Ах чарыхтаң парыбысты Хакасияның композиторлар пірігізінің кізізі Тамара Даниловна МАГАНАКОВА
07.12.2023
Хабарлар
72 чазын толдыр салып, ах чарыхтаң парыбысты Хакасияның композиторлар пірігізінің кізізі
Тамара Даниловна МАГАНАКОВА.
Тамара Даниловна 1 декабрьда 1951 чылда Ағбан пилтірі аймаандағы Пӱӱр пилтірі аалда тӧреен. Кічігдең сығара пос кӧңнінең ойыннар турғысчатхан чайаачы ӧмелерде сарнаҷаң. 20 частығдаң сығара «Кӱн чахайағы» ӧменің араласчызы полған. Чиит оол-хыстарнаң хада 8 чыл изере Хакасияның аалларынҷа, Россияҷа, хырығ озаринҷа ойыннар кӧзідіп чӧрген.
1986 чылда Тамара Даниловна Ағбандағы музыка училищезін тоосхан, істеніс чолын Харатастағы олған музыка школазында пастаан. Хакасияның халых-чарыдығлығ чуртазында ӧткін араласхан, аймах концерттер, тоғазығлар иртір турған. Сарыннар чыындыларын тимнеп, сығарыбысчаң. Анда хакас поэттер В.Татарованың, А.Кыштымовтың паза даа пасхаларының кибеліcтеріне пазылған сарыннар полғаннар. Ол «Хакасия культуразының саблығ тоғынҷызы» аарластығ атха турысхан.
Хакасияда композиторлар пірігізі тӧстелгенде, Тамара Даниловна аның нандырығлығ хачызына табылған. Ай-тыс пілбес хылыхтығ кізі халыхтар тоғызына саңай тӱгеде пирінген.
Уғаа улуғ чідіріг. Паза аның сіліг ӱнін испеспіс. Чон алнынзар чалахай кӱлімзіреснең сых килзе, кӧрігчілер аны азах узына турып удурлаҷаңнар, ыр-сарыннарын хынып исчеңнер.
Пістің сағызыбыста ол уғаа сіліг омалығ, ай-тыс пілбес хылыхтығ тоғысха кӱстенҷік кізі чіли паза чарых омазы чӱреебісте саңайға халар.
Автор :
Хакасияның композиторлар пірігізі
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
