Матыр совет чонына – аарлас паза улуғлас
11.10.2023
Хабарлар
Чонның паза ӱлгӱнің пірге тоғызы сылтаанда хумартхы тас наа орында турғызылған
Культура ис-пайы. Хакасия пазы Саяногорскта Владимир Ильич Лениннің хумартхы тазын асхан
Ирткен чечіме кӱнде, 7 октябрьда, Саяногорскта ЗАГС-тың орындағы пӧлии хыринда Хакасия пазы Валентин Коновалов муниципальнай пӱдістің устағ-пастаанаң паза город чуртағҷыларынаң хада Владимир Ильич Лениннің хумартхы тазын асхан.
Итсе, СССР тӧстегҷізіне ол хумартхы тас городтың пастағы промышленность предприятиезінде – «Саянмрамор» комбинатта – 1982 чылдох турғызылған полған.
Предприятие банкротха кір парған соонаң хумартхы тас тастал парған, ол чох пол парар тіп хорғыс полған. Че город чуртағҷылары ол киректең оортах тур халбааны, идінҷек Анатолий Бидзюраның паза ООО директоры Игорь Иванниковтың ӧткін хайынызы, Хакасия правительствозының, Саяногорсктың устағ-пастааның, городтың депутаттар чӧбінің пірге тоғызы сылтаанда культура ис-пайы объектін хайраллап аларға паза наа орында турғызыбызар оңдай табылған.
– Владимир Ильич Ленинге – пастағы совет хазназы тӧстегҷізіне – чарыдылған хумартхы тасты азып, піс матыр совет чонының нинҷе тӧліне аарлазыбысты кӧзітчебіс. Ол прайзын улуғлааны, кем постың тіспен істенізінең кӱстіг индустриялығ пик хазнаны тӧстеен, кем Илбек Ада чаада чиңіп алған, кем ӱгредігні, науканы паза культураны уғаа пӧзік синге кӧдірібіскен, кем наа чирні таллаан паза кізілерге чылтыстарзар чолны ас пирген. Хумартхы тасха ікінҷі чуртас пирерге полысханнарға прайзына алғызым читірчем, – таныхтаан республика пазы.
Сом авторни
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
