Митинг. Ағбанда Чиңic паркындағы Успас от хыринда улуғ митинг ирткен. Анда Хакасияның устаа, кизек чаалазығлар ветераннары, халых пірігiстерiнiң кізілері араласханнар

Пу мероприятие Ағбанда турған гвардияның 100-ҷі алынҷа кии-десант бригадазының Кутузовтың орденінең сыйыхтатхан гвардияның 300-ҷi парашют-десант полкы тӧстелген кӱннің 80 чылына паза Украинада иртірiлчеткен ӧнетiн чаа операциязының араласчыларын чеестиріне чарыдылған. Ағаа хоза, анда автомобильлер колонназының городча чӧрізi кӧріл парған.

Чиңic паркындағы Чааҷылар сабланызы мемориал хыринзар Хакасия пазы Валентин Коновалов, аның орынҷызы Юрий Курлаев, республиканың Халыхтар палатазының кнезі Ольга Левченко килгеннерiнде, «Россия моя» сарын толдырылған. Парад кип-азахтығ чааҷылар площадьсар Россияның, Хакасияның, Кии-десант войсколарының флагтарын, Чиңic флагының хобырғанын строевой хаалағнаң ағылғаннар.

Россияның паза Хакасияның гимннерi толдырылған соонда митинг пасталған. Хайди искірген мероприятиені апарчатхан тоғынҷы, 28 июньда 1943 чылда Москва хыриндағы Щелково городта гвардияның 13-ҷі кии-десант бригадазының iкiнҷі чардығы тӧстелген. 24 январьда 1944 чылда ол бригада гвардияның 300-ҷі атығҷылар полкына айландырылған. 25 апрельде 1945 чылда полк М.И.Кутузовтың III степеньніг орденінең сыйыхтатхан. 1992 чылда октябрьда полк Ағбан городсар ызылған.

«Долг. Честь. Отечество» – андағ хыйғынаң полктың чааҷылары паза офицерлері чаалазыға парҷаңнар. Олар немец-фашист азымахчылары холынаң Совет Союзын, анаң Венгрияны, Австрияны, Чехословакияны позытханнар.

Анаң сӧс Хакасия пазы Валентин Коноваловха пирілген.

– Полктың махачы чааласхан чолы прайзыбысха, ол санда Хакасиядаң Украинада иртірілчеткен ӧнетін чаа операциязында араласчатхан чааҷыларыбысха, кӧзiдім полча. Олар, пістің паба-ағаларыбыс чіли, неонацизмнең, бандеровщинадаң тоғыр кӱрезіп, Чир-суубыстың пос алынҷа чуртазын арачылапчалар. Піс армиябысха прай кӱснең полысчабыс, Россияның президентi Владимир Владимирович Путинге хабасчабыс. Илбек Ада чааның фронттарында, постарының чуртазына айабин, пу чир ӱстӱн нацизмнең ал халған матырларны хаҷан даа ундубаспыс.

Гвардияның полкы совет чонының поғдархазының, чааҷылар сабланызының, сындырлығ тудынызының тании полча. Полк чааҷыларынаңар сағыс хаҷан даа пiстің чӱреебісте халар. Пірдеезі ундудылбаан, пiр дее ниме ундудылбады! – теен республика устағҷызы.

Митингте iдӧк чоох тутханнар «Россия ветераннарының пірігiзi» чаа паза чааҷы службазы ветераннарының тиксi Россиядағы халых пiрігiзінің региондағы пӧлиинің кнезі Владимир Недвецкий паза Республиканың Ветераннар чӧбінің кнес орынҷызы Юрий Седых.

Владимир Недвецкий саблығ полктаң нинҷе Cовет Союзының паза Россияның Матыры, паза нинҷе генерал сыхханнаңар, iдӧк полктың командирi полған Алексей Лебедь Хазна Думазының депутадына, анаң Хакасия пазына табылғаннаңар искірген.

Юрий Седых, iдӧк полктың чаадағы саблығ чолынаңар чоохтап, Хакасияда чааҷыларға госпиталь пӱдірер сурыныснаң республика устаанзар айланған.

Митинг тоозылғанда, пір минута сым турары чарлалған, чааҷылар автоматтар атызынаң салют иткеннер. 300-ҷi парашют-десант полкының ветераннары Чааҷылар сабланызы мемориал тӧзiнзер венок салғаннар, Хакасияның устаа, кӱс структураларының, халых пірігістерінің кізілері Успас от хыринзар чахайахтар салғаннар.

Автомобильлер колонназы Ағбанның орамаларынҷа парған.