Чир-суғҷыларыбысха полыс тураалар
01.11.2023
Хабарлар
Надежда Узунова Донбасс арачылығҷыларынаң хада
Хабазығ. Ирткен неделяда Асхыс аймаа пазы Абрек Челтыгмашев Хакасиядағы Ада чир-суубыс чааҷылары сӧбірелерінің комитет (КСВО) устағҷызы Надежда Узунованаң тоғасхан. Пу мероприятиеде ідӧк аймахтың муниципалитеттер пастары араласханнар
Надежда Узунова уғаа кирек тоғыс толдырча, ол Украинада иртчеткен ӧнетін чаа операциязы араласчыларына гуманитарнай полызығ, чыып, апарча. Пістің чааҷыларыбысха чир-суубыстаң хабазығ тың киректелче. Полызығ алып, олар сағыста ибде пол килчелер нооза. Анзы, тізең, прай сидіксіністерні тобырарға хабасча.
Надежда Александровна Узунова ӧнетін чаа операциязы араласчыларына гуманитарнай полызығ чыырында ӧткін араласчатхан ӱчӱн Асхыс аймаа чуртағҷыларына улуғ алғызын читірген. Чооғы тузында региондағы КСВО устағҷызы видео кизегін кӧзіт пирген, анда гуманитарнай полызығ чир-суубыс арачылағҷыларына хайди читірілчеткеннеңер чоохталча. Иң кирек нимелердең пасха, олар чаа оборудованиезін паза арачыланҷаң ниме-нооларны алчалар. Паза чааҷыларға республикадағы школалар ӱгренҷілерінің пічіктері читірілче. Донбассар пір чорых тузында хайхастығ кирек пол парған – пір чааҷаа палазының пічии читкен.
Арачылағҷыларыбыс ибдең полызығны тың сахтапчалар. Таныхтирға кирек, Асхыс аймаанаң ызылған автомобиль чаалазығ парчатхан орынзар читкен. Донбасс арачылағҷыларына ол улуғ туза полған. Чооғын тоозып, Надежда Александровна Абрек Васильевичке снарядтаң иділген роза чахайахты сыйлап пирген. Аны хоосчы Виктор Михалев чайап салған.
– Донецк – миллионнар роза городы. Виктор Михалев чуртас иң аарлығ ниме тіп санапча. Чара чачырастарға чох иділген полған на чахайах хайди даа ӧзіп алар. Чааҷыларыбыс чиңіс тударына ізенчебіс, оларға полызығ уғаа кирек. Пу роза амыр чуртас тании пол парғанына киртінчем. Ол сірерде хайраллалзын, – теен Н.А.Узунова.
Позының тоғызын Надежда Узунова 2017 чылда пастаан. Андада ол Донбасста палығлатхан палаларны чаалапчатхан орыннардаң сығарарында араласхан. Аның алнында анда іди хорғыстығ полчатханын пілбеен. Ол киректер аның сағызында саңайға халған.
– Пір городты иртібізіп, нандыра парчатханда, хумнаң ойнаҷаң орында улуғ воронка ла халғанын кӧргебіс, – чарытхан комитет устағҷызы. – Анзын кӧрерге уғаа аар полған, аннаңар мин полызарбын тіп чаратхам. Мобилизация пасталғанда, піс полған на ӱдезігде араласхабыс. Полған на чааҷаа прай кирек ниме-ноо суғылған рюкзактар читіргебіс.
Аның соонаң Хакасиядағы КСВО кізілері мобилизованнай чир-суғҷыларыбысха полызығны Омсксар читіргеннер. Андар олар неделя сай чӧргеннер. Комитет кізілері чааҷыларыбысха андох кирек пічіктерні тимнирге полысханнар. Тӱрче полғанда, олар чаалазығ парчатхан орынзар сығып пастааннар, аймах городтарҷа чӧріп, чааҷыларнаң хада блиндажтарда паза окоптарда чуртааннар. Надежда Узунова пір сағыстығ арғыстарынаң хада Артемовскта пол килген. Андада чааҷыларыбыс ол городты ыырҷы холынаң позытчатханнар. Ідӧк олар Попасная паза пасха даа городтарзар сыхханнар, госпитальларда имненчеткен чааҷыларға кирек пічіктерні тимнирге, сағба чох чіт парғаннарны тілирге полысханнар. Комитеттің Луганск городтағы кізілері чааҷыларыбыс передовойда хайди полчатханнарын чахсы пілчелер. Пірее город ыырҷы холынаң позыдыл парза, орында тілег тоғыстары тӧстелче.
Таныхтирға кирек, региондағы комитет кізілері пазох чорыхха сығарға тимненчелер. Кічіг хырлас айының халғанҷы кӱннерінде гуманитарнай полызығны Донбассар апарарлар. Хакасиядағы КСВО араласчылары чуртағҷылардаң полызығны чыырында ӧткін аралазарға сурынчалар. Соох кӱннер турыбысханда, чааҷыларыбысха чылығ, істінзер кисчең кип-азах паза носки-мелейлер, пасха даа нимелер киректелче.
– Халғанҷы туста піс тиріглерге хоза оборудование ал чӧрерге пастабысхабыс. Чааҷыларға глушительлер паза арачыланҷаң ниме-ноо киректелче, – чоохтапча Надежда Узунова. – Ӱр ниместе піс уғаа аарлығ приборны – «Фронт харағы» – алып алғабыс. Ағаа комитеттің республикадағы прай аймахтарындағы пӧліктері ахча чығаннар. Ол прибор 10 километрге теере ырах кӧрерге оңдай пирче, артиллерияа корректировка идерге чахсы хабасча. Піс мындағ полызығлар пирерге кӱстенчебіс.
Республикадағы комитет кізілері, орынзар читселер, чааҷыларыбысха ибдегі осхас оңдайлар тӧстебізерге кӱстенчелер. Аның ӱчӱн командирлердең чааҷыларны позыдыбызарға сурынчалар. Андағ оңдай чох полза, гуманитарнай полызығ чаалазығ орнынзар парча. Аны Хакасиядаң парған чааҷылар сахтапчалар.
– Пістің республикадаң мобилизация хоостыра хығыртылғаннарны таап алар пӧгіннең, чааҷыларнаң хакас тілінең изеннесчебіс. Олар піске ідӧк нандырчалар, гуманитарнай полызығ ӧнетін оларзар килгеніне уғаа ӧрінчелер, – чооғын узаратча Надежда Александровна. – Передовойда пір кирек пол парған. Хакасиядаң мобилизация хоостыра хығыртылған чааҷы контрактниктерзер кір парған. Піс аннаң тоғазарға килгенібіске ол тың ӧрін парған.
Гуманитарнай полызығны апарчадып, комитет кізілері ыырҷы атыстарына кір парчалар. Че «Арадан» паза «Буйба» солалығ чааҷыларыбыс полызиинаң олар кирек орынзар читчелер.
Чооғын тоозып, Надежда Узунова чуртағҷылардаң гуманитарнай полызығны чыырында ӧткін аралазарға сурынған. Иң кирек ниме-ноодаң пасха, чаалазығ парчатхан орыннарда таарлағларны паза палығлатхан чааҷыларны тартар техника тың кирек. Хайди таныхтапча Надежда Александровна, носки алар орнына, ахча хозызып, пір бронежилет садызып алза, тузалығ ла поларҷых.
Кічіг хырлас айының 5-ҷі кӱнінде Асхыстағы РЦКД-да полызығлығ концерт иртер. Анда чыыл парған ахча Асхыс аймаанаң хығыртылған чааҷыларға полызыға парар.
Сом Н.Узунованың архивінең
Автор :
Антон Чертыков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
