«Хакасия» энциклопедия чарых кӧрді
28.07.2023
Хабарлар
«Хакасия» энциклопедияның нандырығлығ редакторы Владимир Яблонский авторларнаң хада
Презентация. Республиканың ӱлгӱ туразында «Хакасия» энциклопедияның 5-ҷі томының презентациязы ирткен
Энциклопедияның пу чардығына республиканың саблығ, турыстығ, регион тилізіне улуғ хозым иткен чуртағҷылары кирілгеннер. Олар ученайлар, политиктер, чон матырлары, полководецтер, предприятие устағҷылары, литератураҷа паза искусствоҷа классиктер паза даа пасхазы. Андар 10 муң азыра статья, карта, схема, хоос кирілген. Аның тиражы – пір муң экземпляр.
Таныхтирға кирек, «Хакасия» энциклопедияны сығарарының пастағҷызы Хакас автоном облазының депутаттар чӧбінің исполком кнезі Михаил Григорьевич Торосов полған. Че аар туста ағаа пӧгінін толдырарға киліспеен. 2000 чыллар пасталчатханда ла, аның оолғы 2003 – 2017 чылларда Хакас чонның Улуғлар чӧбінің кнезі полған Владислав Торосов пабазының сағызын чуртасха кирген. Амды Владислав Михайловичтің тоғызын Улуғлар чӧбінің амғы устағҷызы Пётр Воронин узаратча. Энциклопедияның халғанҷы томынаң аймах-пасха сфераларда істенчеткен специалисттер тоғынғаннар, нандырығлығ редактор паза составитель Владимир Сергеевич Яблонский полған.
– Иң пастап тоғысчы ӧмее пис кізі кірген. Піс спонсорларнаң кӧп тоғыс апарғабыс. Олар піске хабасханнар. Пола-пола энциклопедиянаң тоғынчатханнарның саны алғыдылған. Материаллар чыырында уғаа кӧп кізі араласхан. Піс оларның тоғынчатхан организацияларынзар пір дее айланмаабыс, оларны тоғыстаң позыдыбызарға сурынмаабыс. Авторлар тынағ кӱннерінде, ӱлӱкӱннерде істенгеннер. Пістің арабыста министрлер, оларның орынҷылары, халых организацияларның кізілері, ученайлар, прокуратурадағылар, чарғыдағылар, Хакас хазна университедінің ӱгретчілері паза даа пасхазы полғаннар, – искірген Владимир Яблонский.
Хакасия пазы Валентин Коновалов улуғ проект тоозылғанынаң прайзын алғыстаан.
– Энциклопедия сығарарында улуғ хозым иткен специалисттерге алғызым читірчем! Сірер уғаа улуғ тоғыс ит салдыңар. Улуғ проект толдырыл парғанынаң алғыстапчам. Прайзына пик хазых алғапчам! – таныхтаан чооғында Валентин Олегович.
«Хакасия» энциклопедияның авторларына Хакасия пазы Валентин Коновалов алғыстас пічіктерін паза сыйыхтар читірген.
Энциклопедияның ікінҷі, тӧртінҷі паза пизінҷі томнары Хакасия правительствозының, Улуғлар чӧбінің, республиканың национальнай паза территориальнай политика министерствозы хабазиинаң «Хакас Республиканың региондағы политиказы» хазна программазы хоостыра сығарылған. «Хакасия» (Хакас-Минсуғ ойымы) Кем кем полча?» энциклопедияның пизінҷі томы республиканың библиотекаларынҷа паза школаларынҷа тарадылар.
Презентацияда араласхан Хазна Думазының депутады Казбек Тайсаев позының чооғында энциклопедияның кирексінізін таныхтаан паза, аны узарадып, алтынҷы томда Украинада иртірілчеткен ӧнетін чаа операциязында араласхан чааҷыларны кир саларға чӧп пирген.
Сом Дмитрий Сунчугашевти
Автор :
Оксана Сунчугашева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
