Улуғ форумға тимненіс
03.08.2023
Хабарлар
Орғах айының 25 – 28 кӱннерінде Асхыс аймаанда чииттернің «Этнова-2023. Тёплая Сибирь» этно-турист форумы иртер. Аннаңар куратор Дарья Васильева алғыда чоохтап пирген
– Форумнаңар чоохтап пиріңер.
– Пӱӱл «Этнова» Казанов аал хыриндағы «Кӱг» хакас иблер комплексінде иртер. Аның ӧӧн пӧгіні – Хакасияның иң таланттығ паза чайаачы чииттерін пір орында чыып, оларны бизнес, кӧстегҷі паза даа пасха кӧстеглерге кӧніктірері.
Пӱӱл піс анда пис ӱгредіг программазын чуртасха кирербіс. Ол «Зелёный тренд». Анзы республикада чир-чайаанны хайраллирына чарыдылған. Ідӧк «ProМедиа», «Кӧстегҷі», «Чииттернің пос кирее» паза «Чииттер туризмі».
«Этнова» – ол кӧс чӧрчеткен форум. Піс чылдаң чылға аны пасха-пасха орында иртірчебіс. Ідӧк аның темазы паза площадкалары алысча. Іди ирткен чылда пос киреен апарарына ӧӧн хайығ салылған полза, пӱӱл – медиаа. Анда оол-хыстар сомға, видеоға суурарға, монтаж идерге кӧп ӱгренерлер, мастер-класстарда устарын тилідерлер.
– Форумда аралазар ӱчӱн оол-хыстар хайдағ таллағ иртчелер?
– Піс площадкалар хоостыра чииттерні таллапчабыс. 16 – 35 частығ студенттер, чиит ученайлар, идінҷектер, халыхчылар паза даа пасхазы «Россия чииттері» порталда от айының 31 кӱніне теере сурыныс пічіктерін артысханнар. Олардаң иң артых 100 кізіні таллирбыс. Анда Хакасияның на нимес, пасха даа регионнарның араласчылары полары кӧрілче. Ол Хызылчар крайынаң паза Алтай Республикадаң.
Ідӧк Луганск паза Донецк Чон республикаларының чииттерін сахтапчабыс. Піс ӱр ниместе чир-сууна хындырар форум иртіргебіс. Андар піс хазнаның наа регионнарының чиит чуртағҷыларын хығырғабыс. Чапсых кізілернең чоох алызары пістің кӧңнібіске кірген. Аннаңар пу палғалысты піс узарадарға пӧгінчебіс.
– Форумның тархынынаңар чарыт пиріңер.
– «Этнова» 2011 чылда иң пастағызын иртірілген. Хакасияның ӧткін оол-хыстары Пілӧ кӧл хыринда чыылысханнар. Палаткаларда 170-ҷа кізі чуртаан. Форумның пастағҷылары хаҷанох пасха сфераларда істенчелер. Піс оларның тоғыстарын узаратчабыс.
– Чииттердең пасха, кем анда ідӧк аалҷы полар?
– Чыл сай форумда Хакасия пазы Валентин Коновалов араласча. Ол чииттернең чоох алысча паза оларның сурығларына нандырча. Ідӧк спикерлер полар. Олар мастер-класстар иртірерлер, ӱгредіглер апарарлар. Чыл сай піс форумға хазнаның аймах специалисттерін хығырарға кӱстенчебіс, хайзылары опыттарынаң ӱлесчелер. Хоза таныхтирға кирек, форум Хакасияның правительствозы хабазиинаң иртірілче.
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
