Кӱреске хайығ
02.08.2023
Хабарлар
Чыылығ араласчылары
Наа пірігіc. Пу наада Хакасияның ӱлгӱ туразында чыылығ ирткен. Анда пістің республикада «Хакасия кӱресчілері» халыхтарның наа пірігізі тӧстелген
Чыылығны асхан паза апарған Хакасия пазы Валентин Коновалов. Валентин Олегович позының чооғында республика ӱлгӱзі орында кӱрес кӧрімнерін тилідеріне, ағаа полызарына хайдағ улуғ хайығ салчатханын таныхтаан. Аның сӧстерінең, Хакасияда спортнаң айғасчаң наа кӧрімнер тӧстелчелер, школалардағы иргі спорт заллары нааҷыли тыхталчалар, оолағастарны паза хызыҷахтарны кӱрес секцияларына тартар тоғыс тӧреміл апарылча. Пістің республиканың кӱресчілері Россия, чоннар аразындағы синде иртірілчеткен аймах марығларда араласчалар, ибзер сыйыхтығ айланчалар.
– «Хакасия кӱресчілері» наа пірігіс тӱзімніг тоғынарына ізенчем, пӧзік чидіглер алғапчам, – теен Валентин Коновалов чыылығ араласчыларына.
Аның соонаң сӧс алған Хакасияның спорт министрі Сергей Кочан. Ол чыылығда араласчатханнарны хай пірее саннарнаң таныстырған паза «Хакасия кӱресчілері» халых пірігізі хайдағ пӧгіннең азылчатханнаңар чоохтап пирген.
Республиканың спорт министрінің сӧстерінең, пӱӱнгі кӱнде кӱрес кӧрімнерінең 4 муң артиинаң кізі айғасча. Сынында, тиксі регионны санға алза, анзы андағ ла чалтырама кӧзідім нимес тіп таныхтирға чарир. Хакасияның хай пірее аймах-городтарында кӱрес кӧрімнері чахсы ла тилібинчелер. Ағаа хоза, олғаннар аразында спорт разрядтарына турысханнар саны уғаа асхынах осхас. Аны тӱзедерге киректелче.
– «Хакасия кӱресчілері» халых пірігізін тӧстеп, ол республикадағы школаларда наа секциялар азып, ӱгренҷілерні харбазарға кӧніктіреріне тыңох ізенчебіс. Кічігдең сығара кӱрезіп пастаан палаларның кӧзідімнері маңат поладыр, – таныхтаан позының чооғында республиканың спорт министрі.
Сергей Кочанның танығлары аразында мындағ саннарға хайығ айландырғам: амғы туста олаңай кӱресче Россияның піріктірілген командазына Хакасиядаң 11 хыс, 3 оол кірчеткен осхас. Анзы уғаа асхынах. Тиңнестіріге алза, хонҷых Тувадаң ооллар ла саринаң Россияның піріктірілген командазында 46 кӱресчі саналған. Оңарылыстығ, мында ӱгренҷілер дее, чииттер дее, улуғлар даа санға алылчалар.
Хакасияның спорт министрі пу кӧзідім-тиңнестіріглерні тиктең не искірбеенін прайзы даа сизінген. Сергей Владимирович, тізең, олаңай кӱресче Хакасияның улуғ тренеріне турғызылған Виталий Канзычаков тоғысты чахсыландырарына ізенчеткенін чазырбинчатхан. Анаң мындағ саннарны чыылығ араласчыларына искірген: пӱӱл Хакасиязар килген 11 кибісті спорт министерствозы республиканың аал-городтарынҷа тарадарға чарадыбысхан. Олар хайди тузаланылчатханы сыныхтағда тудылар теен.
Анаң республиканың ӱлгӱ туразынзар чыылысхан улус «Хакасия кӱресчілері» халыхтар пірігізінің устағ-пастаан табарында араласхан. Наа пірігістің президентіне пір чӧпнең Артём Кулумаев табылған. Ол Ағбандағы олғаннар спорт школазында грек-рим кӱрезінҷе тренер полча. Аның орынҷыларына табылғаннар Сергей Смирнов – грек-рим кӱрезі, Леонид Чучунов – олаңай кӱрес, Лилия Каскаракова – ипчілернің олаңай кӱрезі. Оларның хайзы даа олғаннарны кӱрес микелеріне хаҷаннаңох кӧніктірчелер, улуғ опыттығ тренерлер.
Республика пазы Валентин Коновалов «Хакасия кӱресчілері» наа пірігістің устағ-пастаана табылған кізілерні чылығ алғыстаан паза тоғыстарында маңат кӧзідімнерге чит турарға, тӧреен чирібісті тиксі сабландырарға, чахсы кӱресчілер ӧскірерге алғаан. Олох арада Валентин Олегович мындағ хоза танығ иткен: 2028 чылда Хакасия паза Тува республикалар «Азия олғаннары» чоннар аразындағы марығларны постарының чирлерінде иртірерге тимдедеңер Россияның спорт министерствозынзар сурыныс пічиин пирібіcкеннер. Сағам сыныхтағлығ тоғыстар иртірілчелер. Москвадаң килген комиссия Ағбандағы Н.Г.Булакиннің адынаң спорт комплексін махтаптыр. Аннаңар «Хакасия кӱресчілері» халых пірігізіне чоннар аразындағы марығларда аралазарға тимненерге киліс парар. Анзы, тізең, уғаа нандырығлығ тоғыс полчатханын пілчелер.
Оңарылыстығ, хайдағ даа наа пірігіске маңат, тӱзімніг тоғынарына ахчалығ полызығ киректелче. Уламох 2028 чылда иртер чоннар аразындағы улуғ марығларға маңат тимнен саларына полызығ хайди даа кирек полар. Аннаңар попечительлер чӧбін тӧстирдеңер чоох парған. Аның кнезіне Хакасия пазы Валентин Коновалов пір чӧпнең табылған. Чыылығ тузында полысчылары адалғаннар.
– Пістің правительство республикада кӱрес кӧрімнерін тилідеріне хайығ айландырча, наа спорт объекттері чыл даа сай тузаланысха кирілчелер. Андағ полызығ мыннаң мындар даа пиріл турар, – чыылысхан улусты алғыстаан, кӱрес чахсы тилир кӧңнінең ӱлескен Хакасия пазы Валентин Коновалов.
Сом Дмитрий Сунчугашевти
Автор :
Анатолий Султреков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
