Чарғаа пирбин иділче
17.11.2023
Хабарлар
Закондағы алызығлар. Чуртағҷыларны чарғаа пирбин иділчеткен банкротстводаңар законзар алызығлар кирілген
Россия президенті Владимир Путиннің чахиинаң пу наада «О несостоятельности (банкротство)» Федеральнай законзар, хайзы 26 октябрьда 2002 чылда алылған, алызығлар кирілген. Олар 2023 чылның 3 ноябрьынаң кӱзіне киріл сыхханнар. Алызығлар пу законның кізілерні чарғаа пирбин иділчеткен банкротстводаңар чардығына теелчелер.
Амды чарғаа пирбин тикке иділчеткен банкротствонаң ідӧк тузалан поларлар: пенсионерлер, кічіг палазына ай сай пирілчеткен пособиені алчатхан кізілер, ідӧк алымын толдырығ производство пічии хоостыра ӱр тус тӧлен полбинчатхан чуртағҷылар.
Андағ наа оңдайнаң 25 муң салковай алай аннаң даа улуғ алымнығ кізілер тузалан поларлар, ол санда 1 млн салковайға теере ӧдістіглер. Че оларға халғанҷы пис чыл банкрот полбаан ползалар ла пу оңдайнаң тузаланарға чарир. Чарғаа пирбин иділчеткен банкротство ӱчӱн пошлина тӧлирге киректелбинче. Андағ банкротство полызиинаң кізі алымнарынаң алты ай аразына позыдыл парча. Ідӧк юристтер, арбитражнай управляющайлар паза ахчаа полысчатхан пасха даа специалисттер киректелбинче. Ол процедура кӱзінде ӱс чыл полча. Сағам пістің хазнада аннаң 16 муң кізі тузаланарға маңнанған, олар тиксі 5,4 млрд салковай алымнаң позыдылғаннар.
Мындағ банкротство полызиинаң пенсионер дее ӧдістерінең позыдылар. Че аның ӧӧн парызына пенсия ахчазы ла саналчатса, ідӧк алымынҷа толдырығ производство пічии пиріл парғаннаң пеер пір чыл азыра ирт парған полза, аны хоостыра чарадығ толдырылбаан алай чардыхти толдырылған полза, ис-пайы чоғыл тіп санал парза, банкротство иділер.
Паза закондағы наа алызығлар кічіг палалығ улусха теелче. Алымын чох идерге полызарлар: кізінің ӧӧн парызына пала пособиезі ле саналчатса, ӧдізінҷе толдырығ производство пічии пирілгеннең пеер пір чыл азыра ирт парып, ол толдырылбаан алай чардыхти ла толдырылған полза паза ис-пайы чох полза.
Ідӧк ол алызығлар тузалығ полар ӧдістерін ӱр тус тӧлен полбинчатхан улусха. Алымы ӱчӱн ис-пайы полызиинаң санасчаң оңдай чох полған сылтаанда толдырығ кирее тохтадылза паза андағ наа кирек азылбаан полза, кізее ӧдізінең позып аларға чарир. Ӧдізін тӧлеттірердеңер пічік читі чыл алай аннаң даа кӧп чыл мының алнында пиріл парған чуртағҷыларға оң полар.
Хайдағ алымнар пар полза, кізее банкротха саналарға чарир? Тиксі ӧдізі 25 муң – 1 млн салковай полза. Ол санда – займҷа паза кредитче (кредит проценттері прай хада саналча), поручительство чӧптезиинҷе, налогтарҷа паза бюджетсер иділчеткен пасха даа тӧлеглерҷе, алименттерҷе алымнары. Че тӧлег тузында иділбинчеткен ӱчӱн штрафтар, пенялар, проценттер cанға алылбинча.
Мындағ банкротство пастыра кізі хайдағ алымнардаң хыйыс полбас? Банкротха саналардаңар сурыныс пічиинде кӧзіт салбаан алымнардаң ос полбас. Банкротство иділчеткен туста пасха алымға кір парза, кізее аннаң позып аларға полыспастар. Піреезінің чуртазына алай хазиина ӱрег иткен ӱчӱн ӧдізінең хыйыс полбас. Чал ахчазын алай тоғыстаң сығарыбысхан ӱчӱн пособие тӧлелбинчетсе, ідӧк алименттер тӧлебинчетсе паза кредиторнаң палғалыстығ пасха алымнарын айландырбинчатса.
Банкротха саналардаңар сурыныс пічиинең айланарға кирек кӧп полызығ пирчеткен кінзер (МФЦ). Ағаа хоза, справкалар паза кредиторларның списогын пирерге киректелер. Пенсионерлерге: пенсия ахчазын алчатханнаңар пічік (Социальнай фондта алай пенсия тӧлепчеткен учреждениеде алып аларға); толдырығ производство пічии пір чыл азыра мының алнында пирілгенін киречілепчеткен справка (Россия почтазында алай банкта, алай тоғыста алып аларға). Палалығ чуртағҷыларға: ай сай тӧлелчеткен пособие алчатханнаңар справка; толдырығ производство пічии пір чыл азыра мының алнында пирілгенін киречілепчеткен справка.
Автор :
Тимнеен Инора Боргоякова
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
