Танығлығ кӱн. Ӱртӱн айының 8-ӌi кӱнiнде финанстар киреенде iстенчеткеннер профессиональнай ӱлӱкӱнiн таныхтааннар. Пайрамнығ кӱнде Хакасияның правительствозында финанстар киреенде тоғынчатхан специалисттернi паза ветераннарны чеестееннер

Наталья Алексеевна Щетинина республиканың финанстар министерствозында 1976 чылдаң iстенген. Аннаңох сығара тынаға парыбысхан. Валентина Фёдоровна Сарагашева Таштып аймаандағы финанстар управлениезiнде 27 чыл тоғын салған. Ӱр чыл аның уcтағӌызы полған. Андар ол Новосибирсктегi финанстар академиязы соонаң 90 чылларда килген. Тынаға аннаңох ӱс чыл мының алнында парыбысхан. Ол сағысха кирче:

– Ол аар чыллар полған, регионда ахча чох полған. Чал ахчазын тузында тöлир оңдай чох полған. Ахча орнына тоғынӌыларға халас пир турӌаңмыс, пенсияны «катановкаларнаң» тöлеӌеңмiс. Сидiксiнiстер кöп тоғасчаң. Оларны пöгерге уғаа сидiк полӌаң. Пiстiң управлениеде 12 ле кiзi тоғынӌаң. Пiс прай тоғыстарны толдырарға маңнанӌаңмыс. Ӱгредiг, имнег киреен паза даа пасха сфераларны хайығда тутчаңмыс, прай сидiксiнicтернi iстiнең пiлӌеңмiс.

Удаа хараа тоғысха сығарға килiсчең. Пiрее устағ-пастағ сыныхтағнаң килер алнында пiске иртенге теере кирек пiчiктернi тимнеп саларға кирек полӌаң. Пicтiң тоғызыбыста ööнi – министерствоның паза управлениелернiң специалисттерi удур-тöдiр чахсы пiлiс полғаны. Андада тилiс полча. Мин ол-пу сурығнаң министерствозар удаа кил турӌаңмын. Ол туста факс паза даа пасха оборудование чох полған нооза. Наталья Алексеевна Щетинина минi, чиит специалисттi, удаа ӱгредiп чоохтап турӌаң, хабасчаң.

Юлия Семёновна Чугунекова Хакасияның финанстар министерствозында iстенче. Ол амды опыттығ специалист паза чииттерге кöстегӌi полча. Че iстенiс чолын ол Таштып аймаанда Валентина Сарагашеваның холында пастаан.

– Мин управлениезер 90 чылларда килгем. Техникумда ревизорға ӱгренген соонаң. Валентина Фёдоровна устағӌы полған. Мин техникумда ревизорға ӱгренгем, управлениеде, тiзең, бюджет киреенең айғазарға килiскен. Валентина Фёдоровна сыныхтағларға минi удаа хада ал турӌаң, ӱгретчең, кöстеӌең. Пiлiзiмнi алғыдарға полысхан ӱчӱн алғызым читiрчем. Амды мин позым чиит специалисттернi ӱгретчем, – сағысха кирче Юлия Семёновна.

Финанстар киреенiң ветераннары Наталья Алексеевна Щетининаа паза Валентина Фёдоровна Сарагашеваа Хакасия пазы Валентин Коновалов «Россия Федерациязының финанстар органнарының ветераны» знактар читiрген. Министерствоның пасха специалисттерi Аарластығ пiчiктерге паза алғыстастарға турысханнар.

– Финанстар министерствозының иптiг тоғызы – ол тузында пирiлчеткен чал ахчазы паза пособиелер ле нимес, iдöк наа школалар, имнег туралары, культура туралары, чоллар, чиит специалисттерге туралар пӱдiрерi. Аннаң пасха, ciрернiң тоғызыңар аал хонииның паза чурт-коммунальнай хоныхтың тилiзiнең палғалыстығ.

Хакасияның финанстар киреенең сын профессионаллар устапчалар. Коронавирус таа, санкциялар даа пiске хорғыстығ нимес. Сiрернiң кӱстенiзiңернең республика федеральнай программаларда, проекттерде араласча паза орындағы бюджетке хоза парыс ағылча. Аарлығ арғыстар, саннарың хаӌан даа килiссiннер! – таныхтаан чооғында республика пазы Валентин Коновалов.

Таныхтирға кирек, финанстар министерствозы правительствоның иң улуғ министерствозына саналча. Аның холында 20-ӌе департамент паза пöлiк, анда тиксi 100-че специалист iстенче. Министерствонаң Игорь Афанасьевич Тугужеков устапча.

Сом Дмитрий Сунчугашевти