Ӱгренҷілерге ӧрініс
29.11.2023
Хабарлар
Пыдырахтағы ортымах школаның директоры Анастасия Кулумаева (сол саринаң), Тоғыр чул аалдағы школаның директоры Наталья Торокова, Пыдырахтағы школа автобузының шоферы Александр Тороков
«Ӱгредіг» нацпроект. Тиксі хазна синінде пу нацпроектче школаларға автобустар пирер чӧрім узарадылча. Пу наада Хакасия пазы Валентин Коновалов республикадағы школалар устағҷыларына 20 автобус клӱзін читірген
Хакасиядағы ӱгредіг учреждениелеріне наа автобустар пирілчетсе, анзы сыбыра ӧрініс ағылча. Андағох танығлығ кӱн полды пу ирткен пятницада – республиканың ӱлгӱ туразы алнындағы Пастағы май ачығындағы нап-наа 20 автобус прайзының хайиин тартчатхан. Аннаңар даа оларның хыринда турғлапчатхан хай пірее школалар директорлары, кӧңнілерін пазын полбин, плесет тее саларға тимде полғаннар, чалахай чоохтасхлапчатханнар.
– Амды піске кӧп саннығ ӱгренҷілернең хада, теести дее полза, аар-пеер чорыхтарға чӧр турар чахсы оңдай табылар. Хакасияның танығлығ чирлерінеңер кӧп хати истері алай пір хати пос харахтарынаң кӧріп алары саңай пасха кирек, – ӧрінізін чазырбинча Ағбандағы пӱӱл тузаланысха кирілген улуғ 32 № ортымах школаның директоры Валентина Кызласова, наа автобусты сала ла сыйбастырбинчатхан туста.
Валентина Михайловна мының алнында Ағбандағы 25 № ортымах школада ӱр чыллар завуч полып тоғынған. Тӧреен чирінің сіліг пулуңнарына саңай аптат салған ӱгретчі олғаннарнаң хада удаа аар-пеер сығыбыс турҷаң. Амды ол улуғ школаның устағҷызына турғызылды. Пу нап-наа автобус аның алғым сағыс-пӧгіннерін толдырарға полызарына Валентина Кызласова матап киртінче паза ізенче.
Хакасия пазы Валентин Коновалов, автобустар аларға чыылысхан кізілер алнынзар сығып, Россия президенті Владимир Путиннің пастаа хоостыра чуртасха кирілген нацпроект хайдағ улуғ хабазығ пирчеткенін таныхтаан, пістің республика анда ӧткін араласчатханын искірген. Анаң Валентин Олегович автобустар клӱстерін читіріп пастаан, Хакасияның аймах аалларындағы школалар директорларына килістіре чылығ сӧстер таапчатхан, чағдапчатхан Іҷе кӱні ӱлӱкӱннең алғыстап, наа чидіглерге алғабысчатхан.
Ол позы даа сыйых чох халбаан. Алтай аймаандағы Аршаннар аалының школазы автобус клӱзін аларға хығыртылғанда, позынзар Соох апсахнаң Хар хызыҷах чағдапчатханын кӧр салып, хахап таа партырҷых. Школа директоры Елена Кызласова, Хакасия пазының алнында сала даа туртухпин, Валентин Олеговичті чағдапчатхан Наа чылнаң алғыстаан, килістіре сӧстер чоохтанған. Школада шофер полчатхан Эдуард Шейн ағаа хапчыхта сыйых читірген. Республика правительствозының кнезі, тыстан полбас пала чіли, килістіре хылынып, андар кӧрібіскен – чалахай кӱлімзіребіскен, сыйых пастыхтың кӧңніне кіргені харахха кӧріндіре нооза.
– Елена Геннадьевна, ниме андар сух салғазар? Пістің ағаа даа сағызыбыс читпеен, – сурастырғлап пастабысханнар Аршаннар аалының школа директорынаң пасхазы.
– Парыңар, кӧріп алыңар, – сала даа чідірінминче анзы.
Ол туста, тізең, Боград аймаандағы Сарығ хас аалдаң килген ӧткін хылыхтығ оолағас Валентин Олеговичке кибеліс хығыр пирген. Оңарылыстығ, Іҷе кӱні алнында кибеліс паарсах іҷедеңер полчатпас па. Хакасия пазы ағаа хол тутхан – іди позының алғызын читірген, ӱгренҷіні махтаан.
– Наталья Николаевна, ноға чалғысхан на турчазар? – сурча Анастасия Кулумаева, Шира аймаандағы Тоғыр чул аалның школа директорынзар чағын пастырып.
– Шоферыбыс мында хайда-да поларға кирек. Пірее таныстарына тоғас парған полар, – ӱндесче Наталья Торокова.
– Син аны таныпчазың ма, Александр? – айланчам чир-суғҷымзар, Пыдырахтағы ортымах школада водитель полып тоғынчатхан Александр Тороковсар.
Анзы пазын на икіп салған. Анаң, танызының пастығы арғызын хызааннап салыбызарынаң чочынып па, Сергей Кыштымов амох айланар, автобусха кирек пол парчатхан хоза частьтар кӧрглирге садығ туразынзар чӧрібіскен теен. Позы, тізең, кабинада ипти ле одыр тастабыстыр, андағы нимелерні кӧрглеп пастабыстыр.
– Мының алнында піске пирілген «Газель» илееде иргілен парды. Палалар, хысхызын анда соох тіп, одырарға даа хынминыбысчалар. Амды пеер постары кире сегірглебіс турарлар, – чалахай кӱлімзірепче Александр Филиппович.
Таныхтирға кирек, ол, институт тоосхан соонда, пістің редакцияда нинҷе-де ай хабарҷы полған. Че тоғыс кӧңніне кірбеен осхас. Тӧреен-ӧскен Чыланнығзар чӧрібіскен, анда клуб устағҷызы полыбысхан. Аал чуртазынаңар хысхаҷах хабарлар пазыбысчаң. Аннаң чоох-чаахнаң алызарға хаҷан даа хынығ паза чапсых поладыр.
– Пілчезер бе, халғанҷы туста палалар саны тың хызырылча. Кӧзідімге алза, Харағай паары аалзар школа соонаң ікі ле пала апарчам. Олар школа тоос салзалар, андар чӧрҷең сылтағ чох полар, – сағыссырастарынаң ӱлесче шофер.
Сах андох школа директорынзар сыныхти кӧрібіскем. Анастасия Кулумаева аннаң чарасча. Итсе, халғанҷы туста сығыс килген ағырсымнығ сурығ тиксі хазнада тіп таныхтапча. Аалларда тоғыс чоғыл, аннаңар чииттер пасха орыннарҷа тарасхлапчалар, нандыра айланминчалар тіпче.
– Наа автобус пиргеніне тың ӧрінчебіс. Школабыста амды ӱлӱкӱн полар. Ӱгренҷілерібіске аймах-пасха марығларға чӧрерге киректелче. Амды андағ оңдай табылар, – таныхтапча Пыдырахтағы ортымах школаның директоры.
Нап-наа, сіліг кӧрімніг автобустар Хакасияның ыраххы-чағынғы аал-городтарынҷа тарасхлап пастабысханнар.
Сом Дмитрий Сунчугашевти
Автор :
Анатолий Султреков
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
