Чиит идінҷектерге – хазна хабазығларынаңар
27.09.2023
Хабарлар
Анастасия Данилова чиит идінҷектер алнында чоох тутча
Съезд. Пу наада Хакасияның чиит идінҷектерінің ікінҷі cъезді «Минің пос киреем» кінде ирткен
Хакасияның чиит идінҷектерінің клубы ӱртӱн айының ікінҷі чардығында чиит идінҷектернің ікінҷі съездін иртірерге пӧгінген. Сағынған сағыстарын толдырып, «Минің пос киреем» кінде чыылысханнар. Пастағы съездте чиит идінҷектер республика пастыхтарынаң тоғасхан ползалар, ікінҷі тоғазығның программазына клубнаң таныстырары паза идінҷектерге хазна, регион паза муниципалитет хабазиинаңар искірері кирілген, ол санда чииттерге кӧрілген хабазығлардаңар.
Пос киреенең айғазып пастапчатхан чииттернің пірігізінің устаанына Наталья Кикоть турғызылған. Чиит хыс пос киреен 19 частығдох пастаан. 2012 чылда Харатас городта тӧреен-ӧскен хыс пос адынаң кип-азах сығарызын азып алған. Пӱӱл, тізең, Наталья Кикоть пос киреен тӧстиріне чарым миллион салковай грант утып алған. Ағаа хоза кӱстенҷік хыс Москвазар «Росмолодежь. Бизнес» Чиит идінҷектернің І съездіне чӧр килген. Анда ол регионда чииттернің пос киреен орта тилідеріне ӱгренген.
– 2022 чылда Чиит идінҷектернің клубы Россия синінде тӧстелген, пӱӱл орғах айында – Хакасияда, – чарытхан Наталья Кикоть. – Ол пос киреенең айғаcчатхан паза пос киреен азарға сағынчатхан 14 – 35 частығ чииттерні піріктірер, удур-тӧдір таныстырар, піліcтернең паза опытнаң ӱлезер пӧгіннең тӧстелген. Чииттерге пос киреен азарға полызып, хазна наа экономика тӧстирге сағынча. Пӱӱл піс чиит идінҷектернің республика синіндегі съездін иртірерге пӧгінчебіс, аннаң пасха, улуғ нимес, алынҷа сурығларға теелчеткен чыылығлар иртірілче. Кӧзідімге, піс кадрлар суриинҷа чыылысхабыс. Ол пӱӱнгі идінҷектернің ағырсымнығ сурығларының пірcі полча.
Клуб араласчылары «Росмолодежь.Бизнес» проектче санға алылчалар. Че Натальяның таниинаң, портал пӱдізі сидіктеңер, прай сурығларны Телеграмдағы «Хакас Республиканың чиит идінҷектерінің клубы» чоохтазығ пастыра пирерге чарир.
Наталья Кикоть 100 – 500 муң салковай федеральнай грант хайди пирілчеткеннеңер чоохтап пирген. Аның искіриинең, пу грантты 14 – 25 частығларға аларға чарир, че 18 часха теере пос киреенең айғазарға сағынчатхан чиит кізее паба-іҷезінің чарадиин аларға киректелер. Грант идінҷек чіли санға алылғаннарға паза пірігіc (юридическай лицо) тӧстееннерге, сынап ағаа компанияның 50 % азыра ӱлӱзі килісчетсе, пирілче. Чоохтирға кирек, хазна хабазии федеральнай полза даа, прай сурығларнаң регион ӱлгӱлері айғасча. Андағ оңдайнаң Хакасияда пу грант республиканың экономика тилізі министерствозы пастыра читірілче.
– Грантты аларға пӧгінчеткен кізее мындағ кирексіністерні толдырарға тимде поларға кирек: налогтарҷа паза хайди даа кӧрілген пасха тӧлеглерҷе ӧдіс чох поларға алай 1000 салковайны аспасха кирек. Ікінҷізі, «Минің пос киреем» кіннің пос киреен апарарынҷа ӧӧн піліcтерҷе тикке ӱгредігні иртерге. Ӱгредіг тузы 16 частаң асхынах полбазын. Ӱгредіг сертификадын алғанынаң 1 чыл аспасха кирек. Ідӧк проект паазының 25 проценті пости ползын, ол ахча хазна хабазиин аларға айланчатхан кізінің банк счедында чадарға кирек, – чарытхан Наталья Кикоть.
Грантты аймах пӧгіннерге хорадарға чарир: пос кирее орнығар орынны арендаа суурарына паза тыхтирына, ӧнетін тирігні паза техниканы садызарына алай арендаа суурарына, коммунальнай, палғалыс, Интернет сетьтерін тартарына, компьютер программаларын турғызарына паза оларны хайығда тударына, ниме-нооны паза полызығларны СМИ-да, сайтта алай соцсетьтерде сабландырарына, франшиза, лизинг тӧлеглеріне, пос сағызынаң тимнелген тоғыс салтарларын санға турғызарына. Че аны пу хорадығларға позыдарға чарадылбинча: налогтарға, хайди даа кӧрілген пасха тӧлеглерге, ӧдіcке алған ахчаны паза кредиттерні айландырарынҷа процент тӧлеглеріне.
