Ӱгретчілерге – алынҷа хайығ
23.08.2023
Хабарлар
Хакас тілі секцияның араласчылары
Ӱгредіг. Ирткен неделяда ӱгредіг киреенде істенчеткеннернің улуғ конференциязы полған. Анда Хакасия пазы Валентин Коновалов ӱгредігнің тилізінеңер чарытхан
– Россия президенті школаларда воспитаниее алынҷа хайығ саларға чахығ пирген. Анзы ӱгретчілерге хоза тоғыс, аннаңар пу чахығны толдырчатхан ӱгретчілерге хоза ахча тӧлирдеңер чарадығ алғам. Ӱртӱн айынаң пасти ол тӧлел сығар. Ӱгретчілерге чал ахчазын ӧскіреріне республиканың правительствозы 100-че миллион салковай позыдар.
Аннаң пасха, орғах айында прай ӱгретчілер пір хати 5-ер муң салковай аларлар. Чал ахчазынаң пасха піс чурт суриин пӧгерге кӱстенчебіс. Пу чылдаң пасти аалларзар тоғынарға парған ӱгретчілерге чурт аларына тиксі 50 миллион салковай кӧр салғабыс. Мыннаң мындар піс пу программаны алғыдарбыс.
Республика национальнай проекттерде ӧткін араласчатхан сылтаанда, піске школаларны, олған садтарын пӱдірер оңдай пар. 1 сентябрьда Ағбанда наа школа олғаннарға ізиин азар. Килчеткен чылларда Ағбанда, Алтай, Асхыс, Таштып аймахтарында ӱгредіг учреждениелері тимге сых парарға киректер. Пӱдірерінең пасха, піс школаларда тыхтағ тоғыстарын апарчабыс, материально-техническай базаларын нааҷылапчабыс, компьютер кабинеттерін асчабыс паза даа пасхазы, – таныхтаан чооғында Хакасия пазы Валентин Коновалов.
Августтағы конференцияда Хакасияның Ӧӧркі Чӧп кнезі Владимир Штыгашев, прайзын алғыстап, ӱгретчілер династияларына алғыстас пічіктерін читірген. Асхыс аймаандағы Чаптыковтар ӱгретчі сӧбірезінің тиксі істеніс стажы 100 азыра чыл. Сыйыхтарны Ольга Карамчакова, Галина Чаптыкова паза Владимир Карамчаков алғаннар. Ағбандағы Кузьминнер – Яроштар – Саловтар – Атюшкиннер 150 азыра чыл ӱгредіг киреенде істен салғаннар. Алғыстастарны Любовь Салова, Марина Атюшкина паза Виктория Атюшкина алғаннар. Алтай аймаандағы Риккиннер – Шеломенцевтернің тиксі стажы 200 азыра чыл. Сыйыхтарны Татьяна Риккина, Анатолий Риккин, Вероника Антонова паза Юлия Риккина алғаннар. Пии аймаандағы Васильевтер – Евграфовтар – Русановскийлер – Козелковтар – Кутергиннер – Гетманенколар – 250 чыл азыра. Алғыстастарны Надежда Русановская, Любовь Евграфова, Елена Евграфова, Елена Кутергина паза Евгения Гетманенко алғаннар.
Хакасияның ӱгредіг паза наука министерствозы, тізең, пірге хазна сыныхтағларын 100 баллға тудыбысхан олғаннарның ӱгретчілеріне Аарластығ пічіктер паза ахчалығ сертификаттар читірген. Сыйых алғаннарның санында Н.Ф. Катановтың адынаң национальнай гимназияның ӱгретчілері полғаннар. Олар – тархын паза обществознание предметтернің ӱгретчізі Лилия Олеговна Ахпашева паза орыс тілі паза литература ӱгретчізі Екатерина Владимировна Субракова.
Кибірліг конференцияның ікінҷі кӱнінде ӱгретчілер секцияларға чарылғаннар. Республиканың ӱгредіг тилізінің паза квалификация кӧдірерінің институдында олған садтарындағы хакас группаларның воспитательлері паза пасталығ класстарның ӱгретчілері чыылысханнар. Анда олар хакас тілінің ӱгредіг синін наа стандарттар хоостыра кӧдірердеңер чоох алысханнар.
Сом Дмитрий Сунчугашевти
Автор :
Оксана Ивандаева
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
