Хайди ойнапча «Саяны» команда?
17.11.2023
Хабарлар
«Саяны» команда «Енисей» клубнаң ойнапчатхан туста
Спорт. 6 ноябрьдаң меспектіг хоккейҷе Россияның чемпионады парча
Меспектіг хоккейге хынчатхан улустың маң чох тус пасталыбысты. «Саяны» команда Суперлигада ойнапча нооза. Артыхтарның артығының санынзар 14 клуб кірче: «СКА-Нефтяник» (Хабаровск), «Кузбасс» (Кемеров), «Динамо» (Москва), «Ак Барс-Динамо» (Казань), «Старт» (Нижний Новгород), «Водник» (Архангельск), «Волга» (Ульяновск), «Мурман» (Мурманск), «Родина» (Киров), «Енисей» (Хызылчар), «Сибсельмаш» (Новосибирск), «Байкал-Энергия» (Иркутск) паза «СКА-Уральский Трубник» (Первоуральск). Марығ оңдайларынҷа прай командалар удур-тӧдір ойнирлар. Пір ойын ибде иртче, ікінҷізі – «ыырҷының» чазызында. 29 февральға теере чемпионаттың пастағы чардығы иртер. 8 иң кӱстіг ӧме плей-оффха сығар. Олар медальлар ӱчӱн харбазарлар.
«Саяны» командадаңар чоохтаза, пӱӱнгі кӱнде хоккеисттерібіс тӧрт тоғазығ иртірібізерге маңнанғаннар. 6 ноябрьда пістің ооллар «Байкал-Энергия» клубнаң ойнааннар. Сан – 4:7. Салтарлар кӧрігҷілерні ӧріндіргеннер. Ноғадаңар? Августта Россияның кубогы ирткенде, Хакасиядағы ӧме иркутсктағыларға 0:7 саннаң унада саптырыбысхан. Амды чир-cуғҷыларыбыс удурланғаннар. Голларның «авторлары» – Руслан Гавричков, Михаил Селедков паза Никита Терёхин. Терёхин «ыырҷының» хаалхазынзар ікі меспек кире сабысхан. 9 ноябрьда «СКА-Нефтяник» команданаң ойын ирткен. Ол уғаа кӱстіг ӧме. Хабаровсктағылар Россия чемпионадында пис хати чиңіс тутханнар. Халғанҷызын алтын медальны олар пӱӱл часхызын утханнар. Тоғазығ 0:8 саннаң тоозылған.
12 ноябрьда оолларыбыс хызылчардағыларнаң тоғасханнар. «Саянының» ӧӧн тренері Евгений Ерахтин матчтаңар хысхаҷахти теен: «Пӱӱн пуста пір ле команда ойнады. Аның ады «Енисей». Сизінгенде, 14:4 cан орындағы хабарҷыларны даа ӱрӱктіртір. «Ағырчатхан» улус «Саяныға» хабазарға кӱстенген. Прай ойыннар кӧні эфирде кӧзіділчелер. Кізілер, спортсменнернің кӧңнін кӧдіріп, пасханнар: «Саяны», піс синнең хадабыс!», «Піс сірерге киртінчебіc», «Чиңіc полар», «Ооллар, хомзынмаңар, пу пастағы ла ойыннар». Кӧрігҷілернең чаразарға кирек. «Енисейнің» хаалхазы хуруғ халған полза, хомзынарҷыхпыс. Голларнаң ӧріндіргеннер Олег Селивёрсткин, Сергей Дёмин паза Чингис Хандамаев. Хандамаев – пӱрӱт чонның оолғы. 21 частығ спортсмен Хабаровсктаң. 2020 чылда ол, Россияның піріктірілген командазында ойнап, 19 часха читкелек хоккеисттернің аразында ирткен тилекей чемпионадында чиңіc тутхан. Спортсмен «СКА-Нефтяник», «Кировец» клубтарда ойнирға маңнантыр. Позырахта «Енисейнің» хаалхазынзар ол ікі меспек кире сабысхан.
Чоохтирға кирек, «Енисей» – «Саяны» матч тузында ағбандағыларның поғдархаҷаң сылтағ полғанох. Тоғазығ тузында пӧзік узынаң Илья Лопатин прайзын аптаан. Хоккеист позының адына пис гол пас салған. Чиит кізі Ағбаннаң. Мындох улуғ спортсар пастағы хаалағлар иткен. Амғы туста Лопатин «Енисейнің» иң чахсы ойынҷыларының санына кірче.
15 ноябрьда «Саяны» Кемеровсар марыға чӧрген. Ойынны кӧргенде, пістіңнер пастап алаң ас парғаннар, таң. Кемеровтағылар соон сӱрістіре «Саяныға» 8 меспек кире сабысханнар. 43-ҷі минутада ла Михаил Лисюк нандыр пирген. Ікінҷі таймда оолларыбысха кӱс хозыл парған одыр. Михаил Селедков, Руслан Гавричков паза Денис Соловьёв ӱс меспек кире сабысханнар. Хысхаҷахти чоохтаза, хакасиядағылар «Кузбассха» 4:13 саннаң утыр салғаннар. Ізенчебіс, «Саянының» прай чиңістері алнында.
«Саянының» пастағы ибдегі матчы 25 ноябрьда 19 часта иртер. Ойын алнында пайрамнығ чардых полар. Кізілерні марыға билеттерҷе кирерлер. Пір билет 100 салковайға турча, прай ойыннарға абонемент – 1000 салковай. Оларны садызып аларға чарир пу адресче: Ағбан г., Гагарин ор., 50 А тура, «Саяны» спортшкола. Телефон: 20-24-15. Школа тоғынча 9.00 частаң 18.00 часха теере, тынағ тус – 13.00 частаң 14.00 часха. 25 ноябрьда Хакасиядағы ӧме «Старт» команданаң (Нижний Новгород) ойнир. Киліңер хоккеисттерге хабазарға.
Сом «Саяны» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
