Киндірліг пилтірінде школа нааҷылалча
28.07.2023
Хабарлар
Киндірліг пилтіріндегі школа тыхталча
Тыхтағ. Пии аймаандағы Киндірліг пилтірі аалдағы тиксі ӱгредігліг школада алғым тыхтағ тоғыстары парча
Аалдағы школа 1929 чылда пӱдірілген, 1967 чылда ағаа хоза тура пӱдірілген. Пу тусха ӱгредіг организациязы, илееде іріктеп парып, изел парған. 2017 чылда эксперттер аны хорғыс ағылчатхан школалар санына киргеннер. Че уроктар иртірілері анда тохтадылбаан, спорт залы ла чабыл парған. Физкультура уроктары тасхар алай ба коридорда иртірілҷең. Пӱӱл часхызын, тізең, ӱгренҷілерні пасха школаларзар тарт сыхханнар.
– Пістің школаның cтенелері хыйын пар сыхханнар, наңмырлығ кӱнде потолоктаң суғ тамҷылаҷаң, хысхызын кӧзенектердең соох ӱбӱрҷең. Пии аймаа администрациязынаң чылытчаң тиріглер сурап алып, кабинеттерде турғысхлап, чылынҷаңмыс, – чоохтапча школа устағҷызы Юлия Сагатаева.
Пӱӱл Киндірліг пилтірі аалдағы М.И.Чебодаевтің адынаң школада алғым тыхтағ тоғыстары пасталыбысхан. Пӱдірігҷілер, тураның стенелерін иптебізіп, полларны нааҷылапчалар.
– Піс школаның ағас фундаментін, сайап, бетоннаң тыыдыбысхабыс. Стенелернің тастындағы ағастарын сайабысханда, кӧйген брустар сыххлап килгеннер. Мында хаҷан-да улуғ ӧрт полтыр, анзын амғы ӱгретчілер дее оңнабинчалар. Оларны піске ідӧк алыстырарға киліскен, паза піс прай полларны нааҷылапчабыс. Пӱкӱлее алза, иргі школадаң мында стенелері ле халар, пасхазы алыстырылар, – чоохтапча прораб Владимир Меньшов.
Пӱдіріг тоғыстарынаң 20 азыра кізі айғасча. Оларның 8-зі – орындағы чуртағҷы. Ағбандағылар, хызылчардағылар, чолға тус хоратпас ӱчӱн, мындох чуртапчалар. Оларға аалда тура табылған. Иртен иртӧк пастап, орайға теере тоғынчалар. Істіндегі тыхтағлар пасталыбысса, тоғынҷылар хозылары кӧрілче.
Пӱдірігҷілер тоғыстарын кӧрілген тус хоостыра апарғаннар, че ӱр ниместең соона хал сыхтылар.
– Аалда чил, наңмыр полыбыссох, чарытхы ӱс парча. Пістің прай тиріглерібіс электроэнергиянаң палғалыстығ, чарытхы ӱс парза, тоғыс ідӧк тохтап парча. Аннаңар піс генераторлар чахып салғабыс. Пу чағында чидерге киректер, – чоохтапча Владимир Дмитриевич.
Тыхтағ тоғыстары соонаң школаның прай класстарында раковиналар турғызылар, чылығ, соох суғ тартылар, наа парталар, ноутбуктар, доскалар алылар. Ідӧк биология, химия, география кабинеттерінзер ӧнетін оборудование кирілер.
Киндірліг пилтірі аалдағы школада олғаннар 9 классха теере ӱгренчелер. Анаң олар Асхыстағы, Таштыптағы алай Пиидегі профессиональнай училищелерзер ӱгренерге кірчелер. Пӱӱл пастағы классха тӧрт пала килері кӧрілче. Тиксі алза, 2023-2024 ӱгредіг чылында школада 40 азыра олған піліс алар.
Школада читі ӱгретчі істенче. Оларның аразында улуғ опыттығлар даа, чииттер дее пар. Халғанҷылары пуох аалдаңнар. Олар, профессия алып, тӧреен аалзар айланғаннар.
Таныхтирға кирек, Киндірліг пилтірі аалдағы школа Хакасияның иң иргі школаларының пірсіне саналча. Аннаң кӧп саблығ кізі сыххан. Килчеткен чылда ол пайрамнығ 95 чылын таныхтир. Аннаңар школада парчатхан тыхтағ тоғыстары ӱгренҷілерге паза тоғынҷыларға иң аарлығ сыйых полар, неке.
Киндірліг пилтірі аалдағы школа «Ӱгредіг» национальнай проект хоостыра тыхталча. Аннаң пасха, республиканың сигіс ӱгредіг организациязында ідӧк алғым тыхтағ тоғыстары парча – Оңхактағы, Ширадағы 17 №, Хара кӧлдегі, Чирімдегі, Оспадағы, Таштыптағы 2 №, Сорығдағы 2 №, Новороссийскайдағы школаларда.
Ідӧк «Полған на паланың чидии» проект хоостыра пӱӱл 9 школаның спорт залы нааҷылалча. Ол Боградтағы, Будёновкадағы, Улуғ Ноныптағы, Тоғызаастағы, Кызластағы, Знаменкадағы, Чарковтағы ортымах школаларның спорт заллары. Хакасия чыл сай пу проектте араласча, тиксі 100 азыра спорт залы тыхтал парған. Ол олғаннарға спортнаң айғазар чахсы оңдай пирче.
Сом Дмитрий Сунчугашевти
Автор :
Оксана Сунчугашева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
