Регионнарның наа табылған пастарына – тӱзімніг тоғыс
04.10.2023
Хабарлар
Россия президенті Владимир Путин
Ӱлгӱ. Ікінҷі пис чылға табылған Хакасия пазы Валентин Коновалов Россия президенті Владимир Путиннең тоғазығда араласхан
Ирткен табығларда утхан регионнар устағҷыларынаң тоғазығ видеопалғалыс оңдайынаң ирткен. Хазна пазы Пірге ӱн пиріс кӱні соонаң кибірли андағ тоғазығлар иртірче.
Владимир Путин толдырығлығ ӱлгӱ органнарының наа табылған устағҷыларын чиңіснең алғыстаан, олар «турыстығ, киртістіг салтарлар» кӧзіткенін паза табығлар «азых, сын паза конкуренция оңдайлығ» ирткенін таныхтап:
– Пӧзік киртініс сині – ол пӧзік нандырығлығ полары. Киртінчем, сірер анзын чахсы пілчезер паза табығҷыларның, регионнар чуртағҷыларының чахсы алызығларға ізеністеріне турызар ӱчӱн прай кӱстерің саларзар.
Президент пу тоғыста ӧӧн оңдайларның пірсі регионнарның экономикаларының кадрлығ, ӱгредігліг, технологиялығ базазын тыыдары, наа тоғыс орыннарын тӧстирі полчатханын таныхтаан. Владимир Путин алынҷа хайығ саларға хығырған инфраструктураа: транспорттығ, инженернай, коммунальнай паза социальнай.
– Пу саринаң пілдістіг, наа оңдайлар паза наа хаалағлар тузы. Пісті санкцияларнаң пазынып аларға кӱcтенгеннернің планнарына хайығ салбин. Саңай тискер, пісті хыза пасханы производстволарыбысты ӧскіреріне, аймах-пасха сфераларда пос кӱзін азарына оңдай пирген, – теен ол.
Владимир Путин СВО араласчыларына паза оларның сӧбірелеріне хайди даа хабазарға киректелчеткенінде алынҷа тохтаан.
– Матырларға, пос туған-чағыннарын чідіргеннерге полызары – ол пістің алымыбыс, Ада чир-суубыс арачылағҷыларына алғызыбыс читірҷең паза оларны аарлаҷаң алымыбыс, – таныхтаан президент.
Ідӧк ол губернаторларны паза оларның командаларын чуртағҷыларнаң тӧреміл палғалыс тударға хығырған:
– Ізенчем, сірер кізілернең кӧні, сын чоохтазарға хаҷан даа тимде поларзар. Оларның кирексіністерін паза сурыныстарын санға алып тоғынарзар. Регионнарны, ол оңдайнаң тиксі хазнаны, тилідеріне прай кӱзіңерні саларзар.
Владимир Путин прай субъекттернің пастарына тӱзімніг тоғыс, пӧгіннерні толдырарында чидіглер алғаан, ідӧк федеральнай синде оларға прай сарилығ полызығ пирілер тіп таныхтаан.
Видеоселектор тоозылғанда, Хакасия пазы социальнай сетьтердегі страницаларында ирткен тоғазығдаңар сағыс-кӧрізінең ӱлескен. Валентин Коновалов Россия президентінің пастаанҷа чуртасха кирілген федеральнай программаларда паза национальнай проекттерде араласханы Хакасияа чуртас-экономика тилізінең палғалыстығ хайзы сурығларны хысха тусха пӧгібізерге оңдай пиргенін таныхтаан:
– Пістің чоллар, социальнай объекттер пӱдірілче паза тыхталча, туралар ибіркізі, парктар паза скверлер иптелче. Пис чыл аразына піс ол кӧстеглерге федеральнай ахча тартарын 7,5 хати ӧскірібіскебіс.
Республика правительствозы, чуртағҷыларның чӧптеріне тӧстеніп, 2019 чылда тимнеен Тиліс стратегиязы ідӧк соон сӱрістіре чуртасха кирілче.
Валентин Коновалов хазна пазына алғызын читірген:
– Владимир Владимировичке пістің республикаа хайығ салчатхан паза Хакасия алнында турчатхан пӧгіннерні толдырарына хабасчатхан ӱчӱн алғызым читірчем, – пас салған ол соцсетьтердегі страницаларында.
Губернаторлар табығлары пӱӱл кӱскӱзін хазнаның 26 субъектінде ирткен: 21 регионда, ол санда Хакасияда, устағҷыны чуртағҷылар тапханнар, пис регионда – закон сығарҷаң чыылығларның депутаттары.
Сом Kremlin.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
