Чиит ӱгретчілерге – чурт сертификаттары
23.08.2023
Хабарлар

Чурт сертификаттарының ээлері Алексей Кольчинаев, Юлия Кулемеева паза Владимир Торточаков
2023 чыл – Ӱгретчі паза ӱгредіг кӧстегҷізі чылы. Алексей Кольчинаев, Юлия Кулемеева паза Владимир Торточаков пӱӱл дипломнар алдылар. Тӱрче полза олар олғаннарны ӱгредіп пастирлар
Алексей Кольчинаев Н.Ф.Катановтың адынаң Хакас хазна университедінде ӱгренген. Пӱӱл магистратураны тоосты. Институтта ӱгренчеткендӧк, студент тоғынып пастаан. Ол Таштып аймаандағы Мадыр аалдағы школада тархын, обществознание, хакас тілі паза литература предметтерні апарған. Аалда тоғынчатхан тусха ағаа чурт пирілген. Аның тӧреен-ӧскен аалы, тізең, Асхыс аймаандағы Индіркі Тӧӧ.
– Тоғыс тілепчеткенде, тӧреен аалымдағы школада орын чох пол парған. Аннаңар мин Таштып аймаанда істеніс чолын пастаам. Пір чыл аразына школаа, ӱгретчілерге паза олғаннарға кӧнік парғам, – тіпче Алексей Юрьевич.
Юлия Кулемееванаң Владимир Торточаков пастағы курстаң университет тоосханҷа хада ӱгренгеннер. Чииттер Н.Ф.Катановтың адынаң Хакас хазна университедінде физическай культура паза ОБЖ кӧстегҷе ӱгренгеннер. Ідӧк студент тузынаң школада тоғынып пастааннар. Юлия Руслановна – Ағбандағы 26№ школада, Владимир Альбертович – Асхыстағы лицей-интернатта. Амғы оңдайлар хоостыра студенттерге 3-ҷі курстаң пасти тоғынарға чарир осхас.
Чииттер пӱӱл дипломнар алдылар. Амды олар ӱгредігліг специалисттер. Наа ӱгредіг чылында Юлия Кулемеева Асхыс аймаандағы Тӧӧ пазындағы ортымах школада тоғынып пастир, Владимир Торточаков студент тузында тоғынған орнында халған.
– Иртеннең обедке теере мин ӱгренгем, анаң тоғынарға парҷаңмын, – чоохтапча чиит специалист Юлия Кулемеева.– 3-ҷі класстағыларны ӱгретчеңмін. Мин позым школада ӱгренчеткенде, ОБЖ мағаа хынығ нимес, ирістіг предмет чіли пілдірген, че аны позым апар сыхханымда, кӧрізім алыс парыбысхан. Ӧӧні ол пос предмедіне хынары полтыр. Андада уроктар хынығ иртерлер, ӱгренҷілер дее аны сизінерлер. Прай ниме ӱгретчінең палғалыстығ нооза.
Университетті тоосханда, Юлия Кулемееваны олимп резерві училищезінзер (техникум) методист полып тоғынарға хығырғаннар. Че ол олғаннарны ӱгредерін таллап алған. Ол ӱгретчілер cӧбірезінде ӧскен нооза. Аның пабазы Руслан Владимирович Казанов аалдағы школаның директоры паза физическай культура ӱгретчізі полча, іҷезі Нина Борисовна – школа алнындағы класстың воспитательі. Паза даа пасха туған-чағыннары ӱгредіг киреенде істенчелер.
Владимир Торточаков Асхыс аймаандағы Оот пилтірі аалдаң. Асхыстағы лицейні тоосхан, интернатта чуртаан.
– Ӱгренген школамның ӱгретчілері мағаа амды хада тоғынчатхан арғыстар пол парғаннар. Анзынаң кӧмес аар пілдірче. Че мағаа ӱгредіг кӧстегҷім Арнольд Эдуардович Топоев чахсы полысча. Школада ӱгренчеткендӧк, ол мағаа физическай культура паза ОБЖ кӧстегні таллирға чӧп пирген. Анаң школазар тоғынарға хығырған. Анда мин пятница, суббота сай тоғынҷаңмын, пасха кӱннерде ӱгренҷеңмін. Кӧстегҷім мағаа кӧп полысча, ӧӧнінде пічіктернең паза ӱгредіг программазынаң, – сағызынаң ӱлесче Владимир Альбертович.
Хакасияның правительствозы аалларның тилізіне улуғ хайығ салча. Ол санда школаларзар ӱгретчілер тартып аларына. Іди пӱӱл аалларзар тоғынарға парған пӧзік ӱгредігліг чиит ӱгретчілерге чурт аларына 50 миллион салковай позыдылар.
Алексей Кольчинаев, Юлия Кулемеева паза Владимир Торточаков пу программаның араласчылары полчалар. Ӱгретчілернің августтағы конференциязында оларға паза Алтай, Ағбан пилтірі аймахтарының чиит специалисттеріне Хакасия пазы Валентин Коновалов чурт сертификаттарын читірген.
– Чурт аларына сертификат пирілгені кӧңнім улам кӧдірче. Мадырда чурт кӧп садылбинча, аннаңар мин тураны Таштыпта тілепчем. Аалда ӧскенде, чирде чуртирым килче, квартирада истенминчем. Сертификат тӧрт пӧліктіг тураа чидерге кирек. Тоғысха ибдең чӧр турарбын. Таштыптаң Мадырға теере 40-ча километр полар, неке. Итсе-де, машинам чоғыл. Чурт алып алзам, праваға ӱгренерге кирек полар.
Сағынчам, істеніс чолын наа ла пастапчатхан чииттерге мындағ хабазығ хайди даа кирек. Аалларзар оол-хыстар парарға хынминчалар нооза. Чал ахчазы тӧбін, чурт суриин пӧгерге кирек, – ӧрінізін чазырбинча чурт сертификадының ээзі.
Мыннаң мындар Хакасия правительствозы чиит ӱгретчілерге чурт сертификаттарын пирерін узарадар.
Сом Дмитрий Сунчугашевти
Автор :
Оксана Сунчугашева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде