Іҷе полары – илбек ырыс-часка
29.11.2023
Хабарлар
Хакасия пазы Валентин Коновалов сигіс палалығ Селигеев ирепчее «Родительская доблесть Хакасии» медальны читірген
Сыйыхтас. Іҷе кӱні алнында республикадағы ипчі чонға, ол санда кӧп палалығларға хазна сыйыхтары читірілген
Пістің хазнада Іҷе кӱнін таныхтирдаңар чарадығ 1998 чылда алылған. Ол тустаң аны чыл сай ноябрь айның халғанҷы позырах кӱнде ӱлӱкӱннепчелер.
Хакасияның ӱлгӱлері ирткен неделяда республиканың ӧӧн городында Іҷе кӱніне удур пайрамнығ мероприятие иртіріп, ипчі чонны хазна сыйыхтарынаң таныхтааннар. Чон-чахсы пу пайрамға С.П.Кадышевтің адынаң чон чайаачызы кінінзер чыылысхан. Пу улуғ тоғазығның пайрамнығ чардығы «Худай Ымай» театрализованнай кӧзідігнең пасталған. Сценада хакас кип-азаан кис салған чиит хыстар, кеен пас чӧріп, пу кӧзідігні чазааннар. Хайди чоохталған пу ойын-кӧзідігде, Худай Ымай пала тӧріпчеткенін хайығда тутча паза оларны ағырығлардаң арачылапча. Іҷе поларға чайалғаны чир ӱстӱнде пӧзік синдегі кӱс полча, ол наа чуртас сыйлапча. Пала тӧріпчеткенін сын ырыс-часкаа санирға чарир.
Іҷедеңер сценада сіліг, хайхастығ сӧстер уғаа кӧп чоохталған соонаң іҷелерні ӱлӱкӱннең алғыстаан Хакасия пазы Валентин Коновалов. Паза ол кӧп палалығ ікі сӧбірее хазна сыйиин, пасхазына республиканың Аарластығ пічиин читірген. Ол чооғында таныхтаан, іҷе ноо даа палаа чуртазы тооза иң ӧӧн кізізі полча. Іҷенің илбек хынызы пісті чуртас тооза хайраллапча, иң сидік туста кӱс пирче, чир-сууна хынарға ӱгретче. Аарлығ іҷелер паза ипчілер, сірерге кӱннің тоғыс апарчатхан ӱчӱн улуғ алғыс. Профессияҷа істеніп, сірер ідӧк ибде илбек тоғыс толдырчазар, чурт очығын хайраллап, истіг чуртас тӧстепчезер. Алынҷа алғыс сӧстерін ідӧк читірерге кирек кӧп палалығ іҷелерге, сӧбірезінзер ӧкіс палаларны ӧскірерге алчатхан ипчілерге, хайзыларына аар-чӱк ікі хати кӧп артылча. Валентин Олегович іҷелерге ырыс-часка, чахсы чуртас, хыныс алғаан.
Анаң ол кӧп палалығ ікі cӧбірее хазна сыйиин читір пирген. Федеральнай сыйыхнаң – «Родительская слава» орден медальынаң – таныхтатхан Жанна Геннадьевнанаң Пётр Петрович Попов ирепчі. Пу сӧбіре Шира аймаандағы Хара кӧл аалда чуртапча. «Родительская доблесть Хакасии» медальнаң Виктория Викторовна паза Антон Олегович Селигеевтер сыйыхтатханнар. Ирепчі Пии аймаандағы Хойбал аалдаң.
Хакасияның Аарластығ пічиине турысхан улусты Валентин Коновалов сценада ідӧк, хол тудып, ӧрчіліг удурлаан. Андағ ӱлӱс тӱскен тіспен істенчеткен ипчілерге. Сыйыхтатханнарның санында Ағбандағы аэропорттың ӱс тоғынҷызы полған: Наталья Кокалевская, Ирина Храмова, Лидия Шинимова. Ідӧк М.Ю.Лермонтовтың адынаң орыс драма театрының директоры Юлия Трошкина, гигиена паза эпидемиология кінінің биологы Любовь Шадрина, Аршаннар аал чӧбі устағ-пастааның пастағы категориялығ специализі Оксана Нарылкова паза пасхазы. Іди онҷа іҷе чеестелген.
Соонаң іҷелерзер алғыстас сӧстерінең Хакасия Ӧӧркі Чӧбінің кнезі Сергей Сокол айланған. Аның холынаң сыйыхтарны кӧп палалығ алты іҷе алған. Ол санда – Асхыс аймааның чуртағҷызы Валентина Ивандаева. Аның хада хонғаны, ӧнетін чаа операциязында аралазып, чуртазын пир салған. Ам Валентина Геннадьевна пис палазын чалғызан ӧскірче.
