Пастағы чиңіс
24.11.2023
Хабарлар
«Саяны» команда «Уральский трубник» клубнаң ойнапчатхан туста
Спорт. Пу кӱннерде «Саяны» команда «Уральский трубник» (Первоуральск) паза «Родина» (Киров) хоккей ӧмелерінең тоғасхан
Хакасияда меспектіг хоккей хаҷан даа улуғласта полған. «Саяны» Суперлигада пазох ойнабысханда, кӧрігҷілер cаны уламох хозыл парды. Итсе, пастағы матчтар «ағырчатхан» улусты хомзындырғаннар. Соон сӱрістіре хоккеисттерібіс тӧрт командаа – «Байкал-Энергия», «СКА-Нефтяник», «Енисей», «Кузбасс» – утыр салғаннар. 19 паза 22 ноябрьда ирткен ойыннар, тізең, кӧрігҷілернің кӧңнін кӧдірділер. Пістің ооллар пустығ чазыда турыстыра кӧрінгеннер нооза.
Позырахта «Саяны» команда «Уральский трубник» ӧменең ойнаан. Матч Свердловск облазындағы Первоуральск городта ирткен. Клуб 1937 чылда тӧстелтір. Ол Суперлигада тӧреміл араласча. Ӧменің иң улуғ чидии – 2018/2019 чылларның сезонында Россия чемпионадында ӱзінҷі орынға сыхханы. Ідӧк «Уральский трубник» ікі хати пизінҷі орында полтыр. Ойыннаңар чоохтаза, ол хазыр парған. Матч пасталғандох, чазының ээлері атакаа пар cыхханнар. Ікінҷі минутада сан 0:1 пол парды. «Ыырҷы» тохтирға сағынминча. Итсе, пістіңнер дее маң пирбинчелер. Хаалха хадағҷызы Яков Гахты махтирға кирек. Спортсмен прай кӧңнін салып хаалханы арачылаан. 32-ҷі минутада Сергей Дёмин арғызы Артём Варламовтың полызиинаң санны тиңнестірібіскен. Тӱрчедең сан 2:1 пол парды. Анзы Иван Касаткиннің чидии. «Саяны» утча, чӱректе – ӧрініс.
Ікінҷі тайм голларға пай полған. Николай Иванов паза Михаил Лисюк «ыырҷының» хаалхазынзар ікі меспекті кире сабысханнар. Сан – 4:1. Хакасиядағы команда Первоуральскта пастағы чиңізін тудар, неке. Че хайди пістің чонда тидірлер: ізенген тағда киик полбинча. Ағаа хоза, «Уральский трубник» позының чазызында ойнаан. Команда, позын холға алып, хысхаҷах тус аразына санны тиңнестірібіскен. Ӧмедегілердең Артём Вшивков пӧзік узынаң аптады. Матч 4:5 саннаң тоозылған.
Первоуральскта ойнабысхан соонда оолларыбыс Кировсар чол тутханнар. Анда олар «Родина» команданаң тоғасханнар. Пазағы чылда клуб 90 чылын пайрамнир. Ол тархынын 1934 чылдаң апарча. Клубтың хоккеисттері CCCР-ның, Россияның піріктірілген командаларында турыстыра ойнааннар. «Родина» ӧме – Россия чемпионадының 2005/2006 чыллардағы сезонының хола призёры.
Кировта хомай кӱн турғаннаңар, матч сидік оңдайларда партыр. Че анзы «Саяныға» харығ полбиндыр. Алындағы утырысха ӧкпелен парып, хоккеисттерібіс стадионда прай кӱстерін салып ойнааннар. 5-ҷі минутада санны асхан Николай Иванов. «Ыырҷы» чарым час пазынаң нандыр пирген. Пастағы тайм 1:2 саннаң тоозылды. «Родина» клуб алнында. Оолларыбыс чідірінмееннер. Ікінҷі чардығында Денис Соловьёв 12 метрдең «ыырҷының» хаалхазынзар меспекті кире сабыcхан. 63-ҷі минутада сан 3:2 пол парды. Ӱзінҷі голның «авторы» – Денис Петров. Че ӧрінізібіс ӱр полбаан. «Родина» санны тиңнестірібіcкен. Чиңіс хайди даа кирек. 82-ҷі минутада Олег Селивёрсткин тӧртінҷі голны «ыырҷының» хаалхазынзар кире сабысты. Сан – 4:3. Чоохтирға кирек, матч тоозылғанҷа пуста харбазығ парған. Пістің ооллар, утып аларға пӧгініп, сайбағлар кӧп иттірлер. Халғанҷы алты минута аразына ӱс кізі ойыннаң cығардырған. Че хаалха хуруғ тур халған.
Кибір хоостыра Россия чемпионадында матч соонда пресс-конференция иртче. «Саянының» ӧӧн тренері Евгений Ерахтин ачых-чарых кӧңніліг полған. Ол команданы паза кӧрігҷілерні пастағы тоғынып алған саннарнаң алғыстаан. Алында Евгений Владимирович, сағыстарынаң ӱлезіп, теен:
– «Саяны» ӧменің «Енисей» алай «СКА-Нефтяник» клубтарнаң ойнир кӱзі читпес, че пасхазына маң пирбеспіс.
Халғанҷы ікі тоғазығ тренернің cӧстерін киречіледі. Амды прайзының сағызы 25 ноябрьда иртер ибдегі матчта. Ол 19.00 часта полар. Кізілерні ойыннарға билеттерҷе кирерлер. Пір билет 100 салковай турча, прай ойыннарға абонемент – 1000 салковай. Оларны садызып аларға чарир пу адресче: Ағбан г., Гагарин ор., 50 А тура, «Саяны» спортшкола. Телефон: 20-24-15. Хакасиядағы команда «Старт» ӧменең (Нижний Новгород) тоғазар. Киліңер хоккеисттерібіс ӱчӱн «ағырарға».
Сом «Саяны» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
