Бюджетче тоғыс пасталыбысты
03.11.2023
Хабарлар
Ӧӧркі Чӧп. Киҷее Хакасияның Ӧӧркі Чӧп президиумы теестегі чыылиин иртірген
Аны Ӧӧркі Чӧп кнезінің пастағы орынҷызы Пётр Воронин апарған.
Пастап Хакасияның хайди даа итчең имнег страхованиезі чыындызының (ТФОМС) 2023 чылға бюджедінеңер законзар алызығлар кирердеңер закон проекті паза пуох чыындының 2024 чылға бюджедінеңер закон проекті ӱзӱрілген.
ТФОМС директоры Любовь Бурнакованың искіриинең, чыындының пу чылға бюджедінзер алызығлар парыстар паза хорадығлар хызырылчатханы хоостыра кирілчелер. Пасха субъекттернің ТФОМС-тары бюджеттерінең (пасха субъекттернің чуртағҷыларын имнеені ӱчӱн) кірер тіп кӧрілген ахчадаң 8,3 миллион салковайға ас кірген, налогтығ нимес пасха парыстар сахталған синнең 13 миллион салковайға ас пол парған.
Парыстар тӱсчеткенде, хорадығларны ідӧк хызырарға кирек. Аннаңар пасха субъекттер чуртағҷыларын имнееніне хорадығлар олох 8,3 миллион салковайға хызырылған. Имнег тоғынҷыларына хоза ӱгредіге, имнег учреждениелеріне имнег оборудованиезін аларына паза тыхтирына кӧрілген ахча сині ідӧк 13 миллион салковайға хызырылча.
ТФОМС-тың килер 2024 чылға бюджедін алза, аның мындағ саннар:
парыстар – 14 миллиард 151,5 миллион салковай;
хорадығлар – 14 миллиард 168,6 миллион салковай;
дефицит – 17,1 миллион салковай.
ТФОМС-тың пазағы чылға бюджедінің парыстары пу чылдағызынаң 1 миллиард 809 миллион салковайға (14%-ке) кӧп полар тіп сахталча.
Паза комитет-комиссияларның устағҷылары «Хакас Республиканың 2024 чылға паза пландағы 2025-2026 чылларға республика бюджедінеңер» закон проектін ӱзӱрібіскеннер.
Хакасия правительствозы кирген закон проектінең республиканың финанстар министрі тоғызын толдырчатхан Игорь Тугужеков таныстырған. 2024 чылға бюджеттің саннары мындағ:
парыстар – 52 миллиард 8 миллион салковай;
хорадығлар – 56 миллиард 203 миллион салковай;
дефицит – 4 миллиард 195 миллион салковай (10%).
Республиканың пос парыстары ӧӧнінде тӧрт налог кӧрімінең тӧстелче. Иң килкімі – парысха налог. Ол пос парыстарының 49%-іне тиңнелчеттір. 2024 чылда пу парыс кӧрімінҷе республика бюджедінзер 20 миллиард 683 миллион салковай кірер тіп сахталча.
Ікінҷі налог кӧрімі – НДФЛ. Чуртағҷылар кӧні тӧлепчеткен налогча бюджетсер 8 миллиард 971 миллион салковай кірер тіп кӧрілче.
Ӱзінҷі налог кӧрімі – акцизтер. Ол бюджетке 4 миллиард 998 миллион салковай парыс ағылар осхас.
Тӧртінҷі налог кӧрімі – организацияларның ис-пайына налог. Пу налогча республика бюджедінзер 2 миллиард 812 миллион салковай кірерін сағыпчалар.
Ідӧк пасха налог кӧрімнерінҷе бюджетсер тиксі 909 миллион салковай кірер тіп кӧрілче.
Паза пістің бюджет федеральнай бюджеттең кірер ахчадаң тӧстелче. Сағам 2024 чылда федеральнай бюджеттең 5 миллиард 391 миллион салковай кірер тіп сахталча. Нинҷе, тізең, пирілері Россияның Хазна Думазы федеральнай бюджеттеңер законны ікінҷі хығырығда алыбысса ла пілдістіг пол парар.
Пётр Воронин бюджет кибірли социальнай кӧстегліг полчатханын таныхтаан. Аның хорадығларының ӧӧн чардығы чал ахчазын тӧлиріне, ӱгредіге, культураа, социальнай политикаа паза хазых хайраллирына парар.
Бюджетче комитеттің кнезі Валерий Марковтың искіриинең, аның комитеді, закон проектін чыылығда ӱзӱріп, ол прай кирексіністерге нандырча тіп чарадығ алған. Аны хоостыра комитет закон проектін кирілген тіп санирға чӧпнең сыххан.
Пу оңдайнаң республика бюджедінҷе тоғыс пасталыбысты тиирге чарир – бюджеттеңер закон проекті Ӧӧркі Чӧпсер кирілген. Закон проекті чарыхха сығарылған соонаң Ӧӧркі Чӧпте бюджетче азых ӱзӱріглер иртер. Анаң, искірілген чӧптерні санға алып, бюджетті Ӧӧркі Чӧп депутаттарының ӱзӱриине сығарарлар. Салтарында саннар ікінҷілес чох алыс парар. Че сағам бюджет мындағ.
Сом Хакасияның Ӧӧркі Чӧбі сайтынаң
Автор :
Альберт Толмашов
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
