Донор чӧріміне хабасчатхан марафон
08.09.2023
Хабарлар
Марафонец Артём Алискеров
Хазых. Ӱртӱн айының 4-ҷі кӱнінде донор чӧріміне хабасчатхан #ДавайВступай! тиксі хазна марафоны пасталған
Ол прай регионнарда кічіг хырлас айының 10-ҷы кӱніне теере иртер. Марафонның пӧгіні – чиит ӧткін паза хазых кізілерні пос кӧңнінең тикке донор поларына тартары. Чӧрім ӧзім чілии (костный мозг) паза гемопоэтическай стволовой клеткалар донорларының федеральнай регистрін тӧстееннең пір чыл толғанына чарыдылған.
Хазнаның прай регионнарында донор чӧріміне чарыдылған лекциялар, акциялар, марафоннар, флешмобтар иртчелер. Ӱртӱн айының 4-ҷі кӱнінде Республикадағы хан кінінде #ДавайВступай! акция ирткен. Хан кінінің тоғынҷылары Н.Ф.Катановтың адынаң Хакас хазна университедінде студенттерге донор суриина чарыдылған лекция хығырғаннар.
Проект Россияның Халыхтар палатазының хан донорствозынҷа координационнай чӧбі, хазнаның спорт министерствозы, баскетбол федерациязы, футболның Национальнай лигазы хабазиинаң иртірілче. Анда «Имҷі-волонтёрлар» тиксі Россиядағы халых чӧрімі, «Россияның Хызыл Кірӧзі» халых организациязы араласчалар.
Чӧрім хоостыра ӱртӱн айының 1-ғы кӱнінең сығара кічіг хырлас айының 10-ҷы кӱніне теере ӧзім чілии донорствозын сабландырчатхан ӧӧн кізі Артём Алискеров кӱннің 42 километр чӱгӱрче.
Артём Алискеров #ДавайВступай! проекттің паза «Ікінҷі Чуртас» ӧзім чілии донорствозы тилізіне хабасчаң фондтың тӧстегҷізі полча. Ӱртӱн айының 4-ҷі кӱнінде ол Ағбанда полған. Че изі чохтанып, хабарҷыларнаң тоғас полбаан. Федеральнай регистр спикері, Кировтағы федеральнай имнег-биология агентствозының гемотология паза хан алҷаң наука-істезігліг институттың донорство тилізі пӧлиинің пастығы Наталья Малышева Артём Алискеровтаңар чоохтап пирген.
34 частығ Артём Алискеровтың нинҷе-де чыл мының алнында онкология ағырии табыл парған. Ӱс чыл имненіп, 31 хати химия терапиязын ирткен соонда хазыхтанып алған.
– Артём лейкознаң ағырған. Пис чыл мының алнында ағаа пу диагнозты турғыс пиргеннер. Имненген туста аның чуртасха кӧрізі алыс парған паза, ағырығны чиңіп алған даа полза, ол хайдағ даа туста «усхун» парарын пілінче. Аннаңар Артём чуртазын рекордтар толдырарынаң палғалыстырарға сағынча. 2021 чылда халғанҷы химия терапиязын ирткен соонда 10 кӱн пазынаң ол Эверестке сығып алған. Анаң хысхы Байкалда пол килген паза ӱр чӱгӱрген, пос салынмаан. Амды наа пӧгіннер турғысча.
Артём чӱгӱріснең ӧзім чілии донорствозын сабландырарға, чонның хайиин тартып аларға кӱстенче. Прайзына аннаңар чоохтапча. Кізілер донорствоның пу кӧрімінеңер пір дее ниме пілбинчелер. Че сынында интернетте аннаңар хығырып аларға чарир. Полған на хазых кізі донор пол полар оңдайлығ. Ӱс чыл имненіп, Артёмнаң хада палатада чатхан илееде арғыстары чуртастаң парыбысханнар. Олар донорларны сағып полбааннар, – теен Наталья Малышева.
Артём Алискеров Улан-Удэ городтаң чӱгӱріп пастаан. Ағбанзар ӱртӱн айының 4-ҷі кӱнінде читкен. Пу аның тӧртінҷі городы полды. Олох кӱн ол Кемеров облазынзар сығыбысхан. Мындағ оңдайнаң марафонец пістің хазнаның 72 городында пол килер. Аннаң хада машиналығ Наталья Малышева полча, хазиин ырахтын имҷілер хайығда тутчалар. Марафонец полған на ӱс кӱн ханын сыныхтаға пирче. Наталья Малышеваның чооғынаң, имҷілер Артёмны чарым марафон алай эстафета оңдайынаң чӱгӱрерге чӧптееннер. Че ол ынабаан.
Артём Алискеров пістің республиканың ӧӧн городында пол килгені – улуғ талаан. Че ағаа тоғаспааны ачырғандырча. Аның улуғ нимес роликтерін социальнай сетьтерде кӧріп аларға чарир.
Амғы туста Федеральнай регистрде 205 муңҷа ӧзім чілии донорынаңар искіріг пар. Чыл сай аны 5 муң азыра хазна чуртағҷызы кирексіпче, ол санда 900 пала. Хырығ озариндағы регистрлерзер айланмас ӱчӱн, донорлар санын 500 муңа читіріп алары пӧгінде турча.
Ӧзім чілии трансплантациязын кирексіпчеткен кізее туған полбинчатхан донорны позы чуртабинчатхан регионда таап алчалар. Аннаңар хазнаның полған на регионында донорлар поларға кирек. Регистрде пазын салар ӱчӱн, 2-3 миллилитр хан пирібізерге читче.
– 2019 чылда Хакасияда 16 кізі пастағы типирование иртібіскен, 2023 чылда – ікі хати 49-зар кізі. 138 кізі ӧзім чілии донорлар регистріне кіріп алған. Олар донорлар нимес. Ӧзім чілии донорлар регистрі – ол ӧзім чілии донорлар пол полар кізілернің пірге базазы. Піреезі лейкознаң ағырыбысса, ағаа генетика саринаң килісчеткен кізіні таап аларға киректелер. Ол база хоостыра трансфузиолог имҷі донор тілепче. Андағ донор табыл парза, аны клиниказар хығырчалар. Ағаа прай хорадығларны тӧлеп пирчелер – чуртирына, азыранарына, имнег істезиин иртеріне, – теен Республикадағы хан кінінің транcфузиолог имҷізі Ирина Майорова.
Сом Интернеттең алылған
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
