Кізілернің ӱндезии чӱректі чылытча
13.10.2023
Хабарлар
Идінҷек Сабир Бурнаков
15 октябрьда – Ас-тамах промышленнозы тоғынҷызының кӱні. Пу ӱлӱкӱн пістің хазнада чарыс айының ӱзінҷі позырах кӱнінде чыл сай таныхталча
Ас-тамах промышленнозы пістің хазна экономиказында хаҷан даа танығлығ орында турған паза турча. Россияда ас-тамах промышленнозы аймах отрасльлардаң пӱтче, ол санда иттең тимнелген ас-тамах сығарызы.
Пӱӱн піс ит полуфабрикаттары сығарызынаң айғасчатхан чиит идінҷек Сабир Бурнаковнаң таныстырчабыс. Ол паза аның ӱс арғызы пӱӱл «Сағай фермазы» цех тӧстееннер. Ит полуфабрикаттарын тимнеҷең цех Ағбан городта орныхча.
Сабир Бурнаков Асхыс аймаандағы Ӱс чул аалда тӧреен. 7 часха теере анда ӧскен. Анаң аны ууҷазы Мария Николаевна Сагалакова Ағбанзар ағылыбысхан. Ууҷазы харах имҷізі полып тоғынған. Пастағы классха Сабир Ағбандағы 28№ школазар парған, анаң – 24№ школазар. 7 класстаң сығара Н.Ф.Катановтың адынаң Хакас национальнай гимназияда ӱгренген. Аны тоозыбысханда, Новосибирсктегі хазна университедінің экономика институдынзар «экономист» специальностьха ӱгренерге кіріп алған. Анаң Н.Ф.Катановтың адынаң Хакас хазна университедінзер «Менеджмент. Кічіг пос киреенең устиры» специальностьха кірібіскен. 2018 чылда ӱгредиин тоозыбысхан.
Сабир Бурнаков ікі чыл пос киреенең айғасча. Пастап «Портрет» хоос студиязын азыбысхан, анаң – той таптир устарның мастерскойын. Хоос студиязында ӱгредіг полызығлары пирілчелер – олғаннарны пӧзік ӱгредіг заведениелерінзер кірерге тимнепчелер.
– Арғыстарымнаң хада итнең айғасхабыс. Аалларҷа чӧріп, фермерлердең хойларны, малларны садысчаңмыс. Анаң итті Ағбанда рестораннарға, гостиницаларға, аал хонии рыногында садыбысчаңмыс. Садыға малларны ибде соғарға чарадылбиныбысханда, итнең айғазары парыстығ нимес пол парған.
Пӱӱл сілкер айында полуфабрикаттар сығарҷаң цех азыбысхабыс. Пастағызын сидік полған. Прай кирек ахчанаң палғалыстығ. Тураны арендаа суурып, арғыстарымнаң хада аны тыхтаабыс паза иптеебіс. Пічіктерні паза чарадығларны тимниріне кӧп тус парыбысхан. Полуфабрикаттар итчең устарны таап аларға сидік полған. Ағбанда олар кӧп нимес пар даа ползалар, тоғынчатхан орыннары пар. Кирек оборудование садысхабыс. Хада тоғынчатхан арғызым Александр Кольчиков, чонға социальнай хабазығ пирҷең устаныcнаң социальнай чӧптезіг идіп, оборудование аларына 350 муң салковай хабазығ алған. Ол ахчаа оборудование, столлар паза холодильниктер садызып алғабыс, – теен Сабир Бурнаков.
Амғы туста полуфабрикаттар цеғында тоғынҷылар читкіҷе. Олар пір кӱнге 120 килограмм полуфабрикат тимнебісчелер: хой, мал паза сосха идінең пельменнер, хинкали, мантылар паза корейскай пельменнер. Пір ай аразына цех 3-3,5 тонна ас-тамах сығарыбысча. Пірее туста 4 тоннаа чит парча. Корейскай пельменнер цехтың фирменнай ас-тамаа полча. Аны цех тӧстегҷілері сағынып алғаннар. Сабир Бурнаков пу пельменнерні хаарарға паза соевай соуснаң чиирге чӧп пирче.
Полуфабрикаттарны Ағбанның садығ тураларынзар таратчалар паза аал хонии рыногында, цехта сатчалар. Цехсар килзе, пельменнер итчең устар хайди тоғынчатханнарын кӧріп аларға чарир. Садығ пӧлии паза цех аразында сӱлейке стене.
Сабир Бурнаков пӧгіннерінең ӱлескен. Цех наа ла тоғынып пастаанда, анда ідӧк колбасалар сығарылғаннар. Чайғыда колбаса сығарызы тохтадылған. Кічіг хырлас айында оларны хатап тимнирге паза котлеттер сығарарға сағыс пар. Пу полуфабрикаттар сығарызына пічіктер тимде. Чиит идінҷектер, ас-тамахтың сығарызын ӧскіріп алза, хоза тоғынҷыларны аларға сағынчалар.
– Пос киреенең айғазары кӧңніме кірче, кізілер махтап ӱндезіглер пасчатсалар, сығдыратчатсалар, чӱрекке чахсы пілдірче, – кӧңнінең ӱлескен Сабир Бурнаков.
Амғы туста Хакасиядағы идінҷектерге «Минің пос киреем» кін хабасча. Ол санда гарантиялығ фондтаң льготалығ кредит аларында полыс пирче паза логотиптер тимнирін тӧлеп пирче.
Ас-тамах сығарызынаң айғазарға сағынчатханнарға Сабир мындағ чӧптер пирче: ас-тамахты ибде кӧмес тимнеп, таныстар аразында тарадарға паза оларның ӱндезиин истіп аларға. Аны кізілер чахсы садыс сыхса, килістіре тура таап, арендаа суурып, кӧп арах сығарарға.
Сом Альбина Чистогашевани
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
