Садығ киреенде маңнаныстығлар
26.07.2023
Хабарлар
Татьяна Курбатова Анатолий Щетининге
Хакасия правительствозының алғыстазын читірген
Сыйыхтас. Cадығ тоғынҷызы кӱні алнында республиканың ӱлгӱ туразында Хакасия пазының орынҷызы Татьяна Курбатова садығ киреенең палғалыстығ тоғынҷыларны паза идінҷектерні алғыстаан
Пӱӱл садығнаң айғасчатхан иң маңнаныстығ тоғыс идінҷекке паза садығ киреендегі иң чахсы сигіс специалистке Хакас Республика правительствозының алғыстазы читірілген. Оларның санында полғаннар: Хакасияның экономика тилізі министерствозының пос кирее паза садығ тилізі департаментінің чӧпчізі Тимур Сафьянов, Асхыс аймаа устағ-пастааның идінҷектернең тоғынарынҷа ӧӧн специализі Екатерина Мамышева, Асхыс аймаандағы Пирікчул аал чӧбінің специализі Анастасия Кыржинакова, Асхыс аймаандағы идінҷектер Иван Миндибеков, Анатолий Щетинин, Фаина Галкина, Пии аймаандағы идінҷек Андрей Аникин, Шира аймаандағы идінҷек Татьяна Дмитриева, Алтай аймаандағы идінҷектер Марина Кузеванова, Фёдор Погорельченко, Абазадағы идінҷек Игорь Скурихин, Харатастағы идінҷек Вадим Тропин.
– Хакасия пазы Валентин Коноваловтың паза позымның адымнаң сірерні профессия ӱлӱкӱнінең алғыстапчам. Сірернің тоғызыңар уғаа кирек паза пістің экономика тилізінің ӧӧн чардығы полча. Полғаныңарға ла иң пастап хазых, таңдағы кӱн пӱӱнгізінең артых поларына ізеніс алғапчам. Профессияҷа устарың кӱннің чахсыланзын. Сірерге хайдағ ла сидіксіністер урунмаан: инфляциялар, пандемия, санкциялар. Оларны тобырып алғазар. Сірернің тоғызыңар чох чуртазыбыстың пір дее кӱні иртпинче. Сірерге кӧп чыл чуртирға паза ӧңненерге алғапчам! – алғыстаан Татьяна Курбатова.
Хакасияның экономика тилізі министрінің орынҷызы Людмила Халтанова, садығ киреендегілерні профессия ӱлӱкӱнінең алғыстап, оларның тоғызының тузазын таныхтаан:
– Сірер уғаа кирексер паза піс сірерні аарлапчабыс. Министерство адынаң Садығ тоғынҷызы кӱнінең сірерні алғыстапчам! Киректеріңде маңнаныстығ полыңар, сӧбіреңерде часка ползын. Киректерің чахсы парзын, парызыңар ӧссін паза наа чидіглерге чидіңер!
Садығ – экономиканың ӧӧн чардығы. Хакасияның бюджедінзер налог тӧлеглерінің 12 азыра проценті килісче, 2023 чылның кӱрген айына республикада 7895 организация саналған, оларның 1515 (19,2%) опт паза розница садиина килісче. Тоғынчатхан чонның 20 проценті садығ киреенде істенче.
Анатолий Щетинин Асхыс аймаандағы маңнаныстығ тоғынчатхан идінҷектернің пірсі полча. Ол пос киреен 1992 чылда садығ тураларын, аптека азарынаң пастаан. Пӱӱнгі кӱнге ідӧк бетон сығарызынаң паза пӱдірігнең айғасча.
– Садығнаң айғазарға хаҷан даа оой полбаан. Че иң сидік тус 1990 чылларға килісче. Андада ахча чох полған, кредиттер пирілбеҷең. Че пос киреен азарға оой арах полған. Пӱӱнгі кӱндегі осхас конкуренция полбаан. Амды пірее наа ниме сағынарға килісче, пос киреенең айғазар ӱчӱн. Мин пос киреен тӧстеенде, ол саринаң сала ниик полған. Пос киреенең айғазарға сағынчатханнарға хорыхпасха чӧп пирчем, – теен Анатолий Валентинович.
Амғы туста Анатолий Щетининнің Асхыста ас-тамах садылчатхан ікі садығ туразы, аптека паза Ӧӧк пилтірі аалда пір садығ туразы пар.
Шира аалдағы идінҷек Татьяна Дмитриева 1992 чылда садығ киреенең айғазып пастаан.
– Чуртас тооза садығнаң айғасчам. Пос киреен тӧстир алнында хоза частьтар складында кладовщик полғам. Анда ікӧлең тоғынғабыс. Тоғынҷылар санын хызырар тус чит килгенде, андартын парыбызарға чаратхам. Хада тоғынған ипчінің кӧп пала полған, аннаңар ол тоғынзын тіп сағын салғам. Ибде ӱр одыр полбаам. Пірее нименең айғазарға кирек ле полған. Мин сым одыр полбас кізібін. Нинҷе-де ай тоғыс чох одырған соонаң садығнаң айғазарға сағыныбысхам. Пылтыр садығ туразын азыбысханнаң 30 чыл ирт парған. Чиис паза оох-теек нимелер сатчабыс. Орындағы фермерлернің, предприятиелернің ас-тамаан садарға кӱстенчебіс. Амғы туста изіртчең суғлар сатчатхан садығ туралары кӧп азылчатханы хомзындырча, че ас-тамах сатчатханнар асхынах. Чонға ас-тамах кирек нооза.
Пістің уғаа хынығ паза аар тоғыс. Че ӧӧні – ол минің кӧңніме кірчеткен кирек. Мин чуртазымда позымны таап алғам тиирге чарир. Амды пос киреемні Алексей оолғым узарадар. Ол мағаа чахсы полысча, – теен Татьяна Дмитриева.
Ирткен чыл Хакасияда «Тура хыриндағы садығ туразы» марығда Татьяна Дмитриеваның садығ туразы пастағы орынға турысхан. Анда ниме садылчатханы, садығҷыларның тоғызы паалалған. Марығ араласчылары садығ тураларынаң таныстырғаннар. Татьяна Дмитриева пу марығда 100 муң салковай утып алған.
– Марығда аралазып, идінҷектернең танызып алғам. Араласчылар пос опыдынаң ӱлескеннер. Оларны хынып истіп алғам. Пістің республикада чиит идінҷектер илееде полтыр. Марығ хынығ ирткен, – сағыстарынаң ӱлескен Татьяна Петровна.
Сом Дмитрий Сунчугашевти
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
