Хада тудынза – кӱстіг поларбыс
28.07.2023
Хабарлар
Хакасия пазы Валентин Коновалов Ия Чанковаа алғыстас пічиин читірген
Форум. Ӱр ниместе Л.Р.Кызласовтың адынаң чир-суғ ӱгренҷең музейде «Алғыс, чағбан чӱрек» регион синіндегі форум ирткен
Аның ӧӧн пӧгіні – пос кӧңнінең тӧстелчеткен чӧрімнер тиліпчеткенін, ӧнетін чаа операциязы араласчыларына паза оларның сӧбірелеріне хабазарына пос кӧңнінең хозым иткен кізілернің тоғызын чон хайиина сығарарға. Ол мероприятиеде Хакасия пазы Валентин Коновалов, Ӧӧркі Чӧп кнезі Владимир Штыгашев, Хазна Думазының депутады Казбек Тайсаев араласханнар. Республика пазы форум араласчыларын паза аалҷыларын тӱзімніг тоғыстары ӱчӱн алғыстаан. Хайди ол чоохтаан, ӧнетін чаа операциязы пасталғандох, пістің республика Донбасстағы чобаға кір парғаннарға полызарында ӧткін араласхан. Анаң мобилизацияа хабылғаннарға паза оларның сӧбірелеріне аймах полызығлар идіп пастаан. Ідӧк ол таныхтаан, мындағ форумнар чииттерні пос чир-сууна хынарға ӱгредер паза волонтёрлар чӧрімін сабландырар ӱчӱн киректелчелер.
– Мин гуманитарнай полызығны чыыпчатхан прай чонға улуғ алғызым читірчем. Ӧнетін чаа операциязында араласчатхан пістің чааҷыларға паза оларның сӧбірелеріне хабасчатхан волонтёрларға ідӧк улуғ алғыс. Сірер тоғыс паза ӱгредіг соонаң тынанар орнына халых тоғыснаң айғасчазар. Киртінчем, хада ползабыс, піс хайдағ даа пӧгінні толдырарбыс, – чоохтаан Хакасия пазы Валентин Коновалов.
Форумда ӧнетін чаа операциязы араласчыларына паза оларның чағыннарына хабасчатхан республика чуртағҷыларына Хакасия правительствозының алғыстас пічии пайрамни читірілген. Андағ танығлығ сыйых алғаннарның санында олаңай чуртағҷылар, тынағдағы улус, студенттер паза организациялар устағҷылары полғаннар. Оларның хай піреезі волонтёрлар чӧріміне кірче, хайзы пос алынҷа хабасча. Тиксі республикада волонтёрлар чӧріміне 20 муң азыра кізі кірче, ол син араласчы асхынах нимес. Анзы пістің чир-суубыста чағбан чӱректіг чуртағҷылар чуртапчатханын таныхтапча. Оларның пірcі Алтай аймаандағы Хубачар аал чуртағҷызы Ия Чанкова полча. Ол хаҷаннаңох сығара аймахтағы ипчілер чӧбінің устағҷызы полча. Аннаңар халых тоғыстарда позы даа паза чӧптегі ипчілер дее ӧткін араласчалар. Алтай аймаанда ипчілер чӧбі полған на аал чӧбінде пар полтыр.
– Пастап Россияның ипчілер чӧбінің Хакасияҷа пӧлиинің кнезі Любовь Безлепкина гуманитарнай полызығ чыыбызар сурыныснаң ипчілерзер айланарға чахаан. Минің тоғынҷаң кабинедім музейде полған, андар ипчілер чӧбінің араласчылары аймах ниме-ноо ағылғаннар. Пастағы гуманитарнай полызығны піс 2022 чылның сілкер айында чыыбысхабыс.
