Иң артыхтарға – хазна сыйыхтары
19.07.2023
Хабарлар
Хакасия пазы Валентин Коновалов
«Саянал» заводтың тоғынҷыларына хазна сыйыхтарын читірген
Тоғыс чорығы. Хакасия пазы Валентин Коновалов тоғыс чорығынаң Сойан-Сус ГЭС-сар паза Саяногорсксар чӧр килген
Сойан-Сус ГЭС-та
Республика устағҷызы, Сойан-Сус ГЭС-та полып, аның тоғынҷыларынаң тоғасхан. Пу гидроэлектростанция Хакасияның иң кӱстіг паза килкім предприятиелерінің пірсі полча. Ол 400 азыра тоғынҷаң орын пирче, чахсы тиліпче, республикаа кирек социальнай проекттерні чуртасха кирерге хабасча.
Ікі чыл мының алнында электростанция тулғор ӱстӱнҷе, машиналар залынҷа паза кӧрҷең площадкаҷа чӧрҷең экскурсиялар иртірҷең программа асхан. Іди ол Хакасияда промышленность туризмін асхан пастағы предприятие полыбысхан. Амды гидроэлектростанцияда аалҷыларнаң тоғазығлар иртірҷең кін пӱдірілче.
– Сойан-Сус ГЭС-тың тоғынҷылары тоғазығда мағаа кӧп сурығ пиргеннер. Ӧӧнінде олар чолларны тыхтирына, чағынғы чирлерні иптиріне, ибіркіні хайраллирына, сӧп-сап реформазына паза даа пасха киректерге теелгеннер, – искірген Валентин Коновалов.
«Поликрафт» ООО-да
Хакасия пазы Саяногорскта орныхчатхан «Поликрафт»ООО-да полған. Анда предприятие тоғынҷыларынаң тоғазып, оларның сурығларына нандырған.
«Поликрафт»ООО экологияны хайраллирына кӧстелчеткен производство кӧзідімі полча. Ол тузаланыста полған пластиктең пасха ниме-ноо сығарча. Аннаң предприятие сад-парк мебельін, урналарны, олғаннарға хумда ойнаҷаң орыннарны, тротуар плитказын, черепицаны сығарча. Аның иткен ниме-ноозын пістің республикада ла нимес, Сибирьнің пасха даа регионнарында кирексіпчелер. «Поликрафт» ООО Россияның тимір чолларынаң, Россетьтернең паза даа пасха улуғ компанияларнаң хада-пірге тоғынча.
Хайди Валентин Коновалов позының телеграм-каналында искірген, чирнің ис-пайын аныпчатханынаң палғалысты хызырчатхан, чир-чайаанға ӱрег ағылбинчатхан экономиканы тилідері – республика правительствозы тоғызының иң кӧп хайығ салылчатхан стратегия кӧстеглерінің пірсі. 2022 чылда пу кӧстеглерҷе тоғынчатхан предприятиелерге республика бюджедінең 170 миллионҷа салковай полызығ пирілген.
«Поликрафттың» устаа производствоны алғыдарға, тоғынҷаң наа орыннар тӧстирге пӧгінче. Пу тоғыс ӱчӱн нандырығлығ министерстволарға предприятиее хазна программалары хоостыра хабазығ пирер оңдайлар тимнеп саларға чахығлар пирілген.
«Саянал» заводта
Регион пазының искіриинең, ол Металлург кӱні алнында «Саянал» заводтың тоғынҷыларына хазна cыйыхтарын читірген.
Предприятие – алюминий фольгазын паза аннаң орааҷаң материаллар сығарчатхан Россиядағы иң алнында парчатхан заводтарның пірсі. Инвестиция проекттері хоостыра «Саянал» производствозын тилітче паза тоғынҷаң орыннар тӧстепче.
Кӧп чыл тӱзімніг тоғынған ӱчӱн, профессияда пӧзік устары ӱчӱн паза Хакасияның промышленнозын тилідеріне улуғ хозым итчеткен ӱчӱн республика чуртағҷыларына хазна cыйыхтары читірілген. Алынҷа улуғ алғыс отрасльның ветераннарына, хайзылары металлургия комплексін тилідеріне паалап полбас хозым иткеннер, постарының пай опыдын чиит тӧлге пирчелер.
Саяногорсктағы «Визит» культура туразының сценазында городтың паза республиканың чайаачы ӧмелері предприятиенің тоғынҷыларына концерт кӧзіткеннер.
– Аарлығ нанҷылар! Чахсы тоғызыңар, кирееңерге пирін салғаныңар, Хакасияның чуртас-экономика тилізіне салымнығ хозым итчеткеніңер ӱчӱн алғыстапчам сірерні! Пик хазых, сӧбіреңерде чахсы чуртас паза тоозылбас кӱс алғапчам сірерге! – чоохтаан Валентин Коновалов.
Сом Хакасия пазы пресс-службазыни
Автор :
Тимнеен Николай Султреков
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
