Маңат тимненіс кӧзіткеннер, прайзына ӧрініс сыйлааннар
02.08.2023
Хабарлар
Виталий Сагалаков «ыырҷының» хаалхазы алнында пол парар (16 номер)
Хазыр ойын. «Кимдегі Сибирь» чӧптезіг хоостыра 30 июльда Ағбандағы «Сойан» стадионда футболҷа Хакасияның піріктірілген командазы Хызылчардағы «Арарат-СССР» команданаң тоғасхан
Аалҷыларыбыс оңнығ ла сіліг, улуғ автобуста чиде салбиндырлар. Іcтінең тоозылбас-парбас чон сыхчатханын кӧр салып, пістіңнер чоо хахапчалар, Хызылчарның прай чуртағҷыларын ағыл килген осхастар тіп сыбыхтасчалар. Сағам за кем футбол ойнирын, кем оларны чиңіске кӧӧктірерін піл тее полбассың. Прайзы даа чииттер, хыстар илееде кӧрінчелер. Оңнығ ла пойли тудынминчалар.
Анзы за оңарылыстығ, «Арарат-СССР» команда, Хызылчар крайының чемпионадында аралазып, нинҷе-нинҷе чыл изере чиңіс тутча. Аннаңар Хакасиязар тынанарға, теестегі тренировка иртірерге пар килерге тимненген поларлар. Пу тоғазығда хайди даа чиңіс тударына сала даа ікінҷілес пілдірбинчеткен. Постарын удурлапчатханнарзар хайди-да пӧзіктең кӧрчеткен чіли пілдіргеннер.
Піcтіңнернің кӧңнілері уламох тың тӱс парыбысхан, хаҷан автобустаң ікі хара кізі сых килгенде. Негрлер постарын іди адаттырчалар. Тилекей футболында, тізең, хара кізі хайди даа Бразилия чуртағҷызы поларға кирек. Аннаңар даа Ағбанның ӧӧн стадионынзар чыылысхан кізілер холларынаң на сапхланчатханнар, піcтіңнер саңай утыр саларлар тіп чоохтасчатханнар. «Ойын тузында бразилецтерні дее кӧріп аларбыстар», – постарын амыратчалар кізілер.
Че саңай пасха сағыс тутчатханнар піcтің оолларыбыс. Тоғазығның пастағы чардығы наа ла пасталчатханда, аалҷыларның алнында кӧмес туртухчатханнары пілдірзе дее, турыстығ удурлас кӧрерге чарадыбысхан осхастар. Анаң Хакасияның піріктірілген командазының капитаны Илья Михалев нанҷыларын алнынзар кӧӧктір сыххан. Марығ ээлері удур-тӧдір пілізіп ойнапчалар, сыбыра «ыырҷының» хаалхазынзар кӧстегліг чӱгӱріс чӧрчелер, футболны харах одынаң позытпинчалар.
Мына 16 номерліг Виталий Сагалаков, прайзының алнынзар сыға салып, хаалхадаң кӧмес-кӧмес чаза теебісті. Сах андох стадионзар чыылысхан кӧрігҷілер аразында кӧгліг суулас пасталыбысхан. «Виталий, алнынза-ар!.. Піс синнең хадабыс!» – хысхырыстар аннаң-мыннаң на истіл сыххан. Пірее пасха даа чир-суғҷыбысты іди «Виталий, алнынза-ар!» тіп кӧӧктірчеткеннерін cизін салып, постары постарына хатхырыс сыхчалар. Итсе, аалҷылар даа сым одырбинчалар. Олар, анзы за ідӧк тее пілдістіг, поохти чыылыс парып, «Арарат», алнынзар!.. «Арарат», гол кирек!» оңнығ ла тыыда хысхырыспинчалар. Футболисттернең хада Хакасиязар тикке ле килбееннер нооза. Аннаңар іди тың сууласчалар, постарынзар хайығ айландырчалар.
Пістіңнер дее сым одырарлар ба. Ідӧк хысхырысчалар, чир-суғҷыларыбысты алнынзар кӧӧктірчелер. Команда капитаны Илья Михалев прай чирде маңнанчатханға тӧӧй. Паза ла кӧрзең, пасхазына кӧзідім полып, аалҷыларның хаалхазы алнында чапчаң хайын чӧрчеткен полча. Соонаң нанҷыларына арачыланарға полыс сыхча. Аны кӧрігҷілер хап-хара ээк-наах сағалы хоостыра чахсы таныпчалар, хайығда тутчалар.