Пістің чуртағҷылар мындағ хабазығ тимнирінде ӧткін араласчалар, тоғыр полчатханнар тоғаспинча. Кізілер, полызығ чыылчатханын піліп алай истіп алзалар, постарының чиңіске улуғ даа нимес хозымын идер сағыстарын читірчелер. Чуртағҷылар полызығны пос кӧңнінең итчелер. Пірcінде пір ипчі ахча ағыл килтір. Мин ахча чығбинчабыс, посылканаң ызарға чарапчатхан ас-тамахты чыыпчабыс тіп чарытхам. Ол чӧрібіскен, анаң аймах чиис ағылып, туғанынаң хада килтір. Ол ідӧк ниме-ноо ағылтыр. Школадағы ӱгренҷілер матап полысчалар, олар, чайғы тынағ кӱннеріне сыххан даа ползалар, хандых айында чааҷыларға посылка тимнебіскеннер.
Пӱӱн Хакасия пазы Валентин Коновалов республика правительствозының алғыстас пічиин читіргенде, мағаа ӧріністіг полған. Че амғы туста андағ халых тоғыснаң илееде кізі айғасча, олар прайзы даа алғыстасха турыстығлар. Че полғаны ла аарластығ танығ ӱчӱн пу тоғыснаң айғаспинча, прайзының даа ӧнетін чаа операциязына хабылған чир-суғҷыларыбыс ӱчӱн чӱрее сыстапча полар. Аннаңар чиңіс табырах ползын тіп хабазарға кӱстенчелер, – чоохтаан Ия Чанкова.
Форумда ідӧк аймах площадкалар тоғынғаннар. Волонтёрлар мероприятиее килген араласчыларға паза аалҷыларға мастер-класстар иртіргеннер. Олар чааҷыларға чӱленҷең сетка палғирға алай блиндажнай свечі идерге ӱгреткеннер. Ідӧк полған на кізінің чааҷаа чылығ сӧстернең пічік пас пирер алай видеоға чооғын суурып ызыбызар оңдай полған.
Республика правительствозының алғыстас пічиин алғаннарның санында – Ольга Киргинекова. Ол, тынағда даа полза, Кічіг Арбыттағы «Хакасский Леспромхоз» ОАО лесхознаң устапча паза халых чуртаста ӧткін араласча. Хайдағ халых тоғыс апарчатханын хысхаҷахти чарыт пирген.
– Мин пірсінде телевизорҷа хабар кӧр cалғам – Алтай Республикадаң Донбассар пиломатериаллар ысчатханын. Андағох хабазығ идер чӧпнең сыххам, че ол туста андағ полызығ пирерге сидік полған. Кӧместең тоғыс чахсыланған, ам сидіксіністер чоғыл. Ідӧк мобилизацияа хабылғаннарның сӧбірелеріне одың пиргебіc. Андағ хабазығны Таштып аймаанда читірчебіс, Ағбанзар даа ысхабыс. Соонаң ахчанаң полызып пастаабыс. Наа чыл алнында пастағызын ахча чыып ысхабыс, 100 муң салковайҷа. Амды ай сай ахча чыыпчабыс, хайда 100 муң салковай, хайда 50 муң салковай чыыл парча.
Піс аалда чуртапчабыс, удур-тӧдір чахсы таныспыс паза чоох алысчабыс. Аннаңар кемнің CВО-да туғаны парын алай чат халғанын пілчебіс. Пістің тоғыста даа кемнің-де харындазы, кемнің-де оолғы анда чааласча, аннаңар прайзының чӱрее ағырча, чаа тоозыларын сағыпчабыс. Пу оой нимес тус прайзына теелче. Піс ахчаны пірее килкім нимее читірерге тіп ӧнетін чыыпчабыс, пістің чааҷыларға хабазып.
Мин чаа табырах тоозылзын тіп сағынчам. Кізілер ынағ паза пілізізіп чуртазыннар. Хаҷан даа удур-тӧдір полыссыннар, хада-пірге тудынзабыс, піс кӱстіг поларбыс. Прайзына амыр паза хазых чуртас алғапчам паза Ӧӧркі чайааннардаң чир-суғҷыларыбыс хазых айланзыннар тіп сурынчам, – ӱлескен сағыстарынаң Ольга Киргинекова.
Сомнар Дмитрий Сунчугашевти
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
