Пар андағ профессия – Чир-суун арачылирға
21.07.2023
Хабарлар
Контрактча чааҷы службазына таллағ апарчатхан пункттың пастығы майор Дмитрий Деменков
Контрактча чааҷы cлужбазы. Хакасияда контрактча чааҷы службазына кем паза хайдағ оңдайларҷа алылчатханнаңар чоохтаан контрактча чааҷы службазына таллағ апарчатхан пункттың пастығы майор Дмитрий Деменков
– Дмитрий Игоревич, Хакасияда контрактча чааҷы службазына таллағ хайди парча? Кем паза хайдағ оңдайларҷа армияа алылча?
– Россия армиязында контрактча чааҷы службазын иртерге сағынчатхан кізілер пістің таллағ апарчатхан пунктсар айланчалар, ол Ағбан городта Пирятиннің орамазы, 17а адресче орныхча. Пасха город-аалларның чуртағҷыларына постарының чааҷы комиссариаттарынзар айланарға. Ідӧк контрактча чааҷы службазына кірерге алай пос кӧңнінең ӧнетін чаа операциязында аралазарға сағынчатханнарға ырахтын даа айланарға чарир – «Хазна полызығлары» портал пастыра алай Россияның арачыланыс министерствозының сайтынҷа. Піс тынағ чох, кӱннің сай, тоғынчабыс.
– Контрактча чааҷы службазына кірібіскен кізілер паза СВО-зар пос кӧңнінең парарға сағынчатханнар нименең пасхалалчалар?
– Піс контрактча чааҷы службазына таллағ апарарынаң на айғасчабыс, аннаңар мин пос кӧңнінең парчатханнардаңар чоохтап полбаспын. Пілчем, оларнаң ӧнетін істеніс чӧптезии иділче, че олар чааҷы cтатузын албинчалар. СВО тоозыл парза, олар чааҷы-ветеранға пирілчеткен прай льготаларнаң тузаланарлар. Оларның чал ахчазы чааҷыларни осхас полар.
– Таллағ пунктында хайдағ оңдайлар кӧріл парған чааҷы службазына аларында?
– Пастағы теесте кандидаттың чазы – контрактча чааҷы службазына 18 – 65 частығ кізілер алылчалар. Чааҷы службазына олар пос кӧңнінең килчелер, контракт идерге оларны пірдеезі кӱстебинче. Чааҷы службазына пик хазыхтығ кізілер кирек, чӱрек-тамыр ағырығлығ кізілер, ідӧк психиказы сайбалған, наркотиктерге, іскее тартылчатханнар армияа алылбинчалар. Службаа албас списокта пасха даа ағырығлар пар.
– Срочнай службаны иртпеен кізілер контрактча чааҷы службазына алылчалар ба?
– Я, оларнаң даа контракт идерге чарадылча. Службаа алылған чааҷылар кӧріл парған прай ӱгредігні иртчелер. Срочнай службада амғы туста чааҷылар пір чыл полчалар, контрактча службаа алылған кізілер кӧріл парған ӱгредіглерні табырах, че чахсы иртерлер.
– Сірернің пунктыңарзар республика чуртағҷылары ла айланчалар ба алай пасха даа регионнардаң килчелер бе?
– Піс айланған прай кізілернең тоғыс апарчабыс. Іди пеер Туваның, Хызылчар крайының чуртағҷылары килчелер. Пасха хазналарның кізілері дее айланчалар. Оларнаң Россияның Тирігліг кӱстерінде служба иртерге контракт пір чылдаң асхынах нимес тусха иділче. Оларға ідӧк прай кӧріл парған тӧлеглер пирілче, льготаларнаң тузаланчалар, ағаа хоза, Россияның гражданствозын нииктелген оңдайларҷа алчалар.
– Сайбағ идіп, уголовнай нандырыға тартылып, чарғылатхан кізілер армияа алылчалар ба?
– Чарғыладып одырған кізінің тузы суурыл парғанға алай закон хоостыра чабыл парғанға саналчатса паза сыныхтағлығ тузы иртіп парған полза, андағларны армияа аларға чарадылча. Че мында чахсы кӧрерге кирек: хайдағ сайбағ иділгенін, нинҷе чыл одырғанын. Аар паза уғаа аар сайбағ (ӧдіріс, кізее кӱл салғаны паза даа пасхазы) иткен ӱчӱн чарғылатхан кізілер армияа алылбинчалар.
