Саарбах оолахтар хайнаң чапсытханнар
18.08.2023
Хабарлар
Хакасияның чон узы Сергей Чарков паза ырҷы Аржан Тодош фестивальның кічіг араласчыларынаң хада
Фестиваль. Пу кӱннерде Боград аймаандағы «Хара суғ» тынағ базазында чайаачы олғаннар аразында «Тағларның тіріг ӱні» фестиваль-марығ ирткен
Мындағ чахсы ӱлӱкӱнні Хакасиядағы олған-узахха «СаяныЭкоТур» туризм компаниязы Президенттің культура пастағлары чыындызы хабазиинаң сыйлаан. Проектте аралазып, «СаяныЭкоТур» ООО-ның тоғынҷылары, республиканың аал-городтарынҷа чӧріп, хайлап-сарнап полчатхан палаларны тілееннер паза оларны «Хара суғ» тынағ базазынзар хай мариинда аралазарға хығырғаннар. Прай 52 пала чайаачызын сынирға чаратхан.
Олар орғах айының 11-ҷі кӱнінде тынағ базазында чыылысханнар. Пастағы кӱнінде араласчыларны искусство устары Сергей Чарков, Вячеслав Албычаков паза Аржан Тодош хайлирға паза хакас кӧг тиріглерінең (чатхан, тимір хомыс, хобырах) ойнирға ӱгреткеннер. Анаң иирде чоох-чаахнаң одырғаннар, танысханнар, сарыннар толдырғаннар, тынанғаннар.
Ікінҷі кӱнінде кічіг хайҷыларның аразында хазыр арға-мӧрій пасталыбысхан. Олғаннар кӧгнең хайдағ синде айғасчатханнары іле кӧрінген. Хайзы, хакас кӧг тириинең ус ойнап, ӧткін ырлаан. Кем-де пастағызын на сценазар сыххан, аннаңар сала туртухчатханы харахха тасталған. Андағ даа полза, марығ пӧзік синде ирткен.
Мастер-класстар паза марығлар аразында, олғаннар эрінмезіннер, телефоннарында одырбазыннар тіп, Шира аймаандағы Азах Сӧӧт аалдағы школаның ӱгретчізі Евгений Фрузоров саарбахтарға аймах спорт ойыннарын иртірген. Ол позының аймаанаң фестивальда аралазарға сарынҷы оолахтар Тимур Арыштаевті паза Анатолий Танзыбаевті ағылған. Хонҷых Орджоникидзе аймаанаң «Тамырлар» хакас национальнай культура кіні араласхан. Ӱгретчі Тарине Сулекова 10 – 13 частығ тӧрт оолахты ағылған. Ідӧк таштыптағылар, аршаннардағылар, чарковтағылар, ағбандағылар, сорығдағылар паза пасхазы ӧткін хайлааннар. Асхыстағы оолахтар «Алтын Арығ» алыптығ нымахтың ӱзіктерін морсымнығ ысханнар.
Ӱзінҷі кӱнінде фестивальның араласчыларын, чиңісчілерін паза олғаннарны чайаачы кирекке кӧніктірчеткен ӱгретчілерні алғыстастығ пічіктернең, дипломнарнаң таныхтааннар. Мындағ алғым хай ӱлӱкӱніне Тағлығ Алтайдаң паза Тувадаң ӧнетін аалҷылар хығыртылғаннар. Халғанҷы кӱнінде Гала-концертте белорустарның паза поляктарның диаспоралары фестивальға чыылысхан чонға ыр-сарыннар читіргеннер.
Хоза таныхтирға кирек, «Хара суғ» тынағ базазынаң хости «Туманный» санаторий орныхча. Фестиваль араласчыларын анда кӱнде ӱс хати тосхымнығ азырааннар. Чайаачы олғаннар санаторийде тынанчатхан аалҷыларға концерт кӧзіткеннер. Ол санаторийде, тиксі Россиядаң киліп, хазыхтарын пиктепчелер. Аннаңар хайны испеен кізілер саарбахтарның концертін чапсып кӧргеннер, ізіг айа сапханнар.
Ӱc кӱн табырах ирт парған. Пу тус аразына олғаннар удур-тӧдір улам чағын танысхлап алғаннар. Иблерінзер таразарға даа маңзырабинчатханнар.
– Мин Ағбандағы Кенельнің адынаң музыка школазында ӱбӱрҷең кӧг тиріглеріне ӱгренчем паза «Ынархас» олған студиязынзар теелбектенерге чӧрчем. «Тағларның тіріг ӱні» фестиваль-марығда мин хакас тіліне, культуразына улам тың хыныбысхам. Анда тимір хомыснаң ойнирға ӱгреніп алдым. Ідӧк ыыхнаң ойнирға сағынчам, – тіпче 10 частығ Петя Тюкпиеков.
Сом «СаяныЭкоТур» ООО-ни
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
