Медальлар аймағы харах ойнатхан
18.10.2023
Хабарлар

Геннадий Штыгашев Хакасияа алтын медаль ағылған
Спорт. Кӱресчілер Олимп призёры С.З.Карамчаковтың хумартхызына чарыдылған тиксі Россия мариинда устарын кӧзіткеннер
Ӧӧн марығларның пірcі
Пӱӱлгі марығны ікі сӧснең таныхтирға чарир: ӧрініс паза поғдархас. Пістің оол-хыстар 12 медаль утханнар. Олардаң пис алтын, ікі кӱмӱс паза пис хола. Кӧрігҷілер полған на спортсмен ӱчӱн ӱннері харылғанҷа «ағырғаннар». Хакасияда Карамчаковтың турнирі ӧӧн марығлар санына кірче. Анда чиңіс тутханы спортсменге улуғ чидіг полча. Ол Олимп ойыннарының хола призёры Сергей Карамчаковтың хумартхызына чарыдылған нооза.
2023 чылда арға-мӧрійге чон хомай нимес чыылысты. Марығда 7 регионның – Хызылчар крайының, Иркутск, Кемеров паза Новосибирск областьтарының, Хакасияның, Бурятияның паза Туваның – кӱресчілері араласханнар. Тиксі алза, 204 кізі: 53 хыс паза 151 оол. Хакасия ӱчӱн 41 кӱресчі турысхан. Турнирні 14 октябрьда пайрамни асханнар. Пастап чыылған чонны Сергей Захаровичтің чуртас чолынаң хысхаҷахти таныстырғаннар. Анаң пайрам улуғ нимес концертнең узарадылған. Кӧрігҷілерні чайаачыларынаң ӧріндіргеннер «АРТ», «Империя», «Skill Fly» теелбек ӧмелері паза «Архай» хай школа-студиязы. Режиссер Юлия Дикихті махтирға кирек. Аның кӱстенізінең концерт оңдайынаң ойынға тӧӧй полған. Соонаң хозылғаннар Хакасияның чон артизі Артур Марлужоков паза «Каданс» хор. Олар, Россияның паза Хакасияның гимннерін толдырып, спортсменнернің паза тренерлернің чӱрее-паарын хайылдырғаннар.
Марығны пайрамни азарында араласханнар Хакасия пазы Валентин Коновалов, Ӧӧркі Чӧп кнезі Cергей Сокол. Аарлығ аалҷылар санында полған Россияның саналығ чӱгӱрерінҷе федерациязының президенті, ӱс хати Олимп чемпионы Елена Вяльбе. Валентин Коновалов, чыылған чоннаң хакас тілінең изеннезіп, теен:
– Кӱрес республикада иң хынчатхан спорт кӧрімі полча. Амғы турнир илбек кӱресчі Сергей Карамчаковтың хумартхызына чарыдылған. Спортсменнер, кибіске сығып, кӱстерін не нимес, хыйғаларын, пик хылыхтарын кӧзітчелер. Артығының артығы чиңіc тутсын.
Ідӧк чылығ сӧстер читіргеннер Сергей Соколнаң Елена Вяльбе. Пайрам тузында сыйыхтас ирткен. Тӱзімніг тоғыстары ӱчӱн Хакасия пазының алғыстас пічіктерінең саблығ тренерлер Александр Худяковнаң Анатолий Султрековты таныхтааннар. Чоннар аразындағы класстығ спорт узы Наталья Малышеваа паза аның тренері Владимир Чучуновха хол часызын сыйлааннар. Наталья пӱӱл сентябрьда тилекей чемпионадында кӱзін сынаан. Чир-суғҷыбысха олимп лицензиязын утып аларға кӧмес ле читпиндір. Анастасия Харитоноваа «Россияның саблығ спорт узы» киречілепчеткен танығ читірілген. Ол хурлығ кӱресче чоннар аразындағы турнирлердең медальлар чох айланминча. Хакас спортсменнер Наталья Пудованаң Дмитрий Штыгашев «Россияның спорт узы» аарластығ атты киречілепчеткен танығны алғаннар.

Чахсы тренерлерге паза спортсменнерге сыйыхтар читірілген туста
Айдас ооллар
Кӱресчілер ікі кӱн харбасханнар. Чечіме кӱнде таллағ ирткен, позырахта – финаллар. Хакасиядаң Роман Астанаев (61 кг), Геннадий Штыгашев (65 кг) паза Семён Терещенко (79 кг) азах меетте араласханнар. Пӧзік устығ Терещенко чиңіс тудар тіп пірдеезі ікінҷілебеен. Кӱресчі Сорығдаң, аның пастағы тренері – Иван Семёнович Шулбаев. Халғанҷы чылларда Семён Хызылчар крайы паза Хакасия ӱчӱн турысча. Штыгашевтің паза Астанаевтің ӱчӱн чон сынап матап чӱрексеен. Ікізі дее армияда служба ирткен. Роман пылтыр декабрьда армиядаң айлантыр, Геннадий пӱӱл чайғызын. Пір чыл харбаспаан спортсменнерге кибісте хатығ чуххан. Кӧзідімге, Штыгашев тоғазығның пастағы чардығын 6:1 саннаң тоос салған. Хысхаҷах тус аразына сан 6:5 пол парған. Салтарында ол 11:10 саннаң чиңіс тутхан. Чиит кізі теен:
– Пӱӱл мағаа най сидік полды, че алтын медаль уттым. Позым Мадыр аалдаңмын. Юрий Никитич Кусургашевтің холында харбазарға пастаам. Амғы тренерім – Денис Олегович Карамчаков. Аалдағы школада физкультура ӱгретчізі полып істенчем, ағаа хоза олаңай кӱресче секцияны апарчам. Аалда харбасчаң кізі чоғыл, аннаңар марыға тимненерге оой нимес. Пу турнирде 2021 чылда ікінҷі орынға сыххам. Чиңіске прай чӱреемнең ӧрінчем.
