Кӱстіг командаларнаң ойнааннар
06.12.2023
Хабарлар
«Саянының» хоккеисттері ӧменең хаалханы арачылапчалар
Спорт. «Саяны» команда «Динамо» (Москва) паза «Водник» (Архангельск) хоккей ӧмелерінең тоғасхан
Саблығ клубтар
Стадион хыринда кӧп машина турчатса, сах андох пілдістіг пол парча: кізілер «Саяны» ӱчӱн «ағырарға» килгеннер. Кӧрігҷілер ойыннарға хомай нимес чыылысчалар. Итсе, совет тузынаң тиңнестір полбассың. СССР-да «Саяны» меспектіг хоккей ӧмелері аразында иң кӧп кӧрігҷіліг команда чіли сабланҷаң. Пу наада пістің ооллар орындағы пустығ чазыда Суперлиганың иң кӱстіг клубтарынаң тоғасханнар. 1 декабрьда «Динамонаң» (Москва) ойын ирткен, позырахта – «Водникнең» (Архангельск).
Пастағы команданы «хазнаның поғдархазы» адапчалар. Анзы тиктең нимес. 100 чылын таныхтап салған «Динамо» СССР-ның чемпионаттарында 15 хати чиңіс тутхан, Россия марығларында – 9 хати. Саблығ ӧме халғанҷызын чемпион атха 2021/2022 чылларның сезонында турысхан. Тилекей кубогын «Динамо» ӱс хати утхан. «Водниктеңер» чоохтаза, ол 1925 чылда тӧстелтір. Аның тархыны чиңістерге паза утырыстарға пай. Ӧӧні – халғанҷы чылларда архангельсктегілер Россия чемпионаттарында тӧреміл сыйыхтығ орыннарға сыхчалар. Амғы марығны клуб утырыс чох иртче. Кӧзідімге, «Водник» команда Москвадағы «Динамоны» 5:4 саннаң чиңіп алған, «СКА-Нефтяникті» – 3:2 саннаң. Тоғазығлар тузында «Саяныға» хатығ чуғар тіп ікінҷілес чоғыл. Прайзының ікі ле сурығ: матчтар хайдағ саннаң тоозылар? Хакасиядағы ӧме «ыырҷыларына» пірее гол саап пирер бе?
Ойын пасталғалах, стадионға толдыра хысхырыстар: «Саяны», алнынзар!», «Динамо», ибзер нан!» Аалҷылар пуста ӧткін хайынарлар сағынғабыс. Москвадағылар маңзырабин ойнааннар. Хайдағ оңдайнаң олар соон сӱріcтіре тӧрт гол кире сабыстылар? Пістіңнер удурласчалар. Пастағы таймда «Саянының» ӱс хати меспекті кире сабызар оңдай полған, команда пірcінең дее тузалан полбады. Кӧні чоохтаза, узыбыс читпинче. Ойынның пастағы чардығы 0:4 саннаң тоозылды. Ікінҷі таймда «Динамо» толдыра кӱзінең ойнаан. Хысхаҷах тус аразына сан 0:6 пол парды. «Саяны» чідірінмеен. 58-ҷі минутада Чингис Хандамаев нандыр пирген. Трибунада ӧрініс: «Пістіңнер гол саап полчалар!» Ӱр дее полбаанда, «Динамоның» хаалхазынзар пазох меспек учухча. Аны Сергей Дёмин арғызы Чингис Хандамаевтің хабазиинаң кире сабысты. Кӧрігҷілер уламох сууласчалар. Сан – 2:6. Анаң аалҷылар «Саяныға» кӧзітчең ниме кӧзіт пиргеннер. Салтарында, пістің ӧме 3:14 саннаң унада саптырыбысхан. Ӱзінҷі меспекті позының адына пазох Чингис Хандамаев пас салған.
2019 чылдаң «Динамо» клуб саблығ хоккеист Евгений Иванушкиннің устаанынаң ойнапча. 44 чаcтығ ӧӧн тренер чуртаста ачых-чарых кізі полтыр. Пресс-конференцияда ол, хабарҷыларның кӧңнін кӧдіріп, чылығ сӧстерге харанмаан. Евгений Александрович теен:
– Чуртағҷыларны «Саяны» Суперлигазар айланғанынаң алғыстапчам. Хакасия – меспектіг хоккейге хынчатханнарның республиказы. Ол син кізіні трибунада кӧріп, чӱрееме ӧрініc толған. Пістің спорт кӧрімі Хакасияда улуғласта. Полған на регионда меспектіг хоккейні іди аарлабинчалар. Кӧрігҷілер матап «ағырчатсалар», «ыырҷаа» ойнирға сидік. Он чыл пазынаң Ағбандағы пуссар пазох сығарға чӱрексіністіг полған. Хакасияда арғыстар кӧп, аннаңар пеер ойнирға хынып килчебіс. «Динамоның» пастағы таймдағы ойынына чӧпcінмеем. Матчтың ікінҷі чардығында ӧмедегілер устарын кӧзіттілер.