– Кізі таллағ апарчатхан пунктсар килді. Аннаң андар ағаа ниме идерге кирек?
– Контрактча чааҷы службазын иртерге килген полған на кізінең пастап чоохтазығ апарылча. Кандидаттың кӧңні санға алылча: хайда паза кем полып ол служба иртерге сағынча, аның тоғынған профессиязы, срочнай службада кем полғаны. Іди ағаа чааҷы службазын иртер должность таллалча. Анаң кандидат имнег комиссиязын иртче, кирек пічіктер толдырча. Аның паспорты, чааҷы биледі, хоных хонғаннаңар паза, палалар пар полза, олар тӧрееннеңер пічіктер пар поларға кирек.
Контракт иділ парған соонаң контрактник чааҷы частьынзар ызылча, анда ағаа кӧріл парған прай кирек ниме-ноо, чааҷы кип-азаа пирілче. Прай тӧлеглер хайда служба иртерінең (СВО-да алай пасха орында), должностьнаң, званиенең, окладнаң, хоза тӧлеглернең, пір хати пирілчеткен тӧлегнең палғалыстығ полар. Пір чыл азыра тусха контракт иділген соонда, чааҷы Россияның арачыланыс министерствозынаң пір хати пирілчеткен тӧлег, 195 муң салковай, алча, контракт ӱс чыл азыра тусха иділген полза, Хакасия бюджедінең хоза 50 муң салковай тӧлелче.
Луганск, Донбасс Чон республикаларында паза Украинада иртірілчеткен ӧнетін чаа операциязында араласчатхан чааҷылар 200 муң азыра салковай чал ахчазын алчалар, ідӧк оларға чаалазығлар ветераны статус пирілче. Контракт идіп алған чааҷылар частьта чаа ӱгредіглерін иртчелер, удур-тӧдір кӧнікчелер, хада-пірге чаалазарға ӱгренчелер, анаң на оларны СВО-зар ызарға чарадылча.
– Контрактча чааҷы службазын иртерге Хакасияда кӧп кізі айланча ба? Ипчілерні службаа аларға чарадылча ба?
– Армияда контрактча служба иртерге, ол санда СВО-зар парарға, сағынчатханнар саны ӧсче. Кӱннің cай онарлап кандидат килче, ӧӧнінде 35 – 55 частығ кізілер. Ипчілер дее контракт идерге айланчалар, олар имнег тоғызына, связисттерге алай ас-тамах тимнечең тоғыстарға алылчалар. Армияа ам уғаа киректер водительлер, механиктер, токарьлар, сварщиктер паза даа пасха техника специалисттері. Олар техниканы тыхтапчатхан, тутчатхан, нааҷылапчатхан подразделениелерзер ызылчалар.
– Контракт тузы тоозылғанҷа чааҷы аны ӱзібізерге сағыныбысса, ниме полар?
– Иділген контрактты прай толдырбин, чааҷы частьын пос алынҷа тастап парыбысса, ол хазыбысханға саналар. Аның ӱчӱн закон хоостыра нандырығ тударға килізер. Че андағ киректер тилем полбинча.
– Контрактникке хайдағ льготалар пирілче?
– Мында оларға льготаларның илееде кӧрімнері пирілче. Іди Россияның арачыланыс министерствозының ахчазына чыылчатхан ипотека системазынҷа чурт табырах алып аларға чарир. Служебнай чурт пирілче алай чуртты арендаа алған ӱчӱн компенсация тӧлелче. Чаа-имнег учреждениелерінде тикке сыныхтанчалар, имненчелер. Федеральнай бюджет ахчазына чааҷының чуртазына паза хазиина страхование иділче, 20 чыл служба соонда льготалығ пенсия пирілче, ідӧк чаалазығлар ветераны статузы хоостыра прай льготаларнаң тузаланча. Кредиттер паза налогтар тӧлирінҷе каникуллар, палаларны вузтарда ӱгредерге бюджет орыннары пирілче, ідӧк палалары чайғы лагерьлерінде тикке тынанчалар паза даа пасха льгота кӧрімнері пар.
Контрактча чааҷы службазына кірер прай сығысчатхан сурығларҷа пу телефоннарҷа айланарға чарир: 8-923-393-50-01, 8 (3902) 35-89-04.
Сом Лариса Бакановани
Автор :
Чоохтасхан Николай Султреков
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
