱдегi паза халых пiрiгiстерiндегi кiзiлер.
Пайрамнығ чыылығ пасталар алнында, Хакасияның Халыхтар палатазының тархынын тӧстелгеннең сығара видеофильм пастыра кӧзiткеннер паза аннаңар чоохтааннар.
Хакасияның хазна ӱлгӱзiнiң толдырығлығ органнары республикадағы халыхтар паза киртiнiс организацияларынаң палғалыс тудар ӱчӱн Халыхтар палатазын тӧстееннер. 2008 чылда 3 октябрьда «Хакас Республиканың Халыхтар палатазынаңар» закон сыххан. Анаң анда тоғынар кiзiлернi таллап сыхханнар. Халыхтар палатазының пастағы кнезiне Григорий Майнагашевтi тапханнар. Григорий Ильич iдӧк Хакасияның Улуғлар чӧбi президиумының кiзiзi полған.
Iди ол тустаң сығара Халыхтар палатазы тоғызын пастаан. Андағы кiзiлернi iкiлер чыл пазынаң алыстырчатханнар. Анзы алылған устав хоостыра идiлчеткен. Халыхтар палатазынаң iкi чыл пазынаң Серж Адамян устаан, аның соонаң амға теере ол тоғыста – Ольга Левченко.
Чоохтирға кирек, пу палатаның тоғызында пiстiң республиканың саблығ кiзiлерi кӧп араласханнар. Iди Халыхтар палатазының кнес орынҷызы полған Валерий Доможаков, ол iдӧк кiзiлер праволарын арачылаҷаң комиссияда тоғынған. Культура сурығларынаң айғас турҷаң Владимир Граф, киртiнiс сурығларынҷа тоғынған Хакасия паза Ағбанның архиепископы Ионафан, экология паза чир-чайаан киректерiнҷе комиссияның кнезi полған Ирина Санникова паза даа пасхазы. Олар прайзы аймах чылларда тоғынғлааннар. Хай пiреезi ам даа тоғынча.
Халыхтар палатазы, хазна ӱлгӱлерiнең паза халых пiрiгiстерiнең палғалыс тудып, кӧп тоғыс идерге маңнанча. Пастағы туста сидiк полған полза, 15 чыл аразына тоғыс тӱзiмi илееде ӧс парған. Халыхтар палатазындағы аймах комиссияларның кiзiлерi республиканың прай даа киректерiнде ӧткiн араласчалар. Пастағы чылларда Сойан-Сус ГЭС-та улуғ саай пол парған соонда кiзiлерге материальнай паза юридическай полызығлар киректелген. Ол киректең Халыхтар палатазы хыйа полбаан. Iдӧк ковид ағырығ тымозы тузында волонтерлар тоғызында араласханнар. Анаң Донбасста чаалазығлар пар сыхханда, пiстiң чааҷыларға гуманитарнай полызығларны амға теере ысчалар. Пiр сӧснең, Халыхтар палатазынзар кем дее айланза, анда полызығ пирерге хаҷан даа тимделер.
Пайрам чыылиинда Хакасия пазы Валентин Коновалов позының алғыстас сӧзiнде пу прай киректернi таныхтаан. Халыхтар палатазы тоғызын тӱзiмнiг апарча паза уғаа кирек социальнай сурығларны пӧгерге полысча тiп махтаан.
Анаң Халыхтар палатазынаң кӧп чыл устап париған Ольга Левченкоға «Хакасияа чахсы киректерi ӱчӱн» орден читiрген. Iдӧк Хакасияның Аарластығ пiчиине турысхан палатаның аппарат устағҷызы Ирина Селькина. Хакасия пазының алғыстазын алғаннар Ирина Баженова, Василий Логинов паза Наталья Федотова.
Хакасияның Ӧӧркi Чӧп кнезiнiң орынҷызы Григорий Назаренко, Халыхтар палатазына пайрамы хоостыра чылығ сӧстерiн читiрiп, алғыстас пiчiктерiнең Татьяна Гитернi, Олег Золотаревты паза Владимир Сорокиннi сыйлаан.
Халыхтар палатазын пасха даа хазна организацияларының паза халых пiрiгiстерiнiң кiзiлерi алғыстааннар. Iдӧк, сарнап, сыйыхтарын читiргеннер ырҷылар Ольга Васильева, Ирина Кулагашева, Алина Канзычакова.
Сом Альбина Чистогашевани
Автор :
Илья Топоев
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
