Республика правительствозы онарлап чылға алнынзар кӧрче
04.08.2023
Хабарлар
Анжелика Глазкованаң Николай Платошкин
Тоғазығ. Хакасия пазы халыхтар деятельі Николай Платошкиннең паза Хазна Думазының депутады Анжелика Глазкованаң тоғысчы тоғазығ иртірген
Хакасия пазы Валентин Коновалов 2 августта халыхтар деятельі, политолог, тархын наукаларының кандидады, дипломат «Наа социализм ӱчӱн» халыхтар чӧрімінің кнезі Николай Платошкиннең паза Россияның Хазна Думазының депутады, хазна пӱдіриинҷе паза законодательствоҷа комитедінің араласчызы Анжелика Глазкованаң тоғасхан. Олар Хакасиязар тоғыс чорығынаң килгеннер. Пу тусха халых чоннаң тоғазығлар иртірерге, ӧӧн социальнай объекттерде пол килерге маңнанғаннар.
Тоғазығда чоох регионның 2019 чылда пасталған 2030 чылға теере Тиліс стратегиязы чуртасха хайди кирілчеткенінеңер парған.
Хайди таныхтаан Валентин Коновалов, Хакасия правительствозы сығысчатхан сидіксіністерні паза хығыртығларны (пандемия, кидеркі санкциялар, хара тасха паза алюминийге паалар тӱскені) тӱзімніг тобырча. Тиліс хаалағлары тӧбін тӱспинчелер, олар ӧсчелер: республика пис чылның салтарларынҷа алынҷа кӧзідімнерҷе пастағызын на рекордтығ чидіглерге читкен.
Іди бюджет парыстары 2,5 хати ӧс парғаннар, ахчанаң піліснең устааны сылтаанда хазна алымының коммерческай чардығы прай даа чох иділген (пу чылда ол саңай чох пол парар). Хайзы социальнай кӧстеглерҷе ахчалығ хабазығ нинҷе-нинҷе хати ӧс парған: хазых хайраллирына, спортха, ӱгредіге, культураа паза чолларға миллиардтар салковай позыдылча.
Онарлап чылларнаң чыыл турған хайзы сидіксіністер пӧгілген: муниципалитеттернің полызығлар ӱчӱн чыыл парған алымнары чабылған, льготниктерге имнер алылған, ЖКХ сферазындағы алымнар чох иділген, чылығ пирері ізестіг иділген паза даа пасхазы.
Республика саринаң муниципалитеттерге ахчалығ хабазығ пілдірте ӧскірілген, 22 миллиард салковайға чағын.
Николай Платошкин муниципалитеттерге регион бюджедінзер «нииктелген оңдайҷа» кірчеткен налогтың 30 процентін муниципалитеттерге пирібіскенін пӧзік паалаан:
– Удаа ӧӧркі ӱлгӱ налогтарны позынзар тартча, сірер, тізең, муниципалитеттерні тилідер пӧгіннең ӱлесчезер.
Таныхтирға кирек, пу хабазығ сылтаанда Хакасия правительствозы орындағы бюджеттернің киректерін оңдайлап алған.
Халыхтар деятельі регион правительствозының, Валентин Коновалов устаан тус аразына, чидіглерін чахсы паалаан:
– Республика правительствозы, анзын хайди даа таныхтирға кирек, совет тузындағох чіли, пір чылнаң чуртабинча, ол онарлап чылға алнынзар кӧрче.
Николай Платошкин правительство аал хонииндағыларға (субсидиялар, компенсациялар паза тӧлеглер), ідӧк ӱгретчілерге паза имҷілерге (оларға квартиралар алылчатханы) хабасчатханын алынҷа таныхтаан.
Аннаң пасха, ол Хакасияда чарытхаа паза сӧп-сапты сығара тартарына тарифтер, пасха регионнарнаң тиңнестірзе, уғаа тӧбін полғанына таңнаан.
Николай Платошкин ідӧк республикада мындағ килкім онкология диспансері пӱдіріл парғанын таныхтаан. Анда хакасиядағылар ла нимес, ідӧк хонҷых регионнарның чуртағҷылары имнег полызиин алар оңдайлығлар нооза.
Хазна Думазының депутады Анжелика Глазкова позы саринаң Хакасияның ӱлгӱзі азых полчатханын таныхтаан. Чуртағҷыларнаң тӧреміл тоғазығлар, социальнай сетьтер пастыра палғалыс.
Валентин Коновалов Николай Платошкинге паза Анжелика Глазковаа Хакасияа хайығ салчатханы, республикаа хабасчатханы, регионның пастағларын тибіредеріне, федеральнай хабазығ кирексіпчеткен сурығларны пӧгерінде полысчатханы ӱчӱн алғызын читірген.
Сом Хакасия пазы пресс- службазыни
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
