Чиит имҷілерге – чурт
08.09.2023
Хабарлар
Хакасия пазы Валентин Коновалов чиит имҷілернең хада
Танығлығ кирек. Пӱӱл чиит имҷілерге чурт аларына республика бюджедінең 168 миллион салковай позыдылған
Республика ӱлгӱлері чиит специалисттерге чахсы оңдайлар тӧстепче. Школаларда, имнег тураларында істенчеткен оол-хыстарға Хакасия правительствозы чурт аларға полысча. Августта ӱгретчілер сертификаттар алғаннар. Пу неделяда, тізең, имҷілер чурт ээзі полыбысханнар. Специалисттерге тура клӱстері 5 cентябрьда пайрамни читірілген.
Чыылған чонны танығлығ кирекнең алғыстаан Хакасия пазы Валентин Коновалов. Хайди чоохтаан Валентин Олегович, правительство имнег киреенде істенчеткен улусха хабазарға кӱстенче. Имҷілерге ахчалығ полызығ пирілче, олар аймах льготаларнаң тузаланчалар. Имнег киреенҷе ӱгредігні алчатхан студенттерге стипендия ікі хати ӧскірілген. Ідӧк республикада ікінҷі чылы «Хакасияның хазых хайраллирының тилізі» программаның «Имнег киреенде кадрлар суриин пӧгері» подпрограммазынҷа cпециалисттерге чурт пирілче. Пылтыр пу программаҷа 31 имҷее чурт алылған полза, пӱӱл 50 кізее клӱстер читірілер. Ол пӧгіннең республика бюджедінең 2023 чылда 168 миллион салковай позыдылған.
Чылығ сӧcтер соонда мероприятиенің ӧӧн чардығы пасталған. Ол кӱн наа чурттарның ээлері 7 специалист полыбысхан: терапевт Мария Чебодаева, неонатологтар Наталья Михайлованаң Александра Марцевич, табырах имнег полызиин пирчеткен службаның имҷізі Ирина Деревянко, психиатр Юлия Семирьянова, стоматологтар Анатолий Сухихнең Юрий Трошкин. Имҷілернең чоохтасханда, кӧбізі Хакасияда пір чылҷа тоғын салған. Наталья Михайлованы, пӧзік устығ cпециалист чіли, Хызылчардаң хығырғаннар. Ол піcтің республиказар сӧбірезінең хада кӧскен. Александра Марцевич Кемеров облазынаң полтыр. Перинатальнай кінде 2022 чылдаң істен парир. Ағбанзар кӧскенде, абахай имҷее 250 муң салковай тӧлелген. Ағаа хоза Александра Васильевна ай сай 10 муң салковай алча. Пу тӧлег вузты наа ла тоозыбысхан паза хазна имнег туразында істенчеткен чиит специалисттерге кӧрілген. Аны А.В.Марцевич 2025 чылға теере алар. Неонатологтың хада хонғаны хирург-ортопед-травматолог полтыр. Сӧбіре пазы Г.Я.Ремишевскаяның адынаң республиканың имнег туразында істенче.
Имҷі-терапевт Мария Чебодаева, хыс фамилиязы Кичеева, Асхыс аймаандағы Чоғархы Тӧӧ аалдаң. 2021 чылда Хакас хазна университедін тоосхан соонда чир-суғҷыбыс Асхыстағы поликлиниказар тоғысха кірібіcкен. Ол сӧбіреліг. Хада хонғаны Виссарион Владимирович контрактча служба иртче. Амды ол Воронеж облазында. Ирепчінің ікі пала. Улии Тимур 3 частығ, Азарияа – пір час. Чебодаевтер Асхыста тураны арендаа суурчалар. Пір айда чиит сӧбіре 6 муң тӧлеҷең. Амды чурт сурии пӧгіл парғанына Мария Александровна прай чӱреенең ӧрінче. Ол чоохтаан:
– Поликлиникада пір чыл ла тоғынарға маңнанғам. Пӱӱнгі кӱнде паланаң одырчам. Чарым чыл пазынаң тоғысха сығарбын. Чуртты кӧріп аларға оңдай пиргеннер. Кӧңніме кірче. Он чыл пазынаң ол пісти полар.
Ідӧк ӧрінізін чазырбинчатхан стоматолог-ортопед Юрий Трошкин. Хакас оол, чӱрексініп, хараа тооза узубиндыр. Хайди таныхтаан имҷі, аның тӧреен-ӧскен чирі – Шира аймаандағы Чоохчыл аал. Пабазы фермер полча, іҷезі – ӱгретчі. Имнег киреен таллап, ол ууҷазының чолын пасхан. Надежда Николаевна Трошкина кӧп чыл фельдшер полып тоғынған. Стоматологка Юрий Сергеевич Хызылчарда ӱгренген. Академияны тоосхан соонда андох чуртирға халтыр. Чир-суғҷыбыстың киректері хомай нимес парған. Ол, городтың 8 № поликлиниказында істеніп, кізілернің тістерін имнеҷең. Че пылтыр ол Ағбанзар килібіскен. Имҷі cағыстарынаң ӱлескен:
– Узымны тилідерге пӧгініп, стоматолог-ортопедке ӱгреніп алғам. Пуох кӧстегҷе тоғынарға сағынғам. Поликлиникада пос орын чохтаңар, Хакасияда тоғыс тілеем. Мині республиканың стоматология поликлиниказынзар алып алғаннар. Ортопедия пӧлиинең Леонид Петрович Чанков устапча. Піс ӧӧнінде льготалығ улуснаң тоғынчабыс. Арендаа пір пӧліктіг чуртты суурғам. Аның ӱчӱн 16 муң салковай ай сай парыбысчаң. Мағаа Хакасияда имҷілерге чурт пирчелер тіп чоохтааннар. Че хаҷан теес чидерін пілбеем. Тоғысха пылтыр октябрьда кіргем, пір чыл пазынаң чурт алдым. Чал ахчазына хомзынминчам. Хызылчарда ол синӧк алҷаңмын. Ибде тоғынарға хай-хай истіг полтыр.
Амғы туста хазых хайраллаҷаң министрнің тоғызын Павел Шоев толдырча. Павел Георгиевичтің таниинаң, 2023 чылда министерство имҷілерге 32 чурт ал салған. Ведомство, ахча ӱзӱрлеп алза, пӱӱл специалисттерге 50 нимес, 52 чурт алар тіп ізеніс пар.
Сом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
