Хакасия пазы Валентин Коновалов республиканың ӱгредіг кирее тоғынӌылары профсоюзының устағҷызы Любовь Барабанованаң тоғасхан. Олар халғанҷы туста СМИ-ларда ӧткін тарадылчатхан искірігні ӱзӱргеннер. Анда ӱгретчілерні паза воспитательлерні Хазна Думазы депутадының адына айланыста хол саларға кӱстепчеткеннеңер чоохталча.

‒ Хомзынысха, ӱгредіг тоғынҷыларын политика ойыннарында араластыртчалар. Прай пу нимелер кӧңнілеріне теелче паза оларны сағыссыраттырча. Минің кӧрізімнең, правительстваа паза профсоюзха, хада-пірге тоғынып, пу ойыннарны тохтадарға кирек. Кізілер, мыннаң мындар ниме поларына чӱрексiбин, тынағ тузын амыр иртірерге киректер, ‒ чоохтанған регион пазы.

Валентин Коновалов ӱгредіг тоғынҷыларына республика правительствозы тимнепчеткен полызығлардаңар, чал ахчазының синін кӧдірер пӧгіннең апарылчатхан тоғыстаңар удаа чоохтап турарға кирек тіп таныхтаан.

‒ Пастағызын, хазнабыста ӱгретчілернің чал ахчазының улии хай син паланы ӱгретчеткенінең палғалыстығ полчатханы сылтаанда аалларда істенчеткеннернің сидіксіністер парын піс пілчебіс. Аалдағы класстарда ӱгренҷілер саны хызырылчатса, ӱгретчінің чал ахчазы ідӧк хызырылча. Мындағ тоғынҷыларға регион пазының программазы хоостыра хоза тӧлеглер кӧріл парған. Ӏкінҷізін, піс оклад паза хоза тӧлеглер пирілер оңдайны алыстырчабыс. Анзы хайди даа тӧлелер чал ахчазының синін кӧдірер пӧгіннең иділче. (Таныхтирға кирек, мының алнында оклад 50% паза хоза тӧлеглер 50% тӧлелҷең полған полза, 2022 чылдаң сығара оклад синi 70%-ке паза хоза тöлеглер синi 30%-ке тиңнелчелер.) Пу алызығлар аймах синдегі устағҷыларға, ӱгретчілерні тоғыстарына теелбинчеткен нимелерні итіріп, хоза тӧлеглерні пиріп алай пирбин полчадарға оңдай пирбес. Ол орта чол, піс, профсоюзтарнаң чӧптезіг иділгені хоостыра, мыннаң мындар пу кӧстегҷе тоғынарын узарадарбыс. Ӱзінҷізін, килчеткен чылда ӱгредіг тоғынҷыларына ипотека ӱчӱн пастағы тӧлегні тӧлирге полызарына республика бюджедінең ахча позыдарға чӧп пирчем. Чурт сурии прайзын сағыссыратча, уламох піске аалларда ӱгретчілер чидіспинчеткенінең палғалыстығ сидіксіністі пӧгерге кирек, ‒ чоохтанған Валентин Коновалов.

Любовь Барабанова Хакасия пазына паза правительствозына ӱгредіг киреенде істенчеткен тоғынҷыларға улуғ хайығ салчатханнары ӱчӱн алғызын читірген.

‒ Ирткен чылдағы окладты 20%-ке ӧскіргені паза Сірер таныхтаан полызығлар ӱгредіг тоғынҷыларының ахчанаң палғалыстығ сурығларын пӧгеріне улуғ хозым полар. Ӱгретчілер анзын пӧзік паалирлар, ‒ санапча ӱгредіг кирее тоғынҷылары профсоюзының устағҷызы.

Таныхтирға кирек, 2023 чылда Хакасия правительствозы муниципалитеттерге школа тоғынҷыларына чал ахчазын тӧлиріне субвенцияны 1 млрд 361 млн салковайға хозыбысхан, 2022 чылнаң тиңнестірзе, ол 27%-ке кӧп. Ӏди аның сині 4 млрд 995 млн салковайдаң 6 млрд 356 млн салковайға ӧс парған.

Сом Хакасия пазының паза правительствозының пресс-службазыни