«Родительская доблесть Хакасии» медальнаң сыйыхтатхан Селигеев ирепчі сигіс паланың паба-іҷезі полча. Сӧбіре пазы Антон Олегович тӧреен-ӧскен аалыҷаанда чурт салынған. Хада хонғаны Виктория Викторовна – Асхыс аймаандағы Сафьяннар аалынаң сыххан кізі. Ол 9-ҷы класста ӱгренчеткенде, іҷезі Хойбал аалзар кӧс килтір. Іди 14 частығдаң наа аалда ӧскен. Улуғ ӧс парғанда, андох сӧбірезін тӧстеен.
– Хоных хон салып, ипчімнең 20 чыл хада чуртап парирбыс. Пӱӱл Наа чыл удурлаҷаң кӱнде – 31 декабрьда – чарас полғаннаң пеер 20 чыл полар, – теен Антон Олегович. – Пістің прай сигіс пала: алты хыс, ікі оол. Тун палабыс – 18 частығ хыс. Ол пӱӱл хазна университедінзер ӱгренерге кіріп алды. Пастағы курста ӱгренче. Ады – Диана. Ол «Хакас тілі паза литература, орыс тілі паза литература ӱгретчізі» специальностьты таллап алған. Иң кічии – ӱс частығ. Палаларыбыс, Куйбышевтегі ортымах школада ӱгреніп, анда интернатта чуртапчалар. Тынағ кӱннерінде ибзер кил парчалар.
Хайди чоохтаан іҷе кізі, оларның пастап ӱс хыс изере тӧреен. Ам тун хызының алтындағызы 10-ҷы класста ӱгренче. Ол пӱӱл Хызылчардағы колледжсер ӱгренерге кіріп алтыр, «землеустроитель» специальностьха ӱгренерҷік. Че сағам ол, чазы читкелекке ибдең ырах ӱгрен полбазын пілініп, ибзер айлан килген. Ортымах школаны тоозарға чарат салтыр. Аның алтындағызы 9-ҷы класста ӱгренче. Анаң ікі оол парча. Оларның улиин Айтан адап салғаннар, кічиин – Айхан. Олар – 13 паза 14 частығ саарбахтар. Айхан спортнаң айғазарға хынча. Оолағастар соонаң, тізең, сӧбіреде ӱс хызыҷах тӧреен. Ам сигіс частығ хыс туңмаҷағы Хойбалдағы пасталығ школада 2-ҷі класста ӱгренчеттір. Алты паза ӱс частығ туңмаҷахтары олған садынзар чӧрчелер, оларны Куйбышевсер тарт чӧрчеттірлер. Хызыҷахтар прайзы чахсы ӱгренерге кӱстенчелер, махтапча оларны іҷезі.
Ирепчі Хойбалда пос хониин тудып айғасча. Аттар, хойлар, інектер, таңахтар тутчабыс тіпче сӧбіре пазы. Аалда мал тутпин хайди чуртир за. Олар палаларын иб аразында хайынарға, мал соонҷа кӧрерге кӧніктірчелер. Кемге ибде ниме идерге кирек полчатханын прай чахсы пілчелер. Улуғларының чооғын чахсы исчелер.
– Ирепчі ынағ чуртирға кирек, андада сӧбіре дее пірге тудынча. Палаларны ӧскірерінде паза оларны иптіг ӱгредерінде іҷе-пабаа сыдамахтығ поларға киректелче. Палалар хылии-оңдайынаң пасхалалчалар нооза. Хайдағ даа сидік полза, улуғларға холларын пос салбасха кирек. Ӧӧні – палаларға арғыс, чӧлег полары. Палалар – пістің ырыс-часкабыс, – таныхтаан Виктория Викторовна.
Чоохтирға кирек, Селигеевтернің улуғ сӧбіpезіне пӱӱл августта республика сыйых иткенӧк – «Газель» микроавтобус тикке пирілген. Наа транспорттығ прай сӧбіренең мискелеп чӧр килгебіс тіп ӧрінізінең ӱлескеннер олар. Амды ирепчіні медальнаң таныхтадылар.
Пайрамнығ мероприятиеде пасха даа министерство-ведомстволар постарының сыйыхтарын ӧткін іҷелерге читіргеннер. Сыйыхтас аразында кӧрігҷілерні чайаачы устарынаң, ыр-сарыннарынаң, теелбектерінең республика филармониязының артисттері паза национальнай кіннің чайаачылары ӧріндіргеннер.
Сом Дмитрий Сунчугашевти
Автор :
Инора Боргоякова
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
