Хазна хабазии. Хакасияның ӱлгӱ туразында чайаачы (креативтiг) индустриялар проекттер марииның чиңiсчiлерiне грантха сертификаттар читiргеннер

Марығ пос киреенең айғасчатханнарға паза посха тоғыс таапчатханнарға чайаачы сағыстарын чуртасха кирерiне хабазар пӧгiннең иртiрiлче. Пӱӱл ол 13 номинацияҷа ирткен. 89 проекттең 14-i чиңicчi полыбысхан. Амды олар Хакасияда чуртасха кирiлерге киректер. Проекттерге хабазарына 15,2 миллион салковай пирiлген.

Хакасия пазы Валентин Коновалов, чиңiсчiлерге грантха сертификаттар читiрiп, оларны алғыстаан:

– «Кiчiг нимес бизнес» форумда сiрер мындағ марығ иртiрерге сурынғазар. Креативтiг индустриялар кӧстегҷе хабазығ синiн ӱс хати ӧскiрiбiскебiс. Марығда араласхан паза республиканы тилiткен ӱчӱн алғызым читiрчем. Проекттерiң регион тилiзiне туза ағылар. Ciрерге маңнаныс паза наа чайаачы сағыстарыңны табырах чуртасха кирерге алғапчам.

Хакасияның культура министрi Светлана Окольникова чиңiсчi проекттерiнең хысхаҷахти таныстырған паза орғах айында оларның парады иртiрiлердеңер чоохтаан.

Асхыс аймаандағы идiнҷек Елена Бурнакова, «Гастрономия» номинацияда утып алып, хакас чонның ас-тамаанаң таныстырар паза кiзiлернi аннаң хайда даа азырир пӧгiннең фудтрак (чиис тимнеҷең прицеп) алып алар.

Идiнҷек Алёна Аладина «Ресторанда театр» проектiнең чиңiп алған. Аның пӧгiнi – «Ливини» ресторанда театр тӧстирi. Посха тоғыс таапчатхан кiзi Андрей Попков ас-тамах фестивальларын иртiрерiне хабазығ алып алған. Грант ахчазына кӧс чӧрчеткен улуғ пес алып алар. Пiр кӱнге анда1000 кiзее чиис тимнир оңдай полар. Тегiлектiг пес полызиинаң орыс чонның ас-тамаан тимнирiнҷе мастер-класстар, презентациялар иртiрерлер. Пу ӱс проект «Гастрономия» номинацияда чиңiс тутхан.

«Кино, анимация паза пасха даа видео ниме-ноо сығарызы» номинацияда Александр Васильев «Кинокомпанияларға Хакасиядаңар искiрiглiг портал – кинорх.рф» проект тимнебiскен. Олох номинацияда Михаил Мерзликин утып алған. Ол «Хам» хоос фильм суурарға пӧгiнче. Фильм хакас тiлiнең полар. Проекттiң пӧгiнi – национальнай кинематографты тилiдерi. Чиңiсчiлер санында «Хакасфильм киностудия» ООО полча. Ағаа хазна хабазии техническай база тилiдерiне пирiлче.

«Мода» номинацияда Любовь Карман чиңiсчi полыбысхан. Идiнҷек теердең кип-азах паза пасха даа ниме-ноо тiгерге пӧгiнче. Олох номинацияның чиңiсчiзi – идiнҷек Оксана Макович. Ол спортнаң айғасчаң хакас хоостығ кип-азах сығарызынаң айғазар.

Асхыс аймаандағы идiнҷек Татьяна Сагатаева «Мода» номинацияда чиңiсчiлер санында полыбысхан. Ол хакас чонның хоостары чайалған тӧзек-частых, скатертьтер сығарар. Идiнҷек Юлия Стрелкова олғаннарға кип-азах тiгерiнең айғасча. Пылтыр ол пу марығда утханох. Пiр чыл аразына идiнҷек кип-азах сығарызын ӧскiрiбiскен. Максим Штань «SHTAN – Хакасиядаң дизайнер кип-азаа» проектiнең утып алған. Грант ахчазына кип-азах тiкчең цехсар наа оборудование, садызып, алылар.

«Музыка паза саунд-дизайн» номинацияда посха тоғыс таапчатхан кiзi Александр Медведев «Хара» проектiнең чиңiс тутхан. Аны хоостыра Александр Медведев национальнай кӧг тирiглерiн сығарарға паза концерттер, мастер-класстар пастыра республика чуртағҷыларын национальнай культуранаң таныстырарға пӧгiнче.

«Хоос искусство» номинацияда Артём Новопашин арт-объекттер чайаҷаң орын тӧстирге пӧгiнче.

«Пасхаҷыл проект» номинацияда сомҷы Анастасия Пачина утып алған. Проект хоостыра сом лабораториязы тӧстелер.

Светлана Окольникованың чооғынаң, чиңiсчiлернi табарға уғаа сидiк полған, полған на проект хабазығ аларына турыстығ, аннаңар чарғыҷылар аразында талас полған. Чиңiсчiлер Хакасия правительствозына паза культура министерствозына хабасчатхан ӱчӱн алғыс сӧстерiн читiргеннер.

– Грант ахчазы пiске пӧзiк технологиялығ оборудование алып аларға полызар. Пiстiң проект «Интеграция» адалча. Аның полызиинаң Хакасияның сiлиин кип-азах пастыра читiрербiс. Пiстiң спортсменнерiбiс, пасха городтарзар парып, культурабысты, кибiрлерiбiстi сабландырарлар, – теен идiнҷек Оксана Макович.

Елена Бурнакова 1995 чылдаң ас-тамах сығарызынаң айғасча паза кафенiң ээзi полча.

– Пiс Асхыс аймаанзар килчеткен туристтернi, аалҷыларны, делегацияларны удурлапчабыс. Хакас чонның ас-тамаан тимнепчебiс. Аны сабландырар пӧгiннең пу марығда аралазарға сағыныбысхам. Хакасиязар килген кiзiлер национальнай чиистi амзап кӧрерге сағынчалар. Асхыс аймаа чуртағҷыларының кӧбiзi чарбалығ ӱгренi кибiрли тимнепче, хайди аны пызырғаннар пiстiң ууҷаларыбыс. Мының алнында айран полған на чуртта полған. Ол ас-тамахты пiстiң республика аалҷылары амзап кӧрзiннер тiп, пу марығда араласхам. Хакастарның кибiрлiг чиизiн ярмаркаларда паза республика иртiрчеткен ӱлӱкӱннерде сабландырар ӱчӱн, фудтрак киректелген. Пiс 800 муң салковайға сертификат алып алғабыс, – теен Елена Бурнакова.

Сом Хакасия пазы пресс-службазыни