Марығ. 14 – 17 сентябрьда Ағбанда кикбоксингче тиксi Россия марии ирткен. Анда 19 регионның спортсменнерi устарын кöзiткеннер

Ирткен неделяда Ағбан кикбоксингтiң кiнiне айлан парған тиирге чарир. Пастағызын на иртiрiлген тиксi Россия турнирiнде 19 регионның спортсменнерi араласханнар. Оларның санында Москваның, Свердловск облазының, Татарстанның, Башкортостанның паза пасхазының кикбоксёрлары. Аарлығ аалӌылар санында Донецк Чон Республиказының (ДНР) командазы полған. Тиксi алза, марығда узын кöзiткен 420 кiзi. Хакасиядағы клубтар арға-мöрiйге 130 кiзiнi cығарғаннар. Кiчiглер татамиде тудысханнар, улуғлар – рингте. Олар «фулл-контакт», «лайт-контакт» паза «поинтфайтинг» дисциплиналарда кӱстерiн сынааннар.

Турнир 14 сентябрьда пайрамни азылған. Мероприятиеде Хакасия пазы Валентин Коновалов, спорт министрiнiң тоғызын толдырчатхан Сергей Кочан, Ағбанның пазы Алексей Лёмин, Ööркi Чöп депутады Олег Гавловский араласханнар. Валентин Олегович спортсменнерге кöп чылығ сöстер читiрген. Хайди таныхтаан Хакасия пазы, кикбоксинг республикада чахсы тилiпчеткен спорт кöрiмнерi санына кiрче. Пiстiң оол-хыстар тилекей, Европа чемпионаттарынаң медальлар чох айланминчалар. Валентин Олегович Хакас хазна университедiнде ӱгренчеткенде, кикбоксингнең айғастырох. Спорт аны турғызылған пöгiннерге чидерге, сидiксiнiнiстернi тобырарға ӱгрет салған. Чооғының халғанӌызында В.О.Коновалов теен:

– Спортсменнерге чиңiс тударға алғапчам. Кöрiгӌiлернi пöзiк устарыңнаң öрiндiрiңер.

Мероприятие тузында Хакасия пазының алғыстас пiчiктерiн Россияның саблығ тренерлерi Александр Берёзкиннең Михаил Сазоновха читiргеннер. Чоохтирға кирек, Сазоновнаң Берёзкин – Хакасияның спортына улуғ хозым иткен кiзiлер. 20 артиинаң чыл аразына арғыстар, хада-пiрге тоғынып, 53 Россияның спорт узын, 5 чоннар аразындағы класстығ cпорт узын паза пiр Россияның саблығ спорт узын тимнеп салғаннар. Оларның устаанынаң 14 чир-суғӌыбыс тилекей чемпионадында чиңiс тутхан. Пӱӱнгi кӱнде Россияның пiрiктiрiлген командазынзар 6 кiзi кiрче. Александр Берёзкин кöп чыл кикбоксингче Россияның спорт федерациязында устағӌы полған. Анда iстенiп, Александр Николаевич пiстiң спортсменнерге чоннар аразындағы турнирлерге пар килерге полысчаң. Михаил Сазоновтың кӱстенiзiнең Хакасия кикбоксингтiң «фулл-контакт» кöрiмiнiң кiнiне саналча. Тиктең нимес Михаил Юрьевичтi «фулл-контактча» Россияның пiрiктiрiлген командазының улуғ тренерiне турғысханнар.

