Чайаачы олғаннар Москвада тоғасханнар
30.08.2023
Хабарлар

Кӧг ӱгретчізі Алина Туденева ӱгренҷілері Виталина Боргоякованаң
паза Анастасия Кискорованаң хада
Пресс-конференция. Москвадағы Новая Третьяковкада олғаннарның культура форумы ирткен. Анда Хакасиядаң араласхан олғаннар постарының кӧңнілерінең ӱлескеннер
Пылтыр андағ форум пастағызын на иртірілген. Пӱӱл орғaх айының 10 – 12 кӱннерінде Россияның ӧӧн городында хазнаның 89 регионының паза 13 хазнаның 12 – 17 частығ хоосчылары, артисттері, ырҷылары паза пасхазы пазох тоғасханнар, тиксі 2500 пала. Хакасияның прай пулуңнарының чайаачылары ідӧк Москвазар чӧргеннер. Пістің олғаннарны Ағбандағы креатив индустриязы школазының устағҷызы Владислава Калиновская паза Хакас национальнай олған искусство школазының ӱгретчізі Алина Туденева ӱдес чӧргеннер.
Чайаачы олғаннар улуғ городта хайдағ чапсых ниме-ноо кӧргеннерін Хакасияның культура министрі Светлана Окольниковаа паза СМИ тоғынҷыларына чоохтааннар.
– Мин Асхыста чуртапчам, – теен Александра Доможакова. – Асхыстағы олған искусство школазында хореографияа чӧрчем паза фортепианонаң ойнапчам.
– Мин ам на андағ палаа тоғасчам, хайзы пір саңай ікі аймах пӧлікте ӱгренче. Аннаңар сині Москвазар парарын ікінҷілес чох таллап алғаннар, неке, – таныхтаан министр.
– Александра форумда иң ӧткін тудынған, – хозылған Владислава Калиновская. – Ол анда Россияның саблығ артисттерінең сомға суурынған.
– Кемнең хада сомға суурынғазың? – сурған хызыҷахтаң Светлана Анатольевна.
– Александр Олешконаң, Егор Дружининнең, Евгений Мироновнаң, – нандырған Саша.
Александра Доможакова ідӧк аймах мастер-класстарда араласхан.
Н.Ф.Катановтың адынаң Хакас национальнай гимназиядаң Москвазар Виталина Боргоякова паза Анастасия Кискорова чӧргеннер.
Виталина 7 классха сыххан. Ол Асхыс аймаандағы Ӱс чул аалдаң, Дмитрий Владимирович паза Карина Турысбаевна Боргояковтарның иркезі полча. 5-ҷі классха гимназиязар кіріп алғанда, олған искусство школазынзар хомыснаң ойнирға ӱгренерге чӧр сыххан. «Пастағызын хомыснаң ойнирға аар полған, ам оой пілдірче», – тіпче чайаачы хызыҷах. Хомыснаң ол Россияның паза Хакасияның саблығ артизі Евгений Улугбашевтің «Ат чарызы», алтай кӧгҷі Артём Оминнің «Ойын» кӧглерін ойнапча. Паза олған искусство школазы хойнындағы «Тигір хуры» ансамбльға чӧрче.
Настя Кискорова Таштып аймаандағы Чыланнығ аалда тӧреен. Ол ідӧк олған искусство школазында ӱгретчі Алина Туденеваның холында хомыснаң ойнирға ӱгренче.
– Минің хомыснаң ойнирға ӱгреніп аларым тың килген. Пасталығ класстарда Чыланнығдаң сығара Пыдырах аалзар школа автобузынаң ӱгренерге чӧрҷеңмін. Уроктар соонаң ибзер парарға киректелҷең, аннаңар кружоктарға, секцияларға халҷаң оңдай чох полҷаң. Хакас гимназиязар ӱгренерге кіріп алғанда, анда хомысха ӱгретчеткеннерін піліп алғам. Іди олған искусство школазынзар чӧр сыххам, «Тигір хуры» ансамбльда араласчам. Ансамбльнаң хада Новосибирск городсар чӧргебіс паза гимназиядағы ӱлӱкӱннерде сыбыра ойнапчабыс, – теен Настя.
Москвада мастер-класстар паза Россияның саблығ артизі Дима Биланның сарнааны Виталинаның паза Настяның кӧңніне кірген.
Хакасияның культура министерствозында ирткен пресс-конференцияда прай сигіс пала араласхан. Кирилл Малыхин Асхыс аймаандағы Пилтір аалдаң. Ол андағы олған искусство школазында аккордеоннаң ойнирға ӱгренче. Эмма Шефер Харатас городта чуртапча, М.Ю.Лермонтовтың адынаң Орыс драма театрынзар актёр киреене ӱгренерге чӧрче. Илья Волков Ағбан пилтірі аймаандағы Чапаев аалдаң. Ол ідӧк М.Ю.Лермонтовтың адынаң Орыс драма театрында узын тилітче. Екатерина Грибкова Ағбанда чуртапча, Д.И.Каратановтың адынаң олған хоос школазынзар чӧрче, креатив индустриязы школазында «Анимация» кӧcтегҷе піліс алча. Анастасия Соломатина ідӧк креатив индустриязы школазында ӱгренче.
– Пірее палалар самолёттығ пастағызын на учухханнар, аннаңар оларға прай ниме чапсых пілдірген. Форумда олғаннар ӧткін тудынғаннар. Лекцияларда сурығлар пир турғаннар. Пу чорых оларның сағыстарында ӱрге халар, – теен кӧг ӱгретчізі А.Б.Туденева.
– Піс хазнаның ӧӧн городынаң ырах чуртапчабыс, че андағ даа полза, олғаннарыбысты марығларға ызарға кӱстенчебіс. Олох туста кічіг чир-суубыста улуғ мероприятиелер иртірчебіс. Кӧзідімге, «Лето в солнечной Хакасии» паза «Осень в Саянах» чайаачы школалар тӧреміл тоғынчалар. Олғаннарнаң культураның саблығ кізілері тоғас парыбысчалар, – таныхтаан культура министрі Cветлана Окольникова.
Москвадағы олған культура форумында пістің палалар пасха регионнарның артисттерінің сарыннарын искеннер, сіліг теелбектерін кӧргеннер.
Сом авторни
Автор :
Татьяна Тютюбеева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде