Хакасия пазына кандидаттар аразында пастағы дебаттар иртті
16.08.2023
Хабарлар

Табығлар-2023
РТС телеканалдағы кӧні эфирҷе ирткен дебаттарда Хакасия пазына кандидаттарның прайзы араласхан: Валентин Коновалов (КПРФ), Михаил Молчанов (ЛДПР), Сергей Сокол («Единая Россия») паза Владимир Грудинин («Коммунисты России»).
Кӧні эфир техника саринаң читпестернең пасталған – микрофоннар тоғынмин сыхханнар. Че 8 минута пазынаң ол читпестер тӱзеділген. Кандидаттарның полғанына ла ікілер хати пис минута чоох тудар оңдай пирілген. Нименеңер чоохтанғаннар кандидаттар? Тартыс-таластарны хыя алза, чоохтазығда кандидаттар мындағ сурығларға теелгеннер.
Валентин Коновалов Хакасияның амғы правительствозы пос тоғызынаң экономикада хайдағ чидіглерге читкенінеңер, ідӧк Сорығдағы ГОК-ты хайраллирына хайдағ тоғыс иділгенінеңер чоохтап пирген.
Михаил Молчанов регионның хайзы отрасльларында сидіксіністер парынаңар искірген, ідӧк экология паза сӧп-сап реформазының сурығларына теелген.
Сергей Сокол регионның экономиказын тилітчең ӱрге кӧрілген программазында Хакасиязар газ тартары парын таныхтаан, «сӧп-сап» паза чал ахчазы сурығларын кӧдірген.
Владимир Грудинин регион позы ахча тоғынып пастаза ла, Хакасияның экономиказы кӱcтіг полып алар тіп искірген, анзына республикаа чахсы пілістіг кадрлар киректелчеткенін таныхтаан.
Дебаттарның ікінҷі чардығы экономиканың аймах сурығларына чарыдылған, че кандидаттар эфир тузынаң пос кӧрізінең тузаланғаннар.
Валентин Коновалов республиканың тиліс стратегиязы чуртасха хайди кирілчеткенінеңер чоохтаан. Регионның ниме-ноо сығарчатхан отрасльында хайдағ ӧзіс парынаңар искірген.
Михаил Молчанов Хакасияда кізілер (ол санда палалар) ӱреені ӧсчеткенінеңер чоохтаан. Перинатльнай кіннің тоғызына, имнег кадрлары чидіспинчеткеніне теелген.
Сергей Сокол Хакасияның алнында хайдағ регионнарда тоғынғанынаңар чоохтап пирген. Сӧп-сап реформазынҷа паза ӱгретчілернің чал ахчазынҷа сидіксініcтер парына хайығ айландырған.
Владимир Грудинин чуртағҷыларға паза пос киреене тарифтердеңер чоох апарған. Харатасты паза Ағбан пилтірін Ағбандағы ТЭЦ-ке хозарынаң тоғыр полғанын сағысха кирген.
Дебаттар 40 минутаҷа парғаннар. Пазағы дебаттар пӱӱн радио эфирінҷе «Хакасия ФМ» паза «РТС Радио» радиоканалларда иртер тіп кӧрілче.
Автор :
Тимнеен Альберт Толмашов
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 1 | 2 |
Кӱн таңмазы
Хакасияда
Россияда
Тилекейде