Марығдаңар чоохтаза, пастап кiчiглер тудысханнар. 16 сентябрьда залда кöрiгӌiлерге орын читпин парған, таң. Паба-iӌелер, харындас-пиӌелер олғаннар ӱчӱн матап «ағырчатпастар» ба. Улуғлар аразында азах мееттер позырахта ирткен. Хабыс саны 13-ке читкен. Пiстiң cпортсменнердең Юсиф Самедовты таныхтирӌыхпын. Пöзiк нимес сыннығ, чапчаң оол «ыырӌызына» позын теберге пiр дее оңдай пирбеен. «Фулл-контакт» дисциплинада пiр хабыс ӱс раундтаң пӱтче. Полғаны ла 2 минута парча. Халғанӌы раундта Самедов наа тыныс алып алған чiли пiлдiрген. Кикбоксёрға 21 час, ол ХГУ-ның студентi. Юсиф Самедов Ағбанда тöреен, пабазынаң iӌезi Азербайджаннаң. Iдöк морсынғам Илья Комаровха. Спортсмен турнирде ДНР-ның алнын алған. Ол 63,5 кг кöдiрiмде тудысхан. Чиит кiзi Донецктең, кикбоксингнең 6 частаң айғасча. Амғы туста тренер Джульетта Сушинскаяның холында узын таптапчаттыр.

ДНР öмезiнең чоохтасханда, оларға ахчанаң Хакасияның физическай культура паза спорт министерствозы полыс пиртiр. Командаа пеер чидерге оой полбиндыр. Öмедегiлер Донецктең Ростовха автобустығ читкеннер, Москвазар поездтiг парғаннар, аннаң самолеттығ учухханнар. Ағбанда аалӌылар Олимп резервi училищеде (техникумда) чуртааннар, андох азыранғаннар.

Джульетта Сушинскаяның чооғынаң, Донецксер снарядтар удаа учухчалар, аннаңар спорт секцияларына тоғынарға чарадылбинча. Че кикбоксерлар тренировкаларға тöремiл чыылысчаттырлар. Чуртас аннаң андар парча нооза. ДНР Россияа пiрiккенде, спортсменнернiң чуртас оңдайлары кöмес нииктел парыбыстыр. Оларға орындағы спорт министерствозы марығда аралазар ахча позыт сыхты. 2023 чылда донецктегiлер Хазанда, Волгоградта пол килгеннер. Командазар кiрчеткен 16 – 18 спортсменнең медаль чох iкi ле кiзi айланча. Хакасияда ирткен турнирде ДНР-ның öмезi позын iдöк турыстыра кöзiткен. Илья Комаров алтын медаль холға кирген, 14 частығ Михаил Серебро юниорлар аразында ӱзiнӌi орынға сыххан. Саарбах Макеевка городтаң полтыр. Тренер чоохтаан:

– Донецкте чуртирға оой нимес. Кöп кiзi парыбысхан. Че пiс таңдағызынзар iзенiснең кöрчебic. Хакасияда пiстi чылығ удурлапчалар. Спорт кип-азаан сыйлап пиргеннер. Анда Россияның паза Хакасияның гербтерi кöзiдiл парған. Пiс пу кип-азахты суурбин кис чöрербic.

Салтарлардаңар искiрзе, Хакасияның спортсменнерi турнир тузында 16 алтын, 16 кӱмӱс паза 15 хола медаль утып алғаннар. Республиканың öмезi пастағы орынға сыххан. Кӱмӱс призер полыбысхан Хызылчар крайының командазы, тывадағылар – ӱзiнӌi орында.

Хакасияның кикбоксингче спорт федерациязы пу турнирнi тöремiл иртiрерге пöгiнче. Араласчыларға Россияның спорт узы нормативiн толдырар оңдай пирерлер. Александр Берёзкин кирек килiзер тiп пiр дее iкiнӌiлебинче. Александр Николаевичтiң чооғынаң, республикада кикбоксингнең 500 артиинаң кiзi айғасча. Секциялар Ағбанда, Саяногорскта, Харатаста, Ағбан пилтiрi поселокта паза Хубачарда пар. Анзы читкiӌе нимес. Секциялар санын öскiрерге кирек.

Пiр марығ тоозылза, пасха турнирге тимненiс пасталча. Хакасияның иң кӱстiг кикбоксерлары 23 октябрьда чоннар аразындағы турнирде кӱс­терiн сынирлар. Марығ Раменское городта иртер. Анда Юсиф Самедов, Леонид Чебодаев паза Илья Морозов аралазарлар. 1 – 3 декабрьда Пермьде полар Россия чемпионады. Адалған ооллардаң пасха марығда Константин Туршин аралазар.

Сом Валерия Тамбовцевани