Анастасия Данилова чииттерге аймах ӱлгӱ органнарында кӧрілген хазна хабазиинаңар чарыда чоохтап пирген. Позы ол ідӧк пос киреенең айғасча: идінҷектерге пос киреен тилідерге, ахча хабазиин алар наа оңдай табарға полысча паза бухгалтер полызығларын читірче, аның ідӧк косметика сығарызы паза садығ туразы тоғынча. Хада хонғаны, тізең, кресен-фермер хониинаң устапча.
Пос киреен пастир ӱчӱн хайдағ хазна хабазиинаң, аны айландырбин, тузаланарға чарир? Пос киреен азарынҷа пастағы хаалағларны итчеткеннерге Чонға тоғыс табарға полысчатхан службазар айланарға чарир: анда тоғыс чох чуртағҷаа пос киреен азарға 120 муң салковай пирілче. Чонға социальнай хабазығ пирҷең пӧліктерде чуртастың сидік оңдайларына кір парған алай парызы тӧбін чуртағҷыларға социальнай чӧптезігҷе 200 – 350 муң салковай хазна хабазии пирілче, аны ідӧк пос киреен азарына аларға чарир. Пу хабазығны аларға сағынчатхан чуртағҷы кӧп, аннаңар пічіктерні «Хазна полызығлары» порталҷа пирерге чӧптепче Анастасия Данилова. Социальнай кӧстегліг пос киреене ідӧк 500 муң салковайға теере грант аларға чарир. Туризм тилізіне гранттарға чахсы ахча салылча: 3 миллион салковайға теере – туристтерге тынанҷаң орынның, пляжтың ибіркі чирін иптиріне, тиріглер аларына, инфраструктураны тилідеріне, ол санда хысхыда чылҷаң паза 1 миллион салковайға теере – тасхын чӧрҷең тимде модульларны садызарына, читіреріне паза турғызарына, 500 муң салковайға теере – турист тиріглерін садызарына. Аннаң пасха, аал хонии паза ас-тамах министерствозының чахсы гранттар пар, ідӧк хай пірее муниципальнай пӱдістер идінҷектер аразында хазна хабазиина марығ чарлапчалар.
Анастасия Данилова пос киреен тилідеріне хайдағ даа грантты аларға пӧгінчеткен чииттерге тузалығ чӧптер пирген: пічіктерні азынада тимнирге; налогтарҷа ӧдістерні сыныхтап турарға; банк счеттары арестке тартылбазын хайығда тударға; пос кирее орнығар тураа аренда чӧптезіглері айғазар кирекке килісчеткенін сыныхтирға; грант чарлалчатхан чахығда идінҷектің айланызын паалир кирексініcтер паза паалар пирілче, аннаң танызып, проекттің утар оңдайларын посха азынада сананып аларға чарир; кӧрілген хорадығларҷа коммерческай пааларны сурап аларға паза пос киреенің ОКВЭД-ын чарлалған гранттың кӧстеглерінең тиңнестірерге (олар пасхалалбасха кирек).
Грант алары, аны тузаланары – нандырығлығ кирек. Полған на хазна хабазиинда сан пиріс идері паза сыныхтағлар кӧрілче. Аннаңар грант па, субсидия ба алған идінҷекке сыныхтағларға тимде поларға кирек: хорадығларның чектерін хайраллирға, алылған ниме-ноонаң тузаланарға, ай сай алай квартал сай сан пирістер тимнирге паза полған на сыныхтаға тимде поларға. Ідӧк чииттерні пос киреен регионда тилідері ӱчӱн нандырығлығ ӱлгӱ органнарының сайттарынаң тузаланарға паза соцсетьтердегі страницаларына пазынарға чӧп пирілген. Хакасияда андағ пірігістер санына кірчелер «Кічіг паза ортын пос кирее» нацпроект (сайты пар), Хакасия правительствозы, республиканың экономика тилізі министерствозы, город-аймахтарның устағ-пастаа паза «Минің пос киреем» кін. Пуох съездте Хакасияның тиліс чыындызы паза «Минің пос киреем» кіннің кізізі Татьяна Бизюк пу пірігіcтер читірчеткен полызығлардаңар чарыт пирген: туризм кӧстеенҷе тоғынчатхан чиит идінҷектерге тохтағ орыннарына «чылтыстар» аларынаңар, саннығ хол саларын чахирынаңар, кӧстегліг ӱгредіг программазын иртерінеңер, идінҷектернің чӧптерінҷе Россияның кӱстіг ӱгретчілерінің ӱгредиин республикада иртірер оңдайдаңар, социальнай чӧптезігҷе хазна хабазиин аларына проектті тимнирге полызығ читірілчеткеннеңер паза пасхазынаңар.
Тиксі ӱзӱріглер соонаң съезд араласчыларының кӱн суриина сығарылған сурығларны ӱзӱрҷең, чоох тутханнарға сурығлар пирҷең оңдай пирілген. Кем, тізең, пу клубха хозыларға сағынча, аның чат-каналы Телеграмда пар.
Сом Дмитрий Сунчугашевти
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
