Чир-суубыстың чиңіске хозымы
27.07.2023
Хабарлар
Хазна Думазының депутады Казбек Тайсаев
Тоғазығлар. Россияның Хазна Думазының депутады Казбек Тайсаев Хакасиязар пазох тоғыс чорығынаң кил парды
Россияның Хазна Думазында СНГ, евразийскай интеграция киректерінҷе паза чир суғҷыларнаң палғалыстарҷа комитет кнезінің пастағы орынҷызы, ДНР-ның Істеніс Матыры Казбек Тайсаев пӱӱл апрель айда піcтің республикада полғанох.
Амды чорығы тузында Казбек Куцукович пастап Хакасия пазы Валентин Коноваловнаң, анаң республиканың Ӧӧркі Чӧп кнезі Владимир Штыгашевнең, ідӧк Улуғлар чӧбінің, национальнай диаспораларның паза халых организацияларының устағҷыларынаң тоғасхан.
Казбек Тайсаев ағаа хоза хабарҷыларнаң тоғазып аларына кӧп нимес тус тапхан. Ол мындағы тоғызынаңар кӧп нимес чоохтап пирген.
Казбек Куцукович пеер хада тоғынған арғыстары хығырғаны хоостыра кил парған. Республикадағы волонтёрлар форумының тоғызында араласхан. Волонтёрлар ӧнетін чаа операциязында араласчатхан чааҷыларға гуманитарнай полызығнаң хабасчалар. Консервалар, имнер, кип-азах, чыып, ысчалар. Ол саринаң правительство даа маңат полысча. Пӱӱл Донбассар 28 автомобиль пір эшелоннаң ысханнар.
Позы депутат Тайсаев СВО чааҷыларына паза оларның сӧбірелеріне полызар ӧнетін ӧменің тоғызында араласча. Аннаңар ағаа чаа парчатхан чирлерде удаа поларға килісче. Хакасиядаң парған чааҷыларнаң тоғасча. Олар махачы тудынчалар, пілчелер – иблерінде сӧбірелеріне ӱлгӱдегілер паза халыхтар пірігістерінің кізілері полысчалар. Хакасия правительствозы чарадиинаң СВО араласчыларының палаларын олған садтарында паза школаларда тикке азырапчалар, олар городтағы транспортта ахча тӧлебинчелер, ВУЗ-тарзар тудығ чох ӱгренерге кірчелер.
Пӱӱлгі чорыхтарда Казбек Куцукович СВО ветераннарынаң паза палығлатхан чааҷыларнаң алынҷа тоғасхан. Оларға имненерге паза тоғыс табарға полысхан. Пастағы тустарда ол киректерҷе сурығлар кӧп сығыс килҷеңнер. Амды олар асхынахтар. Кізілер постарының праволарын піліп пастабысханнар паза орындағы пастыхтар оларға табырах полыс пирерге кӱcтенчелер.
Национальнай диаспораларның паза Улуғлар чӧбінің кізілерінең тоғазығда Ағбан городта Ынархас ӧргезін пӱдір пирерге сурынғаннар. Хазна Думазының депутады полыс пирерге молҷаан. Ӱлгӱдегілер дее тоғыр полбааннар.
Казбек Куцукович пірее хати Хакасиязар сіліг чирлерні кӧрерге ӧнетін килерге молҷаан. Тиктең нимес Россия президенті пу чирлерзер тынанарға удаа кил парадыр.
Сом Дмитрий Сунчугашевти
Автор :
Илья Топоев
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
