Ӱс хати кӧп поезд иртірілер
04.10.2023
Хабарлар
Хызылчар тимір чолының, Хакасияның транспорт министерствозының паза Асхыс аймааның устағҷылары Пирікчул – Казанов ікі чоллығ кизекті асханнар
Транспорт. Хызылчар тимір чолы Пирікчул – Казанов кизекте поездтернің ікі чоллығ чӧрізін азыбысхан
Хызылчар тимір чолы Пирікчул – Казанов кизекте поездтернің ікі чоллығ чӧрізін асхан. Ол Междуреченск – Тайшет Іскеркі полигонның Хакасиядағы кизегінде орныхча.
Мероприятиеде араласханнар Хызылчар тимір чолының пастығы Алексей Туманин паза Хакасияның транспорт министрінің тоғызын толдырчатхан Олег Емелин.
– Пирікчул – Казанов кизекті нааҷылиры регионға ла киректелбинче. Ол прай Іскеркі полигонның иртірер оңдайларны хозар улуғ проекттің чардыхтарының пірсі полча. Піске ол хоза читіре пӱдіріл парған пастағы объект полча, аны Междуреченск – Тайшет ӱстӱнзархы кизекті нааҷылирының ікінҷі чардығы хоостыра пӱдіргеннер, хайзынаң Іскеркі полигон пасталча. Амды піс пу участокча поездтерні ӱc хати кӧп иртірербіс, – чоохтаан Алексей Туманин.
Сибирьнің хатығ климадында тузаланылчатхан кизекте, поездтер чӧрізін тохтатпин, хызылчар тимірчолҷылары, ікі чылға даа читірбин, улуғ тоғыс толдыр салғаннар. Анда 24,5 км ӧӧн чол салылған, 8 тимір-бетон тахтазы пӱдірілген, 700 азыра тірег турғызылған паза 25 км чарытхы сетьі тартылған. Пирікчул паза Казанов станцияларда поездтерні ызар чолларның узуны 1050 м азыра хозылған, ам анда узун паза аар кӧдірімніг поездтерні иртірерге чарир.
Алексей Туманиннің чооғынаң, чағынғы ӱc чылда Междуреченск – Тайшет чолның ӱстӱнзархы кизегіндегі прай пӱдіріг тоғыстарының 90 % Хакасияда апарылар. Пу чыл тоозылғанҷа хоза ӱс кизекте ікі чоллығ чардыхтар пӱдір салар план тудылча. Олар регионның хара тас аныпчатхан предприятиелерге транспортнаң тузаланар оңдай пирерлер. Прай ол тоғыстар республиканың экономиказын тилідеріне паза ӧскіреріне резерв тӧстирлер.
– Хайди сірер пілчезер, халғанҷы чылларда регионның ӧӧн сидікcіністерінің пірсі, анып алып, тимнеп салған хара тасты паза чирнің пасха даа ис-пайын апарары полған.Тимір чол ноо даа туста транспорттың ӧӧн тамыры полған паза полар, ол экономиканы тилідеріне паза хазнаның транспорт чӧрізін хорғыс чох идеріне тоғынча. Аннаңар Хакасияның правительствозы Пирікчул – Ӱгечі паза Ӱгечі – Казанов кизектерде ікінҷі чоллар пӱдірерін кирексеен, – таныхтаан Олег Емелин.
Хызылчар тимір чолы Пирікчул – Казанов чолны нааҷылирын «Артышта – Междуреченск – Тайшет участоктың поездтерні иртірер оңдайын хозары» инвестиция проекті хоостыра толдыр салған. Тебе станциядаң (Кемеров облазы) Асхыс станцияа теере (Хакасия) линияда пір чоллығ ол чалғыс кизек полған. Салтарында, Хызылчар тимір чолының ӱcтӱнзархы чардығында ам хоза 183 километр прай ікі чоллығ пол парды.
Сом Хакасияның транспорт паза чол хонии министерствозының пресс-службазыни
Автор :
Екатерина Спирина
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
