Хакасияда Ағбан – Бийск чол пӱдiрии узарадылча.

Ағбан – Бийск автомобиль чолы пӱдiрiл парза, ол Хакасияның, Хызылчар крайының, Кемеров облазының паза Алтай крайының аймахтарын хазнаның ӧӧн чолларынаң пiрiктiр салар. Проект хоостыра Асхыс – Пирiкчул – Тӧӧ пазы чолның 68 – 73 км кизегiн нааҷылир паза Ағбан – Улуғ Ортон – Таштагол чолның 23 – 30 км кизегiнде асфальт тӧзир тоғыстар 2021 чылда пасталғаннар. Ол объекттер пӱӱл тузаланысха кирiл парарға киректер. Iдӧк Асхыс – Пирiкчул – Тӧӧ пазы чолның 73 – 88 км кизегiн нааҷылир чӧптезiг идiлген. Ағаа республика бюджедiнең 983 миллион салковай позыдылған. Анда асфальт 2025 чылға теере тӧзел парар. Пӱӱл Тӧӧ пазының Советскай орамазында iдӧк асфальт салылар.