Халых ӱзӱрігде ӧткін араласханнар
21.07.2023
Хабарлар
Хакасия пазы Валентин Коновалов, республиканың Халыхтар палатазының кізілері паза сыйыхтар алған волонтёрлар
Сыйыхтас. Хакасиязар газ тартар пӧгіннең пӱӱл сілкер айының 15 – 19 кӱннерінде республикада халых ӱн пиріс ирткен
Чуртағҷылар республиказар газ тартар сурығҷа кӧрістерін читіргеннер. Хакасияның Халыхтар палатазы халых ӱзӱріглер ӱчӱн нандырған. Волонтёрлар чон аразында сурастырығ иртіргеннер. Анда регионның 17014 чуртағҷызы араласхан. 14121 чуртағҷы газификация ӱчӱн ӱнін пирген, тоғыр – 2891 кізі.
От айының 19-ҷы кӱнінде халых ӱзӱрігде ӧткін араласхан волонтёрларға Хакасия правительствозының алғыстазы читірілген. Оларның аразында аймах организацияларда тоғынчатханнар паза ӱгренҷілер полғаннар.
– Тиксі хазнада газификация иртірері – ол Россия президенті Владимир Владимирович Путин турғысхан пӧгіннернің пірсі. Сілкер айында Хакасияның Халыхтар палатазы республикада газификация иртірер сурыға чарыдылған халых сурастырығ иртірібіскен, чуртағҷыларның сағыс-кӧрізін піліп алар пӧгіннең. Халых ӱзӱріглер – амғы туста чонның улуғ тирии паза сағыс-кӧрісті читірер оңдай. Пістің чуртағҷыларға теелчеткен уғаа кирек чарадығлар чон сағызын санға албин алылбасха киректер.
Халых ӱзӱрігде ӧткін араласханнарың ӱчӱн алғызым читірчем. Сірернің полызииңар паза ӧткін гражданскай кӧрістерің сылтаанда, Хакасияның 17 муң азыра чуртағҷызының сағызы читірілген. Пу уғаа чахсы салтар. Халых ӱзӱрігнің салтарлары пістің регионзар газ тартарынҷа тоғысха кирілер, – теен Валентин Коновалов.
Хакасияның Халыхтар палатазының кнезі Ольга Левченко республикада газификацияҷа халых ӱзӱрігде араласхан волонтёрларға алғызын читірген.
– Піс кӧп ӱзӱріг ирткебіс, аннаңар мыннаң тоғызыбыс тоозылбинча тіп сағынчам. Амды социальнай сурығлар пӧгерінде чонның сағыс-кӧрізі санға алылчатханы ӧріндірче. Іди поларға кирек, анзы чахсы. Пістің алныбыста 2023-2024 чыллардағы табығлар хоостыра тоғыс пар. Аннаңар сірерні анда халых кӧрігҷілер поларға хығырчам, – теен Ольга Левченко, волонтёрларзар айланып.
Халых ӱзӱріг тоғызында ӧткін араласхан 12 кізее Хакасия правительствозының алғыстазы читірілген. Оларның санында Ағбандағы «Чуртапчатхан орын хоостыра чоннаң тоғынарынҷа городтағы халых кін» учреждениенің директоры Нина Чаптыкова полған.
– Мин «Кӱмӱс волонтёрлар» ӧменің устағҷызы полчам. Піс Ағбанның ӧӧн орамаларында, МФЦ хыринда паза істінде, Индіркі Согра микрорайонда сурастырығ иртіргебіс. 20-ҷе волонтёр ӱс кӱн тоғынған. Піске 1000 бюллетень пирілген, – теен Нина Чаптыкова.
Ағбан пилтірі посёлоктағы «Аймахтағы чииттернің ресурс кіні» муниципальнай учреждениенің директоры Юлия Рубан халых ӱзӱрігде ӧткін араласханнарның санында. Аның чооғынаң, сурастырығда араласхан чуртағҷыларның кӧбізі газификация ӱчӱн ӱнін пирген. Ағбан пилтірі посёлоктағы кӧп квартиралығ тураларға газ пирілче, аннаңар андағы чуртағҷылар газификация ӱчӱн ӱннерін пиргеннер. Ағбан пилтірі аймааның ыраххы ааллар чуртағҷыларының кӧбізі газификациядаң тоғыр полча. Олар газнаң тузаланминчалар паза аннаң тузаланарға хорыхчалар тіп искіргеннер. Піреезі тіпче: «Песті одыңнаң одынчам. Іди дее чараай» алай «Хара таснаң одынарға ӱгрен парғабыс».
– Пістің 10-ҷа волонтёр сурастырығ иртірген. Чонға газификация тузазынаңар чоохтаабыс. Кізілер сағыс-кӧрістерін искіргеннер. Ағбан пилтірі посёлокта сурастырығ иртіргебіс. Ідӧк Пӱӱр пилтірі, Томыҷахтар паза Московскай аалларзар чӧргебіс, – теен Юлия Рубан.
Килер неделяда Халыхтар палатазының кізілері, аймахтарҷа чӧріп, халых ӱзӱрігде ӧткін араласханнарны таныхтирға пӧгінчелер.
Сом Хакасия пазы пресс-службазыни
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