Піди кӧріп-сизініп одырчатса, Хызылчар крайының кӧп хати чемпион полчатхан «Арарат-СССР» команда андағ ла хорғыстығ «ыырҷы» полбиндыр. Табырах чӱгӱрерінде дее, футболнаң піліп тузаланарында даа пістіңнер сала даа соона халбинчалар. Мына прай чирде маңнанчатхан, маңат тимненіс кӧзітчеткен Анатолий Зибуковты аалҷылар, постарының хаалхазы алнында чарабас оңдайнаң тохтадып, чирзер аңдарыбысханнар. Марығ чарғыҷызы сала даа ікінҷілес чох 11 метр танығзар кӧзітче. 11 номерліг ойнапчатхан Дмитрий Ефремов гол кире теебіскен, пістіңнерні алнынзар сығарча, чиңіске ізеніс тӧріпче.
Пастағы пенальти соонаң, тың даа ӱр туc ирткелекте, аалҷылар постарының хаалхазы алнында пістіңнернің хайзын-да пазох чарабас оңдайнаң тохтадып, чирзер аңдарыбысханнар. Марығ чарғыҷызы холынаң 11 метр танығзар кӧзітче. Амды пенальтині 9 номерліг ойнапчатхан Николай Сангаджиев теберге тимненібісті. Ол улуғ опыттығ футболист. Нанҷы-арғыстары ағаа ізенчелер, хайди даа гол кирібізерге кирек тіп санапчалар.
Стадионзар чыылысхан кӧрігҷілер тынмин даа одырғлабысханнар. Пістіңнер аалҷыларны 1:0 саннаң утчатханы хомай нимес. Че Хызылчар крайының нинҷе-нинҷе чыл изере чемпионы полчатхан командаа пазох пір гол кир пирҷең ползалар, уламох тынарға ниик пілдірерҷік тіп сағынчалар.
Тоғылах футбол кирек орында турғызыл парды. Николай Сангаджиевнең хаалха хадағҷызы удур-тӧдір кӧріс турчалар. Пірсі хаалха хадағҷызын алаахтырып аларға пӧгін тутча. Аалҷы, тізең, пістің футболист хайдар теберін піліп аларға харасча, аар-пеер сегірглеп пастабысты. Ухаанҷы хылыхтығ кізі полтыр хаалха хадағҷызы. Мяч хайдар учуғарын хап-орта сизінген, андар сегірген. Че аның хол салааларының пастары ла тееп парғаннар, футбол учуғызын тудар оңдайы чох полған.
Кӧрігҷілернің ӧрчіліг хысхырыстары, хости одырчатханнарның хуҷахтасчатханнары, удур-тӧдір алғыстасчатханнары арығ чӱректең сыхчатпас па. Амды сынап таа тынарға ниик полыбысты. Хазыр оңдайда иртчеткен тоғазығның пастағы чардығы тоозыларға ӱр тус ла халбады. Пістіңнер аалҷыларны 2:0 саннаң утчалар. Пастап хорғыстығ пілдірген команда маңат ла удурлас полбинча. Алай тоғазығның ікінҷі чардығында постарының кӱстерін кӧзіт пирерге сағынчалар ба? Іди дее пол парарға айабас. Че иң не ӧӧні – піс «бразилец» тіп сағынчатхан хара кізі ойынға сыххалах. Ол позының пӧзік узын кӧзіт сыхса, пістіңнерге сидік чуғар.
Хынығ паза хазыр оңдайда ирткен тоғазығның пастағы чардығы 2:0 саннаң тоозылған. Сах андох кӧрігҷілер аразында талазығлар пасталыбысханнар. Олар ӧӧнінде пістіңнер чиңіс саннарын хайраллап поларлар ба, чох па тіп сурығ ибіре пар турғаннар. Чир-суғҷыларыбыс прайзы даа команда капитаны Илья Михалевха айапчатхан. Аалҷылар аның пӧзік узын піліп, ол, хайдағ даа полза, чииттер командаларында аралазып, Европа паза тилекей марығларына чӧрҷең полған. Андағ чахсы спортсменні прайзы хайығда тутчатпас па. Тохтатчаң оңдай таппин, аңдарыбызарға харасчалар. Аннаңар кӧрігҷілер айапчатханнар.
