Позыдылчатхан ахча салтар пирче
29.09.2023
Хабарлар
Туризмні тилідеріне хозым идіп, сыйыхха турысханнар Хакасия пазы Валентин Коноваловнаң хада
Сыйыхтас. Хакасия пазы Валентин Коновалов паза республиканың экономика тилізі министрі тоғызын толдырчатхан Роман Ковтун Тиксі тилекейдегі туризм кӱніне удур тоғынҷыларны алғыстадылар
Хакасия правительствозының чыылығлар залында стол кистінде аймах учреждениелер устағҷылары паза тоғынҷылары одырғаннар: республиканың экономика тилізі министерствозының туризм тилізі департаментінің, туристтернің искіріг кінінің, «Хуртуйах тас» музей-заповедниктің, аймах тынағ базаларының ээлері паза идінҷектер.
– Піс халғанҷы пис чыл аразына, чӧптіг тоғынып, туризм кӧcтеенде чахсы хаалағ идібіскебіс. Ол позыдылчатхан ахчаа ла теелбинче, піс аны 20 хати ӧскірібіскебіс, че ідӧк алынҷа хайығ чапсых орыннарға паза оларның инфраструктуразына салылған. Піс республиканың пірге турист таңмазын чарадыбысхабыс паза аны идінҷектернең, муниципальнай пӱдіcтернең паза ӱлгӱ органнарынаң хада тузаланысха кирерге кӱстенчебіс. Тиксі тоғыс салтары – 2022 чылда республиказар кил парған туристтер саны 1 миллионны аза халған! Пӱӱл аннаң даа артых салтар сағыпчабыс.
Аннаң пасха, туризм кирее ахча позыдылчатхан сылтаанда ӧсче. Пістің турист киреенде 1300 азыра идінҷек паза предприятие тоғынча. Чылдаң чылға оларның саны хозылчатханы пу кирек предприятиелерге, учреждениелерге паза тиксі республика экономиказына кӧптең кӧп парыс ағылчатханын киречілепче. Хатап таныхтапчам, ол пістің пірге тоғызыбыс, аннаңар сірерні хозым итчеткен ӱчӱн паза пу киректі тилідеріне прай чӱрееңерні салчатхан ӱчӱн алғызым читірчем, – теен Хакасия пазы Валентин Коновалов.
Республика пазының алғыстас пічии читі кізее читірілген: Хакасияның туриcттернің искіріг кінінің директоры Ирина Дерюшеваа, аның орынҷылары Яна Августовскаяа паза Анастасия Осинаа, «Хуртуйах тас» музей-заповедниктің устағҷызы Оксана Горбатоваа паза наука тоғынҷызы Леонид Горбатовха, Хакас Республиканың олған искусство национальнай школазының ӱгретчізі Аржан Туденевке паза «Дискавери» турист компаниязының ӧӧн директоры Инна Поддубровскаяа.
Хакасия пазы Валентин Коновалов ідӧк чонның ӱн пиргенінің салтарларынҷа иң артыхтарны таныхтаан: «Иң артых гостиница» атха «Гладенькая» спорт-отель турысхан, «Иң артых тынағ базазы» атха – «Жарки» тынағ базазы, ікізінің ээзі Виктор Смоловский полча, «Иң артых санаторий» атха чон «Шира кӧл» курортты таллап алған, танығлығ сыйых ӧӧн директор Татьяна Бочароваа читірілген.
Аарластығ пічіктерні ідӧк Хакасияның экономика тилізі министерствозы тимнеп салтыр. Министр Роман Ковтун республика пазы Валентин Коноваловха паза аның орынҷызы Юлия Исмагиловаа регионда туризмні тилідеріне улуғ хайығ салчатхан ӱчӱн алғызын читірген. Ол хайығ сылтаанда туризмнең айғасчатхан идінҷектер хазна хабазиин алчалар, чапсых орыннарзар чоллар пӱдірілче, ибіркі чирлер иптелче. Хакасиязар килчеткен туристтерге тохтаҷаң орыннар саны хозыл сыххан.
Сыйыхтас араласчыларына пастыхтарнаң пос кӧрізінең ӱлезер паза сурығлар пирер оңдай пирілген. Инна Поддубровская 2024 чылда Хакасияның национальнай тынағ чолын чуртасха кирерге чӧп пирген. Аның проекті тимде осхас. Специалисттернің кӧрізінең, ол «Сибирьдегі каникуллар» чіли сабланыснаң тузаланарға кирек. Валентин Коновалов ол чӧпке чӧпсінген паза тоғыс апарарға чахаан. Мындағ турлар пары орындағы гостиницаларны амғы тусха килістіре полызығлар читірерге кӧcтепчеттір. Алызығларны туристтер дее пӧзік паалапчалар паза ол орыннарзар хатап айланчаттырлар.
Леонид Горбатов, тізең, амғы музейлерге хоза наа орыннар тӧстир сағызынаң ӱлескен. Андағ орыннарның пірсі – Сафрондағы кӱргеннер. Пу орынзар туристтер хынып чӧрчелер, че ол орын пір дее иптелбеен, хайығ чох турча. Валентин Коновалов наа сағыснаң чарасхан паза 2024 чылда Хакасияның тигір алтындағы азых музейлерін улуғ алызығлар сағыпчатханын таныхтаан, олар прайзы федеральнай программаа кирілген сылтаанда, инфраструктуралары чахсыландырылар паза тиліділер.
Сағыс-кӧрістернең ӱлескен соонаң сыйыхтас араласчылары кибірли Хакасия пазынаң хада сомға суурынғаннар.
Сом Альбина Чистогашевани
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
