Пастағы ӧме армияа парыбысхан
18.10.2023
Хабарлар

Армияа ызылчатхан призывниктер стройда турчалар
Чааҷы службазы. Республиканың чааҷы комиссариадында кӱскӱдегі хығыртығның призывниктерінің пастағы командазын чааҷы службазына ӱдезер пайрамнығ мероприятие ирткен
Пістің чиит оолларны армияа прай чоннаң ӱдезері хаҷаннаң кибірге кір парған. Ам даа кӱскӱдегі хығыртығның призывниктерін чааҷы службазына ызар тус чит килгенде, республиканың чааҷы комиссариадында илееде кізі чыылысхан. Полған на призывникті аның туған-чағыннары ӱдесче нооза. Пӱӱл кӱскӱде пу пастағы ӧме армияа ызылған.
Чааҷы комиссариадының плацында призывниктер стройға турыбысханнар. Военкомат пӧлиинің пастығы подполковник Евгений Волнов, «Равняйсь! Смирно!» команда пиріп, Хакасияның чааҷы комиссары, подполковник Николай Видяйкинге рапортнаң призывниктер, чааҷы службазына парарға тимненіп, стройға турғызылғаннаңар искірген.
Россияның паза Хакасияның гимннері толдырылған соонаң республиканың чааҷы комиссары призывниктерзер алғыстас сӧстерінең айланған:
– Пӱӱн сірернің уғаа танығлығ кӱн. Пастағызы – кӱскӱдегі хығыртығда сірерге пастағы командада армияа парарға ӱлӱс тӱскен. Ікінҷізі – сірер, чааҷы кип-азаан кизіп, амды стройда турып, Ада чир-суубыстың арачылағҷызы полыбысхазар. Аннаңар мин сірерні пір саңай ікі ӱлӱкӱннең алғыстапчам, пӱӱн піс сірерні пайрамни армияа ӱдесчебіс. Чааҷы частьынзар парып, анда сірер чахсы тимненіс иртерзер, чааҷы специальнозын аларзар, сын ирен пол парып, ибзер айланарзар. Піліңер, ибде сірерні паба-іҷеңер, туған-чағыннарың сағыпчалар, чааҷы службазын турыстыра иртерге алғапчам!
Пайрамнығ митингте ідӧк чоох тутханнар Хакасия правительствозының мобилизация тоғызынҷа устааның пастығы Виктор Бармин паза Ағбандағы епархияның абызы Артемий. Олар ідӧк призывниктерге чааҷы службазын турыстыра иртерге, Чир-суубыстың ізестіг арачылағҷызы полыбызарға алғастар читіргеннер. «Чолыңар азых ползын!» – алғааннар олар.
Хайди чоохтаан чааҷы комиссариадының хығыртығ апарчатхан пӧлиинің пастығы Елена Палецкая, призывниктернің пу пастағы ӧмезі чааҷы службазын Ыраххы Востоктағы чаа округында иртер. Олар сухопутнай войсколарда паза тимір чол войсколарында чааҷы службазын апарарлар. Амды иирде олар поездтіг чолға сығарлар, прайзына ас-тамах паза даа пасха кирек ниме-ноо пирілген.
Призывниктер стройдаң позыдылғаннар, оларны ӱдесчеткен туған-чағыннарынаң хада плацча тарасханнар.
Мин пір хакас оолны ӱдесчеткен сӧбіренең чоох алысхам. Тормозаковтар сӧбірезі улуғ оолғы Айдарны армияа ӱдесчеттір. Ағаа 22 час, ол чааҷы службазына парар алнында Иркутсктағы ӧңніг тимірлер университедін тоозыбыстыр, амды чиит инженер, пір чыл служба иртіп, ибзер айланар.

Тормозаковтар сӧбірезі улуғ оолғы Айдарны чааҷы службазына ӱдесче
«Мин чааҷы службазына хынып парчам. Прай ооллар армияда полып аларға кирек тіп санапчам. Чааҷы службазын ирткені аның соондағы чуртаста даа тузалығ полар тіп сағынчам...» – теен ол.
Cӧбіре Ағбанда чуртапча, пабазы Николай Тормозаков, ФСИН системазында служба иртіп, тынаға сығыбысхан. Іҷезі Неля Тормозакова Хакас национальнай гимназия-интернатта ӱгретчі полып істенче. Паба-іҷе оолғы пір чыл чааҷы пол килері аның чуртазында тузалығ поларына ізенче.
Сомнар Альбина Чистогашевани
Автор :
Николай Султреков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде