Чон хазиин пиктезін
11.10.2023
Хабарлар
Наа орында пастағы ойын
Танығлығ кирек. Асхыс аймаандағы Ӧӧк пилтірі аалда аймах кӧрімнерге кӧріл парған спорт площадказы пайрамни азылған
Аал чуртағҷыларын алғыстааннар Хакасияның спорт министрінің тоғызын толдырчатхан Сергей Кочан, Асхыс аймаа пазы Абрек Челтыгмашев, Ӧӧркі Чӧп депутады Галина Елистратова, Ӧӧк пилтірі аал чӧбі пазы Николай Спирин паза пасха даа аал чӧптерінің устағҷылары.
Сергей Кочанның искіриинең, наа спорт площадказы Хакасия правительствозының физическай культура паза спорт тилізі программазынҷа республика ахчазына пӱдірілген. Андағ площадкада прай даа спорт кӧрімнерінең айғазарға, ол санда хысхызын хоккей ойнирға чарир. Олғаннар паза улуғлар анда волейбол, баскетбол, футбол, теннис ойнирлар паза ниик атлетиканаң айғазарлар.
– Хоккей коробказының хыринда сцена паза кӧрігҷілерге орыннар тимнелген. Сценада кӱрес марығлары иртірілер. Пу проектті піс аал чӧбінең хада тимнеебіс. Андағ оңдай полған на аалда пар. Прай тоғыстар 10 миллион салковайға тур парған, – чоохтаан Сергей Владимирович. – Амғы туста пасха муниципалитеттер сурыныс пічіктерін тимнепчелер. Спорт площадказында хаҷан даа чон кӧп ползын паза аннаң иптіг тузаланзыннар.
Николай Спириннің таниинаң, спорт площадказын пӱдірерге аал чуртағҷылары хаҷанох сурынғаннар. Мының алнында аал чӧптерінде аймах синіндегі спартакиадалар сыбыра иртчеңнер, Ӧӧк пилтіріне теес читкенде, арға-мӧрійні тохтадыбысханнар. Аның ӱчӱн аал стадион чох халған.
– Іди дее полза, піс холыбысты пос тӱзірбеебіс, аймах чирлерзер сурыныс пічіктерін ысхабыс. Сергей Владимировичнең, пілізіп алып, Ӧӧк пилтірінде турыстыра спорт площадказын пӱдір саларға чаратхабыс. Алында физкультура уроктары олаңай ачыхта иртчеңнер, амды олғаннар чахсы оңдайларда спортнаң айғазарлар. Паза стадион хыринда тренажёрлар, олған площадказы турғызылғаннар, – ӧрінізінең ӱлескен Николай Николаевич.
Хызыл чалама хыплал парғанда, Николай Спирин аал чуртағҷыларын алғыстаан. Аның таниинаң, спорт площадказы Хакасияның спорт министерствозы полызии чох азылбасчых. Амды аалның полған на чуртағҷызы паза аалҷызы анда хазиин пиктир.
Сергей Кочанның таниинаң, спорт площадказында ідӧк школа программазын толдырарға, ГТО-ға тимненіп алар оңдай пар. Ол прай муниципальнай пӱдістерге кӧзідім ползын. Мындағ объекттер саны чылдаң чылға хозылзын.
Галина Елистратова, аал чуртағҷыларын алғыстап, таныхтаан:
– Спорт площадказының пӱдіриине улуғ нимес хозым «Единая Россия» партия иткен. Ол «Кічіг киректер» проектті чуртасха кирче. Ӧӧркі Чӧп кнезі Сергей Михайлович Соколның алғыстазын читірчебін. Аның чооғынаң, аал чуртағҷылары спортнаң ӧткін айғасчалар. Аал чӧбі пазы тоғызы сылтаанда мында чонға уғаа кирек объект пӱдіріл парған.
Абрек Челтыгмашев площадканы пӱдірген подрядчикке алғызын читірген. Пӱӱл Ӧӧк пилтірі аал чӧбінде иң кӧп спорт объекті тузаланысха кирілген. Пастап Катанов аалда кӱрес залы азыл парған, анда ідӧк фитнес кіні пӱдірілер.
– Иң улуғ сурынызым – пу спорт площадказын хайраллаңар. Мында улуғлар даа, кічіглер дее спортнаң айғассыннар, – айланған Абрек Васильевич.
Спорт площадказы азыл парғанда, Ӧӧк пилтірі аал чӧбі командазы Хакасияның спорт министерствозы командазынаң тоғыр волейбол ойнабысхан. Ідӧк олғаннар аразында ниик атлетикаҷа марығ ирткен.
Сомнар авторни
Автор :
Антон Чертыков
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