Геннадийнің арғызы Роман Астанаев 3:2 саннаң утып алған. Ол ідӧк Мадырдаң полтыр. Нанҷылар 2022 чылда Ағбандағы Олимп резерві училищезін (техникумны) тоосханнар, пӱӱл ХГУ-зар заочно ӱгренерге кірібіскеннер.
Ооллардаң ӱзінҷі орынға сыхханнар Виталий Канзычаков (74 кг), Михаил Болганов (86 кг) паза Тимур Чепчигашев (92 кг).
Абахай хыстар
Илееде чыл Карамчаковтың турнирінде ооллар ла кӱстерін сынаҷаңнар. 2021 чылда марыға абахай спортсменнер хозылғаннар. Хакасия ӱчӱн пӱӱл 11 кізі турысхан. Финалда харбасханнар Анжелика Фёдорова, Алина Сагалакова, Наталья Пудова паза Алина Дударева. Пістің хыстар аар паспинчалар. Турнирде пастағы пис кӧдірімде 2-3 хыс харбасхан полза, пасха кӧдірімнерде кізі чох полған. Андағ оңдайнаң азах меетте чир-суғҷыларыбыс Анжелика Фёдорованаң Алина Сагалакова тоғасханнар. Ікізі дее 50 кг кӧдірімніг. Фёдорованың опыды улуғ. Мадыр аалдаң сыххан спортсмен 2017 чылда Европа первенствозында кӱмӱс медаль утхан, Россия чемпионаттарында (2021, 2022 чыллар) хола призер полыбысхан. Пӱӱнгі кӱнде ол Хакасия паза Кемеров облазы ӱчӱн турысча. Алина Сагалакова 2004 чылдаң, ол спорт узына кандидат. Хыстар ипчілер кӱрезінде Хакасияа пастағы медальлар ағылғаннар.
53 кг кӧдірімде Наталья Пудова чиңіc тутхан. Алина Дудареваны махтабызарға кирек. Ол финалда чоннар аразындағы класстығ спорт узы, Олимпиаданың араласчызы Ольга Хорошавцеванаң (Хызылчар) тоғасхан нооза. Хола медальлар республика командазына Ольга Абрамованаң (55 кг) Карина Барашкова (57 кг) ағылғаннар.
Пӱӱл марығның араласчылары аразында пӧзік устығ спортсменнер кӧп полды. Алында Карамчаковтың турнирінде ӧӧнінде чииттер устарын кӧзітчеңнер. Хайди таныхтаан Россияның саблығ тренері Лидия Карамчакова (чир-суғҷыбыс Хызылчарда істенче. – Авт.), марығлар саны кӧп нимес. Спортсменнерге турнирлерде кӱстерін хайди даа сынирға кирек. Тренерлер Хызылчар крайынаң 17 кӱресчі хысты ағылғаннар, олардаң 4 кізі – Дарья Хвостова, Ольга Хорошавцева, Динара Кудаева, Алена Стародубцева – чоннар аразындағы класстығ спорт узы. Лидия Алексеевна чоохтаан:
– Пістің хазнадаң тоғыр кирілген хатығластар спортсменнерге кӧнізінең теелчелер. Ӱгренҷім Ханум Велиева 2021 чылда Олимп ойыннарында араласхан, пӱӱл Россия чемпионадында чиңіс тутхан. Че ағаа тилекей чемпионадында аралазарға чаратпааннар. Ол ЦСКА клубтың спортсменіне саналча. Аннаңар кӱресчілерге Россия істінде иртірілчеткен марығларда ла устарын таптирға килісче. Сидіксіністерге сыдазарға кирек. Секцияа кічіг пала кӧп алып алғам. Паба-іҷелер мағаа киртінчелер. Оларның алнында нандырығ тутчам. Тренерлерге дее, спортсменнерге дее пос салынарға чарабас. Карамчаковтың турнирінде ӱгренҷілерім Дарья Хвостованаң Кристина Шумова алтын медальлар холға киргеннер. Елизавета Дудаеваа узы читпеді, аның ікінҷі орын. Санапчам, пу чахсы марығ. Декабрьда хайди даа Чарковтың турниріне спортсменнерні ағыларбыс.
Марығның салтарларынзар айланза, турнирнің иң чахсы спортсменнеріне саналғаннар Роман Астанаев паза Наталья Пудова, иң чахсы тренерге – Денис Карамчаков.
Сомнар Александр Дубровинни, Альбина Чистогашевани
Автор :
Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде