Ӱгретчіңнеңер алай ӱгредіг кӧcтегҷіңнеңер пас!
01.11.2023
Хабарлар
Марығ. «Хакас чирі» республика газетазы хығырығҷылар аразында «Минің ӱгретчім паза минің ӱгредіг кӧстегҷім» марығ чарлапча. Ол Ӱгретчі паза ӱгредіг кӧcтегҷізі чылына чарыдылча
Марығда ӱс номинация кӧріл парған: «Ӱгренҷінің иң артых тоғызы» (школа ӱгренҷілері аразында), «Студенттің иң артых тоғызы» (ортын паза пӧзік ӱгредіг учреждениелерiнің ӱгренҷілері паза студенттері аразында) паза «Улуғларның иң артых тоғызы» (18 частаң улуғ хығырығҷылар аразында).
Пастағы ікі номинация араласчылары, ӱгренҷілер паза студенттер, чайаачы тоғыстарын 2023 чылның улуғ хырлас айының 18-ҷі кӱніне теере ызарға киректер, ӱзінҷі номинацияның араласчылары – 2024 чылның кӱрген айының 31-ҷі кӱніне теере. Почта штампы турғызылған кӱн санға алылар. Кӧрілген тустаң орай кірген тоғыстар марыға алылбас. Чайаачы тоғыстар марығның темазына килістіре, хоос оңдайларға пай, араласчының чазының синінҷе пазыларға кирек, тоғыстарның тиксі пазылған оңдайына паалағ турғызыларох. Чарғыҷылар тоғыстарны пу кӧзідіглерҷе 0 – 5 паалағнаң паалирлар. Іди полған на номинацияда чиңісчі паза сыйыхтығ орыннарға турысханнар табылар, иң артых тоғыстар «Хакас чирі» газетада сығарылар.
2023 чылның улуғ хырлас айының 29-ҷы кӱніне теере «Ӱгренҷінің иң артых тоғызы» паза «Студенттің иң артых тоғызы» номинацияларның салтарлары иділер, 2024 чылның азығ айының 15-ҷі кӱніне теере – «Улуғларның иң артых тоғызы» номинацияның. Чиңісчілерге паза сыйыхтығ орынға турысханнарға дипломнар паза сыйыхтар тимнелген.
Чайаачы тоғыстарға кирексіністер:
1. Чайаачы тоғыс «Минің ӱгретчім паза минің ӱгредіг кӧстегҷім» темаа чарыдылзын;
2. Тоғыс хакас тілінең пазылзын;
3. Чайаачы тоғыс Microsoft Word кӧрімде Khakas клавиатуразында 12 кегльде пазылзын паза чоллар аразы 1,5 ползын. Текстті Timеs Nеw Roman Hak шрифтнең пазарға чарир. Ідӧк холнаң пасхан тоғыстар алылча;
4. Чайаачы тоғысха хоза сомнар паза хоостар пирерге чарир;
5. Авторлар, марығ оңдайларынаң танызып паза аннаң чаразып, марығда пос алынҷа паза пос кӧңнінең араласчалар;
6. Чайаачы тоғысха хоза автор позының ады-солазын толдыразынаң, ӱгредіг алай тоғыс орнын, палғалызар оңдайны (мобильнай телефон номерін) искірче.
Тоғыстарны «Марыға» танығлығ ызарға: «Хакас чирі» газета редакциязының электроннай почта адрезіне: stranahabar@mail.ru паза Россия Почтазынҷа «Хакас чирi» газета редакциязының адрезіне: 655017, РХ, Ағбан г., Щетинкин ор., 34; ідӧк редакция адрезінҷе 15-ҷі кабинетсер ағыларға чарир.
Аарлығ хығырығҷылар, чайаачы тоғыстарыңны сағыпчабыс!
Автор :
«Хакас чирі» газета редакциязы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
