Иң кӱстіглерге – сыйыхтар
11.08.2023
Хабарлар
Вадим Феалковский, Николай Карамашев,
Станислав Челтыгмашев паза спорт министрі Сергей Кочан сыйыхтас тузында
Спорт. Ағбанда пӱӱл пӧзік чидіглерге читкен спортсменнерні чеестееннер
Кибір хоостыра Физкультурник кӱнін орғах айының ікінҷі чечімезінде таныхтапчалар. Хакасияның физическай культура паза спорт министерствозы ӱлӱкӱнге чарыдылған пастағы мероприятиені 9 августта иртірген. Пайрамны спорт министрі Сергей Кочан асхан. Чыылған чонзар айланып, Сергей Владимирович чоохтаан:
– 2023 чылда Хакасияның спорты чидіглерге пай полды. Пістің спортсменнер, аймах-пасха синде иртчеткен марығларда чиңістер тудып, республиканың адын кӧдірчелер. Ӱс чыл мының алнында Россияның піріктірілген командазынзар 60-ҷа кізі кірген полза, амғы туста – 100 артиинаң спортсмен. Анзы уғаа чахсы. Ӱр ниместе Ағбанда сыныхтағнаң «Азияның олғаннары» чоннар аразындағы ойыннар оргкомитедінің делегациязы пол килген. Делегация араласчылары спорт инфраструктуразына пӧзік паалағ пиргеннер. Оргкомитет чаратса, 2028 чылда Хакасиянаң Тува улуғ марығны удурлирлар. Чарадығ килзӧк, піс аймах спорт кӧрімнерінҷе командалар тӧстеп пастирбыс. Аарлығ спортсменнер паза тренерлер, сірерге пик хазыхтығ поларға, чиңістер тударға алғапчабыс. Прайзын ӱлӱкӱннең!
Пайрам тузында илееде кізее сыйыхтар читірілген. Оларның санында Дарья Токояковаа (ипчілер кӱрезі), Вадим Феалковскийге паза Николай Карамашевке (ММА), Инна Балахчинаға (стол теннизі), Дина Адыгаеваа (охчаадаң атары). Балахчинанаң Адыгаева – хазии уйан спортсменнер. Ідӧк таныхтааннар Наталья Малышеванаң (ипчілер кӱрезі) Татьяна Бастаеваны (аар атлетика). Хакас абахайлар сборларға парыбыстырлар. Россия чемпионы Наташа Малышева кӱскӱзін тилекей чемпионадында аралазарға кирек. Таня ідӧк марыға тимненче. Спортсменнернең хада тренерлерні чеестееннер. Спорт ведомствозының сыйиина Марат Кичеев, Владимир Чучунов, Станислав Челтыгмашев, Ирина Мордакина, Юрий Аёшин, Владимир Еркибеев паза пасхазы турысханнар.
Вадим Феалковский Кызлас аалдаң. Чиит кізі Хакасияның ММА-ҷа пастағы спорт узы полча. Ол нормативті пылтыр Новосибирскте толдырыбысхан. Пӱӱл арғызы Николай Карамашевнең хада Россия чемпионадында аралазып, хола медаль утхан. Чир-суғҷыларыбыс тренер Станислав Челтыгмашевтің холында устарын таптапчалар. Хайди таныхтаан Вадим, ол пастап олаңай кӱресте узын сынаан. Пастағы тренері – Алексей Яковлевич Шулбаев. Хакас оол олаңай кӱресте улуғ чидіглерге читпеен дее полза, чуртазын спортнаң палғалыстырыбызарға чаратхан. 9 класс тоосхан соонда Вадим Ағбандағы олимп резерві училищезер (техникумзар) ӱгренерге кірібіскен. Аны тоозыбызып, армияда служба иртібіскен. Амды ХГУ-да пілістерін алғытча. ММА-наң Феалковский ікінҷі чылы айғас парир. Ол 56,7 кг кӧдірімде тудысча. Пу кӱннерде 24 частығ оол арғыстарынаң хада «Кӧс чӧрчеткен чоннарның харбазығлары» марығда аралазар. Турнир Хызылда иртер.
Сыйыхтас «Хакас Республиканың кибірліг спорт кӧрімнері паза ойыннары» кинденің презентациязынаң узарадылған. Аны авторлар ӧмезі – А.Н.Асочаков, М.А.Кильчичакова, Е.Д.Краснова, Е.И.Орел, С.Н.Смирнов, И.К.Циклинский, Т.Н.Чупина, А.А.Шереметов – ікі чыл тимнеен. Тоғыста кӱрестеңер, тобиттеңер, ат чарызынаңар, хапчаң тастаңар паза охчаадаң атарынаңар чоохталча. Ол хакас паза орыс тіллерінең сығарылған. Наа пособие тархын танығларына паза сомнарға пай. Аны тимнеп, авторлар саблығ этнограф В.Я.Бутанаевтің, тренер А.Г.Кильчичаковтың тоғыстарынаң тузалантырлар.
Киндені тимнирінде Харбас кӧрімнерінің олимп резерві спорт школазының директор орынҷызы Сергей Смирнов ӧткін араласхан. Сергей Николаевич кӱрес ӱчӱн нандырған. Хайди ол таныхтаан, кӱресче правилоларны тӱзедеріне илееде тус парыбысхан. 2023 чылда нааҷылалған правилоларҷа кӱресче Хакасияның чемпионады, первенствозы паза кубогы иртірілген. Салтарларнаң прай тренерлер чарасханнар. Пӱӱл Ағбанда кӱресче секция тоғынып пастир. Аны апарар Виталий Григорьевич Чичинин. Cекцияа чӧрерге сағынчатхан улусха айланарға кирек пу адресче: Ағбан г., Кравченко ор., 11 З тура. Сентябрьда расписание полар. Тренировкалар тикке иртер.
Наа кинденің тиражы улуғ нимес. Чарыхха 150 экземпляр ла сыххан. Министр орынҷызы Елена Краснованың чооғынаң, ведомство ӱндезіглерні сағыпча. Оларны чыып, киндені наадаң cығарарлар. Аннаң тренерлер тузаланарлар.
Ідӧк пайрам тузында социальнай сетьтердеңер чоох парған. Сағыстарынаң тренерлер Ирина Мордакина, Кирилл Жибинов, ат спорт школазының директоры Татьяна Чупина паза пасхазы ӱлескеннер. Ӧӧн сағыс – кізілерге спортсменнернің чидіглерінеңер пілерге хынығ. Хакасия чуртағҷылары оларның ӱчӱн ӧрінчелер, медальларына поғдархапчалар. Аннаңар оол-хыстарға, оларны тимнепчеткен улусха социальнай сетьтернең ӧткін тузаланарға кирек.
Физкультурник кӱніне чарыдылған ӧӧн пайрам 11 августта Ағбанның тынағ паркында иртер. Ол пасталар 16.30 часта. Хакасияның спорт министерствозы прайзын тынанып аларға хығырча.
Сом Валерия Тамбовцевани
Автор :
Айара Чебодаева
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