Таныхтирға кирек, тоғазығның пастағы чардығында хакастар санынаң Виталий Сагалаков ла ойнаан. Позын уғаа ізестіг тудынған, хаалха саринзар кӧп хати тееп турған. Ол нападающай полған. Пірее хати аалҷыларның ікі-ӱс футболизін оой ла алаахтыр парыбыс турчатхан. Ідӧк хаалха хадағҷызынзар пірдең пірге сых килҷең. Че, маңзырап, алҷаас итчең, чаза теебісчең. Кӧрігҷілерге аның ойыны кӧңніне кірген осхас. Пола-пола килгенде, піреезі аны алнынзар кӧӧктіріп, «Виталий, гол кирек!» тіп хысхырыс сыххан.
Чир-суғҷыбыс кізілернің ізенізіне турысхан. Ойынның 66-ҷы минутазы парчатханда, Виталий Сагалаков пазох ла хаалха хадағҷызына удур пірдең пірге сых килген. Амды ол иргі алҷаастарын хатабаан, мячты хаалха хадағҷызының хыринҷа тееп, гол кирібіскен. Анзы піcтің команданың тӧртінҷі голы полған. Аның алнында, тоғазығның 60-ҷы минутазында, Владислав Зотов пулуңнаң пирілген футболны паснаң хаалхаа кире сазыбысхан. Андағ оңдайнаң пістіңнер 4:0 саннаң алнында парчатханнар. Ол сылтағнаң Хызылчардаң килген чииттернің ӧтіг ӱннері истілбинібіcкен дее, сым на одырчалар.
Кӧрігҷілер, тізең, ӧрчіліг суулаза тӱскеннер – мына, сағып алдылар, бразилец теен кізібіс Aғбандағы «Сойан» стадионда кӧріне тӱсті. Андағ чапсых аалҷыны прайзы даа хазыр айа сабызынаң удурлапча, амох пӧзік узын кӧзідіп пастирын чидікпин сағыпча. Че чир-суғҷыларыбыстың улуғ хомзынызына, ол Бразилиядаң нимес, Наа Гвинеядаң полтыр, Хызылчардағы университеттің студенті Мусса Камара. Ойнирын хомай нимес ойнапча. Че пістің чир-суғҷыбыс Виталий Сагалаков тоғазығ тузында аны нинҷе-де хати оой ла алаахтыр парыбыс турчатханы кӧрігҷілерні матап ӧріндірчеткен.
Мындағ хазыр оңдайда ирткен тоғазығ тоозылар алнында командаларның тренерлері алызығлар иртіріп пастабысханнар. Іди команда капитаны Илья Михалевтың орнына хакас оол Николай Сагалаков сых килген, Виталий Сагалаковтың орнына Роман Асочаков сыххан. Команда капитанын кӧрігҷілер хазыр айа сабызынаң ӱдескеннер. Илья Михалев маңат тимненіс кӧзіткен, ізестіг чиңіске кӧп туза иткен. Ідӧк Виталий Сагалаковты айа сабызынаң ӱдескеннер. Чахсы командаа саналчатхан аалҷыларның хаалхазына гол кирібізерге полған на футболист сыданминча нооза.
Тоғазығ тоозылар алнында «Арарат-СССР» команда піcтіңнернің хаалха алнын саңай ээленібіскен. Мында позының маңат тимненізін хаалха хадағҷызы Денис Леденков кӧзіткен. Че ол хайди даа чапчаң хайынза, аалҷылар саринаң Ярослав Ромашин ойын тоозылар алнында пір гол кирерге маңнанған. Іди пу тоғазығ 4:1 саннаң тоозылған, пістіңнер, ибде ойнап, ікінҷі хати чиңіс туттылар. 14 июльда олар хонҷых Туваның піріктірілген командазын 3:1 саннаң утып алғаннар.
Ойын соонда иң чахсы футболисттер адалған, оларға сыйыхтар читірілген. Пістіңнер саринаң андағ аарласха Анатолий Зибуков турысхан. Аалҷылар саринаң Роман Непомнящий сыйых алған.
Амды Хакасияның піріктірілген командазы 12 августта Тувазар парар. Анда олар стадион ээлерінең тоғазарлар.
Сом Александр Дубровинни
Автор :
Анатолий Султреков
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