«Саянының» ӧӧн тренері Евгений Ерахтин хысхаҷахти чоохтаан:
– Cуперлиганың алты иң кӱстіг командаларынаң ойнирға «Саянының» узы читпинче. Анзын прайзы пілінче. Санапчам, ӧӧн сидіксініс – меспекті кире саап полбинчатханы. Пастағы таймда чахсы оңдайлар полған, тузалан полбаабыс. Кӧрігҷілерзер айланчам, оолларны пыролабаңар, нандырығны мин тударбын.
Алмаз Миргазов
Сизінгенде, 1 декабрьда трибунадағы улустың илеедезі «ағырарға» ла нимес, «Динамо» пуста ойнапчатханын кӧріп аларға килген. Аның ӱчӱн Россияның саблығ спорт узы, ӱс хати тилекей чемпионы Алмаз Миргазов турысча нооза. Саблығ хоккеист Свердловск облазындағы Первоуральск городта тӧреен, андох меспектіг хоккейнең айғазарға пастаан. Саарбах тузында хоккеист ікіҷе чыл «Саяныда» ойнаан. Аннаңар кӧрігҷілер Миргазовты пос кізізіне санапчалар.
Ойын тоозылғанда, улуғлар-кічіглер саблығ спортсменні ибірібіcкеннер. Пірсіне хол сал пир, ікінҷізінең сомға суурынып ал. Алында саналығ чарысча ӱс хати Олимп чемпионы Александр Большуновтың соонҷа кізілер іди чӱгӱр чӧрчеткенін кӧрерге киліскен. Хоккеистке маң чох полған полза даа, ол «Хакасия» паза «Хакас чирі» газеталар хабарҷыларынаң чоохтазып алған. Алмаз Миргазов таныхтаан:
– Ағбанда чуртаанынаңар кӧп чарых сағыс халған. Мында он пис чыл полбадым. Саарбахха ибдең ырах чуртирға оой нимес, че мағаа тренерлер, арғыстарым чылығ хайҷаңнар. Ағбан иң хынчатхан орыннарның пірcі полча. Мин татар сӧбірезінде тӧреем. Паба-іҷемнің кӱстенізінең тӧреен тілімні пілчем, чон кибірлерінең таныспын. Пос туста мечетьсер чӧрчем. Сӧбіремнең хада Москвада чуртапчам. Хызыҷаама ӱс час. Аннаң татар тілінең не чоохтасчабыс. Амғы ойыннаңар чоохтаза, ӱс меспек кире сабысхан ползам даа, позымны турыстыра кӧзіт полбадым. «Динамо» Россия чемпионадында чиңіс тударға пӧгінче. Пӱӱнгі кӱнде «Водникке» ле утырдыбыс. Кирек килізер тіп ізеніс пар, че ойын пірееде сағыбаан оңдайнаң парыбысча. Ағбандағылар мині ундутпинчатхан ӱчӱн алғызым читірчем.
«Водник» команда
Архангельсктегі ӧме пуста айағ пілбинчеткен машинаа тӧӧй полған. Пастағы таймда хоккеисттер пістіңнерге соон сӱрістіре 6 меспек кире сабысханнар. «Саянының» ӱс гол позының адына пас салар оңдай полған. Хомзынысха, чир-суғҷыларыбыс оларнаң тузалан полбааннар. Матчтың ікінҷі чардығында Руслан Гавричковнаң Олег Селивёрсткин ӧріндіргеннер. Олар арғыстары полызиинаң меспектерні кире сабысханнар. Ойын 2:9 саннаң тоозылған. Утыр салған даа ползабыс, таблозар кӧрерге уйадыстығ нимес.
Ағбанда Россия чемпионадының теестегі ойыннары 23 декабрьда иртерлер. «Саяны» команда «Сибсельмаш» (Новосибирск) ӧменең тоғазар. Прайзын хығырчабыс.
Сом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
