Имнег кирее. Пу кӱннерде Ағбанда Г.Я.Ремишевскаяның адынаң республиканың имнег туразында кинек олғаннарға тiс имнеӌең пöлiк азылған

Амғы туста пiстiң республикада кöп ағырығны, пасха регионнарзар парбин, орындох имнир оңдайлар кирiлче. Халғанӌы iкi-ӱс чылға андағ пöзiк технологиялығ 12 аймах-пасха имнег полызии пирiлче. Реанимация пöлиин алғытханнар. Ээк-сырай паза пластика хирургия пöлии азылған. Пӱӱл май айда МРТ кабинедi тоғынып пастаан, анда пiр муң азыра кiзi сыныхтағ иртiбiскен.

Амды ээк-сырай паза пластика хирургия пöлиинде Хакасия пазы Валентин Коноваловтың чахиинаң кинек олғаннарға паза улуғларға даа наркоз пастыра тiс имнеӌең кабинет азылған. Аның алнында тiс ағырии улғаат парған кинек олғаннарны имнирге Хызылчарзар ал чöрӌеңнер.

Тiс имнеӌең наа кабинеттi пайрамни азарға Хакасия пазы Валентин Коновалов паза хабарӌылар килгеннер. Оларны Г.Я.Ремишевскаяның адынаң республика имнег туразының ööн имӌiзi Алексей Тихонович удурлаан. Ол пу кабинет хайди азылғаннаңар чоохтап пирген.

Хакасия пазының чахии хоостыра наа кабинеттi азарына паза наа оборудование аларына республика бюджедiнең 20 миллион салковай пирiлген. Iдöк тiс имнеӌең пöлiкке наа имӌiлер алылған. Ол тöрт имӌi пеер Хызылчардаң килген. Прайзы чииттер. Оларға имнег туразында наа кабинеттер тимнеп пиргеннер. Тiс имнеӌең пöлiкте УЗИ аппарады, компьютер, ағырчатханнарға öнетiн креслолар турғлапчалар. Мында ööнiнде олғаннарны имнирлер, че iдöк кинек улуғ частығларға имненерге оңдай пирчелер. Имӌiлернiң наркоз пастыра имнир опыттары пар. Хакасияда iкi муң азыра кинек олған cаналча. Оларның аразында психика ағырығларынаң ирееленчеткеннер пар. Андағларнаң иптiг чоохтазарға паза часхар турарға килiсче.

Алында, мындағ тiс имнеӌең öнетiн кабинет чохта, олаңай тiс имнеӌең пöлiкте тicтi, имнебин, суура ла тартыбысчаңнар. Соонаң, тiс чохта, чахсы азыран полбин, кiзiлер iстi ағырығларына хаптыр сыхханнар.

Амды пу кабинетте имнег полызиин алар теес пу чылның декабрьына теере. Пастап неделяда iкi хати тоғынарға кöрiл парған полза, амды кӱннiң сай кiзiлернi имнирге килiзер. Кӱнде 1-2 кiзiнi имнепчелер.

Улғаат парған тiс ағыриинаң ирееленчеткен олғанны ӱс-тöрт кӱнӌе, имнег туразында чатырып, имнепчелер. Анаң ибзер нандырчалар. Ағырчатхан олғаннар пасха чирде истенминчелер нооза.

Хакасия пазы Валентин Коновалов имӌiлерге тӱзiмнiг тоғынарға алғаан паза, кирек полза, полыс пир турарға молӌаан.

Сом Дмитрий Сунчугашевти